Marcos 12:1-44
12 Mauɗe Jesusba nebʉrʉʉruuba ãchimaa jarasii:
—Ẽbẽra aɓa ɓuasii. Ewari aɓauɗe mau ẽbẽraba uva uusii maabae mokaraba aɗu karaasii. Aria choɓea korosii chi uva barasui baita. Mauɗe de ʉtʉ wausii mamauba joma ichiai baita. Maabae ichi uva uu nuɓuu waabenarã ẽbẽrarã juaɗe ɓusii. Maarã ome beɗea deasiɗau chi uva uuɗa chauruuɗe sãabe ichimaa deaɗai panuu. Maka beɗea deaɗapeɗa chi chibari ãibena druaɗaa wãsii.
2 Maaɗakare chi uva junabadau ewari neesiiɗe chi chibariba chi bari trajabarii aɓa bʉisii chi uu nuɓuuɗebena ichimaa deaɗai panuu adauɗe wãmera.
3 Maamina chi uu nuɓuu nu panuuba chi chibari baita bari trajabarii jidauɗapeɗa sĩsiɗau. Maabae jua ara jãka duabʉisiɗau.
4 Mau maaɗakare chibari baita bari trajabarii june aɓa bʉisii ichimaa deaɗai panuu deaɗamera. Maamina mau boro kõapetasiɗau mauɗe miadaa jarakuasiɗau.*
5 Mau maaɗakare june maucha chibari baita bari trajabarii bʉisii maamina mau beasiɗau. Mau maaɗakare june maucha bari trajabadaurã ãrea bʉikasii. Maamina chi nuree sĩsiɗau, chi nuree beasiɗau.
6 »Chi chibariba wabiɗa aɓa uru ɓuasii bʉii baita; mau ichi warr ãrea kʉ̃ria inii basii. Kaaɗaa, “mʉ warr wapeadee panaɗai ɓubaa” a kʉ̃risiapeɗa, bʉisii.
7 Maamina chi uva uu nuɓuu nubadaurãba chi warr unusiɗauɗe ãchi chiya jarasiɗau: “Jãuba chi akõreba uru ɓuu joma adaui. ¡Jãu beáduru! Makaburu chi drua dachi baita ɓeei”.
8 Ara makʉɗe chi warr jidauɗapeɗa beasiɗau. Maabae chi uva uu nuɓuuɗebena awara jiratasiɗau.
9 Machimaarã, chi uu nuɓuu chibariba ¿saka wauima? Araa wãpeɗa ãchi joma kenapeɗa ichi uva uu nuɓuu waabenarãmaa deai nuɗamera.
10 Machiba ¿Dachi Akõre Beɗea ɓʉɗa eɗa jaraɗawãe panuka? Naka jara ɓuu:
“Chi mo chi de waubadaurãba ida ɓupeɗaaɗa, mau chi biara ɓeesii.
11 Dachi Mechiuba maka wauɗaɗeeba dachimaarã ãrea biꞌia ɓuu”*».
12 Paare mechiurãba mauɗe Moisesba ɓʉɗa jaradeabadaurãba kuitaasiɗau Jesusba mau nebʉrʉ ɓuuɗeeba ãchi ʉ̃rʉbena berreasii. Mauɗeeba Jesús jidau kʉ̃ria panasiɗau. Maamina Jesús jãkaa ẽbẽrarã ãrea basiiɗeeba jidaubiɗai wapea panasiɗau. Maka mau ida apii ɓuɗapeɗa maabae ãyaa wãsiɗau.
Romaɗebena baita chi nejarra pebadau ʉ̃rʉbena
Mateo 22:15-22; Lucas 20:20-26
13 Mau maaɗakare fariseorãba mauɗe Herodesɗebenarã Jesusmaa chi nuree bʉisiɗau ichimaa kachirua berreabiɗai baita.
14 Neeɗapeɗa jarasiɗau:
—Jaradeabarii, daiba kuitaa panuu bichi ẽbẽra jipa nii. Aɓau biɗa bichimaa awara kʉ̃risiabikau, bichiba joma ẽbẽrarã araɓauɗe unubariiɗeeba. Maumaarã biawãra Dachi Akõre o ʉ̃rʉbena jomaurãmaa jaradeabarii. Maka ɓuubʉrã daimaa jarase, Romaɗebena baita chi nejarra paai ɓuu ¿dachi judiorãba paaɗai ɓuka? maebʉrã ¿biꞌiwãe ɓuka?
15 Jesusba ãchi ẽbẽrarã chi jipa kĩra nuree kuitaasiiɗe, naka jarasii:
—Machiba ¿sakãe mʉ kachirua berreabiɗai kʉ̃ria panuma? Sẽetao dachiba paabadau aɓa unubiásturu.
16 Ara makʉɗe adoesiɗau. Mauɗe Jesusba iɗisii:
—¿Kai kĩedarrma nau chi sẽetaoɗe ɓuu? ¿Kai trʉ̃ ɓʉ kuɓuma?
Ãchiba panausiɗau:
—Romaɗebena chi aude mechiu niiɗe.
17 Maabae Jesusba jarasii:
—Maka ɓuubʉrã deásturu Romaɗebena chi aude mechiu niimaa chi mauba iɗiiruu, mauɗe ara mau kĩra deásturu Dachi Akõremaa chi mauba iɗiiruu.
Ichi beɗea ũrisiɗauɗe, pera bara ɓeesii.
Chi biupeɗaaɗarã chokae jiradubadau ʉ̃rʉbena
Mateo 22:23-33; Lucas 20:27-40
18 Maka panuuɗe waabenarã saduceorã Jesusmaa neesiɗau. Saduceorãba jarabadau biupeɗaaɗa chokae jiraduɗakau. Mauɗeeba Jesusmaa naka jarasiɗau:
19 —Jaradeabarii, Moisesba dachi baita ɓʉsii ẽbẽra aɓa warrwãe ɓuuɗe biuruubʉrã, ichi ãbaba chi pẽdrãa wẽra adaui ɓuu chi ãba biuɗa baita warr adaui baita.*
20 Earaɓa ãbarã 7 panasiɗau. Chi nabena miakãisii, maamina warr deawẽeɗe biusii.
21 Maabae chi ãba mawãare ɓuu miakãisii chi pẽdrãa ome. Maamina mau siɗa warrwãe ɓuuɗe biusii. Araɓauɗe makasiɗau chi ãbarã kaaɗe panuurã ome.
22 Joma mau 7 warrwãe biusiɗau. Mau maaɗakare chi wẽra siɗa biusii.
23 Mau 7 ãbarãba araɓau wẽra ome miakãisiɗau. Makarã chokae jiraduuduuɗe ¿sãu ãbaba mau wẽra uru ɓuaima?
24 Mauɗeeba Jesusba panausii:
—Machiba Dachi Akõre beɗea mauɗe chi poyaabarii adua panuuɗeeba biꞌia kʉ̃risiaɗawẽa panuu.
25 Ũrísturu. Biupeɗaaɗarã chokae jiraduɗai ewariɗe kima adauɗaabai mauɗe aɓau biɗa wẽra deaɗaabai miakãimera, maumaarã Dachi Akõre angelerã kĩra nureaɗai.
26 ¿Machiba biupeɗaaɗarã chokae jiraduɗai ʉ̃rʉbena Moisés kartaɗe eɗa jaraɗawẽa panuka? Dachi Akõreba Moisesmaa jarasii: “Mʉ Abraham Akõre Mechiubʉ, Isaac Akõre Mechiubʉ mauɗe Jacob Akõre Mechiubʉ”.*
27 ¡Mau chi biupeɗaaɗa Akõre Mechiuwãe, maumaarã chokae nuree Akõre Mechiubʉ! ¡Machi ãrea ãyaa kʉ̃risia panuu!
Dachi Akõreba waubi ɓuu beɗea chi aude mechiu ɓuu
Mateo 22:34-40
28 Maka berrea panuuɗe Moisesba ɓʉɗa jaradeabarii Jesús kaita neesii. Mau jaradeabariiba ũrisii Jesusba saduceorãmaa biꞌia panauɗa. Mauɗeeba iɗisii:
—Dachi Akõreba waubi ɓuu beɗea jomaɗebena ¿sãu chi aude mechiu ɓuma?
29 Jesusba panausii:
—Dachi Akõreba waubi ɓuu beɗea ʉ̃rʉbena chi aude mechiu ɓuu naubʉ: “Ũrísturu, israelɗebenarã. Dachi Mechiu aɓaburu nii.
30 Joma bichi sõɗeeba, joma bichi jauriɗeeba, joma bichi kʉ̃risiaɗeeba mauɗe joma bichi poyaaɗeeba bichi Akõre Mechiu kʉ̃riáse”. Dachi Akõreba waubi ɓuu beɗeaɗebena mau chi aude mechiu ɓuu.
31 Mauɗe chi mawãare ɓuu naubʉ: “Waabenarã kʉ̃riáse ara bichi kʉ̃ria ɓuu kĩra”.* Mau omeɗebena audeara chi mechiu wãꞌãe.
32 Mauɗe Moisesba ɓʉɗa jaradeabariiba jarasii:
—Biꞌia ɓuu, Jaradeabarii, bichiba jara ɓuu kĩra Dachi Akõre aɓaburu nii, ichi aude june wãꞌãe.
33 Dachiba biawãra joma dachi sõɗeeba, joma dachi kʉ̃risiaɗeeba, joma dachi jauriɗeeba, joma dachi akõre mechiuɗeeba Dachi Akõre kʉ̃riaɗai panuu. Mauɗe aɓau ara dachi kʉ̃ria ɓuu kĩra kʉ̃riaɗai panuu. Mau ãrea ãnimara Dachi Akõremaa baa deai baɗamaarã aude biꞌia ɓuu.
34 Moisesba ɓʉɗa jaradeabariiba mau kʉ̃risia kuitaaɗeeba jarasiiɗeeba Jesusba jarasii:
—Bichi Dachi Akõreba ichiɗirã ichi juaɗe ua panuu kaita ɓuu.
Makaeɗebena aɓauba Jesusmaa waya iɗiɗai kʉ̃riaɗaabasii.
Dachi Akõreba Dachi Karibabarii deai jaraɗa ¿kai warrma?
Mateo 22:41-46; Lucas 20:41-44
35 Jesusba Dachi Akõre de mechiu duɗa jaradea ɓuasiiɗe ẽbẽrarãmaa naka iɗisii:
—Judiorã Moisesba ɓʉɗa jaradeabadauba ¿sakãe jara panuu Dachi Akõreba Dachi Karibabarii deai jaraɗa David warr?
36 Ara mau Davidba Dachi Akõre Jauriɗeeba naka jarasii:
Dachi Mechiuba mʉ mechiu niimaa jarasii: mʉ jua biare akʉ ɓeese aɓa bichi kĩramaarã mʉʉba joma bichi juaɗe ɓuuruuɗaa.*
37 Dachi Akõreba Dachi Karibabarii deai jaraɗa Davidba mau mʉ Mechiu aaruubʉrã, ¿saka David warr baima?
Jesusba maka jaradea ɓuu ẽbẽrarã ãreaba kĩrajʉʉ ũri duanasiɗau.
Jesusba fariseorã ʉ̃rʉbena kachirua jaraɗa
Mateo 23:1-36; Lucas 11:37-54
38 Jesusba wabiɗa jaradea ɓuuɗe naka jarasii: «Moisesba ɓʉɗa jaradeabadaurãɗe kauwa panásturu. Ãchiba paru chi nejarra ãrea iɗibadau jʉ̃ɗai kʉ̃riabadau. Mauɗe puuruɗe niɗauɗe ẽbẽrarãba wapeadee panuuɗeeba saka ɓuma aɗayu kʉ̃riabadau.
39 Dachi judiorã araa ãbua imibadau deɗe ãchi jomaurã kĩraare akʉ paneebadau, jaradea ua ɓuabadau mechiurã akʉ paneebadaumare; mauɗe waabenarã baara koɗe wãaduuɗe ara maka waubadau.
40 Maarãba pẽdrãarã ne kaebea juakaa adaubadau mauɗe ʉtaa ãrea iɗibadau ẽbẽrarãba machi biꞌia ichiaɗamera. Mauɗeeba Dachi Akõreba ãchi aude kastikai».
Pẽdrãa chi nejarr barauwãe niiba sẽetao deaɗa
Lucas 21:1-4
41 Jesús sĩu ɓuasii Dachi Akõre de mechiuɗe chi nejarr pebadau kaita. Mau unusii ẽbẽrarãba sẽetao eɗa bʉikamaa panuu. Chi nejarr barau nureerãba ãrea bʉikabachiɗau.
42 Mauɗe pẽdrãa chi nejarr barauwãe nii neepeɗa sẽetao ome kaebeu kuɓusii.
43 Jesusba ichi baara nibabadaurãmaa jarasii:
—Mʉʉba biawãra machimaa jaraaruu: jãu pẽdrãa chi nejarr barauwãe niiba jomaurãba deapeɗaaɗa audeara deasii.
44 Ãchiba chi ʉ̃rʉ ɓeeɗa deasiɗau, maamina nau wẽra chi nejarr barauwãe niiba koi baita uru ɓuaɗa joma deasii.
