Marcos 11:1-33
11 Jerusalenɗe bamaa panuuɗe Betfagé puuruɗe mauɗe Betania puuruɗe neesiɗau, Olivo ea kaita. Aria Jesusba ichi baara nibabadaurã ome panuu puuruɗaa bʉisii.
2 Ãchimaa naka jarasii: «Chi Dachi kĩraare puuru kuɓuumaa wã́sturu. Aria baaduuɗe machiba burro cheke unuɗai. Mau ʉ̃rʉ wabiɗa aɓa biɗa atauɗakau. Enaɗapeɗa enésturu.
3 Aɓauba machimaa sakãe jãka wau panuma a iɗiiruubʉrã jarásturu: “Dachi Mechiuba nau kʉ̃ria ɓuu maamina waya isa urubʉʉi”».
4 Oɗe wãaduu niɗauɗe burro iikaa de poraa jãkaa jʉ̃ nuɓuu unusiɗau. Maabae enatasiɗau.
5 Chi aria panuuba iɗisiɗau: «¿Kãare wau panuma? ¿Sakãe jãu burro ena panuma?»
6 Jesusba jaraɗa kĩra panausiɗauɗe chi aria panuuba ida adoebiasiɗau.
7 Maabae chi mura cheke Jesusmaa adoeɗapeɗa ãchiba chi anaɓari jʉ̃badau burro ʉ̃rʉ kuɓusiɗau. Maabáeburu Jerusalén puuruɗaa wãi baita Jesús chi burroɗe atausii.
8 Ãreaba Jesús biꞌia irsibiɗai baita ãchiba chi anaɓari jʉ̃badau oɗe tõ bʉikasiɗau. Waabenarãba bakuru jua mauɗe kiruu modeɗe tariɗapeɗa oɗe bʉikasiɗau.*
9 Maka wauduuɗe ichi naa niɗauba mauɗe kaaɗe niɗauba jĩwa jara kopaneesiɗau:
¡Ãrea biꞌia nii! ¡Ãrea biꞌia nii chi Dachi Mechiu trʉ̃ɗeeba neeruu!*
10 ¡Ãrea biꞌia nii dachi nabẽraeɗebena Davidɗebena neeɗa! ¡Ichiɗirã ichi juaɗe ua ɓuai!¡Ãrea biꞌia nii dachi Bajãaɗebena Akõre!
11 Jesús Jerusalenɗe neesiiɗe Dachi Akõre de mechiuɗaa wãsii. Joma aɗu kauwa ichiapeɗa, kiuruuɗeeba ichiba 12 panuu baara Betania puuruɗaa waya wãsiɗau.
Jesusba higo bakuru kachirua jaraɗa
Mateo 21:18-19
12 Norema Betania puuruɗebena wãaduuɗe Jesús jarrbisia koɓeesii.
13 Mauɗe kaitawẽeba higo bakuru kiruu baraa nuɓuu unusii. Wabiɗa chi chaubarii ewariwãe basmina, Jesusba ichiaɗe wãsii chi jõo bara nuɓuu kuitaa. Araa neeruuɗe bari kirúturu nuɓuu unusii.*
14 Mauɗe Jesusba chi higomaa jarasii: «¡Aɓau biɗa jãabae bichi jõo jõɗaabai!»
Mau beɗea ichi baara nibabadaurãba ũrisiɗau.
Jesusba ne barikia nedobʉibadaurã duabʉikuaɗa
Mateo 21:12-17; Lucas 19:45-48; Juan 2:13-22
15 Jesús Jerusalenɗe waya neepeɗa Dachi Akõre de mechiu duɗaa wãsii. Aria ne kaebea nedobadaurã mauɗe nedobʉibadaurã unusiiɗe ãchi duabʉika koɓeesii. Aria chi nejarra nedobʉibadaurã mesa ɓee, paloma nedobʉibadaurã akʉ paneebadau joma korekuasii.
16 Dachi Akõre de mechiuɗe nekaebearã nedobʉiɗai baita adoeduurã eɗa wãɗai ida kabiabasii.
17 Ãchimaa naka jaradeasii:
—Dachi Akõre beɗeaɗe naka ɓʉ kuɓuu: “Mʉ de, chi ʉtaa iɗibadau de aɗai, joma puururã baita”. Maamina machiba “nechiruabadaurã choɓea” kĩra uru panuu.*
18 Mau beɗea ũrisiɗauɗe paare mechiurã mauɗe Moisesba ɓʉɗa jaradeabadaurãba Jesús wapeasiɗau ichiba jaradea ɓuu jomaurãba biꞌia ũrisiɗauɗeeba. Maaɗakare saka beaɗai jʉrʉ kopaneesiɗau.
19 Kiuruuɗe Jesús ichi baara nibabadaurã baara Jerusalenɗebena wãsiɗau.
Higo poa nuɓeeɗa
Mateo 21:20-22
20 Norema dapeɗe Jesús ichi baara nibabadaurã baara waya Jerusalenɗaa wãsiɗau. Wãaduuɗe chi higo bakuru karraeɗe poa nuɓuu unusiɗau.
21 Mauɗe Jesusba jaraɗa Pedroba kĩrabasii. Mauɗeeba jarasii:
—Jaradeabarii, ichiáse. Bichiba kachirua jara ɓuɗaba higo bakuru poa nuɓeesii.
22 Jesusba jarasii:
—Machiba Dachi Akõreɗe ijãaɗai panuu.
23 Mʉʉba biawãra jaraaruu: barikiuba cha nau eamaa jãmabena marɗaa wã́baɗe aaruubʉrã, ichiba jaraaruu kĩra makai. Maamina ichi sõɗe kʉ̃risiabai ɓuu ichiba jaraaruu makawẽe, maumaarã biawãra makai ijãai ɓuu.
24 Mauɗeeba mʉʉba machimaa jaraaruu: joma machiba Dachi Akõremaa ʉtaa iɗiiduu biawãra adauɗai ijãaduubʉrã, mau adauɗai.
25 Mauɗe machiba Dachi Akõremaa ʉtaa iɗi panuuɗe barikia ẽbẽra ome kĩra kachirua panuubʉrã, mau ẽbẽraba kachirua wauɗa perdonásturu. Makaaruubʉrã machiba kachirua waupeɗaaɗa machi Bajãaɗebena Akõreba perdonai.
26 Maamina machiba perdonawẽebʉrã waabenarãba machimaa kachirua waupeɗaaɗa makarã machi Bajãaɗebena Akõre biɗa machiba kachirua waubadau perdonaabai.*
¿Kai trʉ̃ɗeeba Jesusba jaradea ɓuu?
Mateo 21:23-27; Lucas 20:1-8
27 Maabae ãchi waya Jerusalenɗe neesiɗau. Jesús Dachi Akõre de mechiu kaita ɓuumisa, paare mechiurã mauɗe Moisesba ɓʉɗa jaradeabadaurã neeɗapeɗa,
28 ichimaa iɗisiɗau:
—Bichiba nama wau ɓuu ¿kaiba naka waubi ɓuma?
29 Jesusba panausii:
—Mʉa biɗa machimaa iɗiiruu. Machiba panauduubʉrã mʉʉba jarai kaiba mʉʉmaa naka waubi ɓuu.
30 ¿Kaiba Juan bʉisma boro eamera? ¿Ẽbẽraba maebʉrã Bajãaɗe Ɓuuba? Panáusturu.
31 Maabaeara ara ãchi chiya berrea bara ɓeesii: «Bajãaɗe Ɓuuba bʉisii aaduubʉrã, ichiba jaraaruu: “Mau ¿sakãe ijãaɗaabasma?”
32 Maamina ¿saka jaraɗaima mau ẽbẽrarãba bʉipeɗaaɗa?»
Chi ẽbẽrarã wapea panasiɗau, Juan biawãra Dachi Akõre baita berreabarii basii a kʉ̃risiasiɗauɗeeba.
33 Mauɗeeba Jesusmaa jarasiɗau:
—Daiba adua panuu.
Mauɗe Jesusba jarasii:
—Maka ɓuubʉrã mʉa biɗa machimaa jaraabai kaiba mʉʉmaa naka waubi ɓuu.
Notas
^ 11:8 Bakuru jua mauɗe kiruu modeɗe tariɗapeɗa oɗe bʉikasiɗau. Mau ewariɗe maka waubachiɗau ẽbẽra mechiu nii biꞌia irsibiɗai baita.
^ 11:9 Ãrea biꞌia nii. Arameo beɗeaɗe ɓʉ kuɓuu: Hosanna. Salmos 118:25-26.
^ 11:13 Israel druaɗe higo jõ kaebeu marzoɗe mauɗe abrilɗe poyaa koɗai panuu. Chi ne jõ kaebeu unuuduubʉrã kuitaabadau junioɗe ɓistĩika chaui, mauɗe agostoɗebena octubreɗaa ãrea chaui. Jesusba bari kirúturu nuɓuu unusiiɗeeba kuitaasii joma mau añoɗe chi higo bakuru chaubai. Israel mau higo bakuru kĩra nii. Oseas 9:10; Miqueas 7:1-2.
^ 11:17 Mʉ de, chi ʉtaa iɗibadau de aɗai. Isaías 56:7. Nechiruabadaurã choɓea. Jeremías 7:11.
^ 11:26 Griego beɗeaɗe chi ɓee kartaɗe mau versículo wãꞌãe.
