Marcos 13:1-37
13 Jesús Dachi Akõre de mechiuɗebena wãsiiɗe ichi baara nibabadaurãɗebena aɓaba jarasii:
—Jaradeabarii, ¡ichiáse nau mo mechia panuu mauɗe nau de mipitaa koɓee!
2 Mauɗe Jesusba jarasii:
—Biawãra, naarã de mechia koɓee. Nau mo kapeɗaaɗa joma ãriɗai.
3 Maabae Olivo eaɗaa wãsiɗau, Dachi Akõre de mechiu kĩraare. Jesús aria akʉ ɓuasiiɗe Pedroba, Santiagoba, Juanba mauɗe Andresba ãchi du aɓa ichimaa iɗisiɗau:
4 —Daimaa jarase: ¿mau sakaeɗe makaima? ¿Kãareɗeeba kuitaaɗaima mau ewari ʉ̃rʉ ba ɓuu?
5 Mauɗe Jesusba jarasii:
—Kauwa nureásturu aɓau biɗa setaa kũruarãaɗamera.
6 Ãreaba jaraɗai: “Mʉ Dachi Akõreba Dachi Karibabarii deai jaraɗa”. Maka ẽbẽrarã ãrea setaa kũruaɗai.
7 Puuru aɓa aɓau puuru ome chĩobika nuɓuu ũriiduuɗe mauɗe makaɗai ʉ̃rʉbena ũriiduuɗe, wapearã́sturu. Mau joma makai ɓuu. Maamina nau ewari wabiɗa neebai.
8 Drua aɓa aɓau drua ome chĩobika nuɓuai. Mauɗe rey aɓa aɓau rey ome chĩobika nuɓuai. Ioromia druacha baraai mauɗe jarrba baraai. Maamina mau joma chi naa ãrea biꞌiwãe panaɗai, wẽra warr adauruuɗe chi naa pira koɓeebarii kĩra.
9 »Kauwa nureásturu. Machi chi jaradea ua ɓuabadaurãmaa jidau eneeɗapeɗa judiorã araa ãbua imibadau deɗe soaba peɗai. Mʉʉɗe ijãa panuu kakua ãchiba machi chi jaradea ua ɓuabadaurã mauɗe chi reyrã daaɗe adoeɗai. Mauɗe machiba mʉ ʉ̃rʉbena ãchi daaɗe berreaɗai.
10 Maamina nau ewari neei naeɗe chi beɗea bia mʉ ʉ̃rʉbena joma puurucha jaraɗai panuu.
11 Ẽbẽrarãba machi jidau adoeduuɗe jirukaraarã́sturu saka berreaɗai. Mau ʉ̃rʉbena kʉ̃risiarã́sturu. Aɓaburu jarásturu Dachi Akõreba jarabiaruu. Ara machi kʉ̃risiaɗeeba berreaɗaabai, maumaarã machi kakua Dachi Akõre Jauri berreai.
12 »Chi ãbaba ara ichi ãba beabii. Chi akõreba ara ichi warr beabii. Mauɗe chi warrarã ãchi akõrerã ome kĩruɗapeɗa beaɗai.
13 Mʉʉɗe ijãa panuu kakua jomaurãba machi kĩramaaɗai. Maamina chi kaaɗearebena ewariɗaa dauchia jãadua mʉʉɗe ijãa panuubʉrã, Dachi Akõreba mau karibai ichi baara chokae nureaɗamera.
14 »Chi kachirua Dachi Akõreba kʉ̃riakau ichi ɓuabai ɓuumare machiba mau unuuduuɗe Judea druaɗe nuree eaɗaa miru wãɗai panuu.* (Chi karta eɗa jara ɓuuba kãare jara ɓuu kuitaai ɓuu).
15 Mauɗe ẽbẽra ichi de ʉ̃rʉ ɓuu ichi deɗe eɗa neebai ɓuu chi ne kaebea pe adooi baita.
16 Chi uu nuɓuuɗe ɓuuba chi anaɓari jʉ̃barii adauɗe wãabai ɓuu.
17 Mau ewariɗe miichuburi chi wẽrarã warr bara nuree mauɗe warr ju dawa nuree.
18 Dachi Akõremaa ʉtaa iɗísturu kui che ewariɗe makabiamaaba.
19 Mau ewariɗe ẽbẽrarã ãrea biꞌiwãe panaɗai. Dachi Akõreba nau iujãa wausiiɗeeɗebena ẽbẽrarã mau kĩra ãrea biꞌiwãe panaɗaabasii mauɗe nau maaɗakare mau kĩra biꞌiwãe panaɗaabai.
20 Dachi Mechiuba chi mau ewari ɓaꞌãra ɓuɗawãe basirã, ẽbẽra aɓa biɗa chokae panaɗaabai basii. Maamina ichiba mau ewari ɓaꞌãra ɓusii ichiba jʉrʉ adauɗarã kʉ̃ria ɓuabariiɗeeba.
21 »Mauɗeeba aɓauba machimaa jaraaruubʉrã, “Ichiásturu, Dachi Akõreba Dachi Karibabarii deai jaraɗa nama ɓuu”, mau ijãarã́sturu. Mauɗe “Ichiásturu, chawa ɓuu” aaruubʉrã mau ijãarã́sturu.
22 Mau ewariɗe setaa jaraɗai ãchi Dachi Akõreba Dachi Karibabarii deai jaraɗa. Mauɗe waabenarãba setaɗeeba jaraɗai ãchi Dachi Akõre baita berreabadaurã. Maarãba ẽbẽrarãba ne poyaa wauɗakau mechiu wauɗai ẽbẽrarã setaa kũruaɗai baita. Dachi Akõreba jʉrʉ adauɗarã siɗa poyaa setaa kũruapeɗaaɗa basirã, ãchi siɗa setaa kũruaɗai basii.
23 Kauwa nureásturu. Joma mʉʉba machimaa jarasii makai naeɗe.
Chi Ẽbẽra Ba Ɓuaɗa neei ʉ̃rʉbena
Mateo 24:29-44; Lucas 21:25-36
24 »Ẽbẽrarã ãrea biꞌiwãe panapeɗaaɗakare ʉmada pãriui. Jeɗako siɗa pãriui.
25 Pusterrearã bajãaɗebena ɓaeɗai. Joma bajãaɗe ɓee uriɗai.
26 »Mau ewariɗe mʉ, chi Ẽbẽra Ba Ɓuaɗa jʉ̃rʉaraɗe poyaabarii baraa neeruu mauɗe kĩrawãrea baraa neeruu unuɗai.*
27 Mauɗe mʉʉba angelerã drua ɓeecha wãbiai Dachi Akõreba jʉrʉ adauɗarã araa ãbua imibiaɗamera.
28 »Higo bakuru makaɗa ʉ̃rʉbena kuitásturu. Chi bakuru jua tuku nuɓeepeɗa kiruu baraabarii. Mauɗeeba jomaurãba kuitaa panuu iu bia ewari kãꞌãabariwãeɗe neei.
29 Ara mau kĩra mʉʉba jaraɗa unuuduuɗe kuitásturu mʉ neei ewari ʉ̃rʉ bamaa ɓuu, poraaɗe iu ɓuu kĩra.
30 Mʉʉba machimaa biawãra jaraaruu: nau ʉ̃rauɗebena ẽbẽrarã biuɗai naeɗe mau joma makai.
31 Bajãa mauɗe iujãa waa ɓuabai, maamina mʉ beɗea biawãra ewaricha ɓuai.
32 »Maamina aɓau biɗa mau ewari sakaeɗe makai adua panuu. Chi angelerã biɗa mau adua panuu. Mʉ, chi Ẽbẽra Ba Ɓuaɗa biɗa adua ɓuu. Aɓaburu mʉ Chacháburu mau kuitaa ɓuu.
33 »¡Kauwa nureásturu! ¡Dau kuitaa nureásturu!* Machiba chi ewari sakaeɗe neei adua panuu.
34 Mau ewari neeruu nau kĩra ɓuu: ẽbẽra waabena druaɗaa wãaruuɗe chi ichi baita bari trajabadaurã ɓʉibarii ichi de nuɗamera. Ãchicha ne wauɗamera ɓubarii. Chi poraa nubariimaa jarabarii kauwa nu ɓuamera.
35 Ara mau kĩra machia biɗa adua panuu machi De Chibari sakaeɗe waya neei: kiuruuɗe, ẽsabuɗe, eterr biruuruuɗe maebʉrã dapeɗe. Mauɗeeba dau kuitaa nureásturu,
36 etiuɗe mʉ neeruuɗe machi kãi panuu unurãamera.
37 Chi mʉʉba machimaa jara ɓuu jomaurãmaa jara ɓuu: dau kuitaa nureásturu.
Notas
^ 13:14 Chi kachirua Dachi Akõreba kʉ̃riakau. Griego beɗeaɗe chi ɓee kartaɗe nau siɗa ɓʉ kuɓuu: Dachi Akõre baita berreabarii Danielba jaraɗa. Daniel 9:27; 11:31; 12:11. Griego Antioco Epipaneba Dachi Akõre de mechiu miadaa ɓusii 168 años Jesús chi naweba adaui naeɗe. Maamina Jesusba jarasii mau Antiocoba wauɗa kĩra waya makai. Waabenarãmaarã Jesusba jaraɗa biawãra makasii romaɗebenarãba Jerusalén puuru mauɗe Dachi Akõre de mechiu año 70ɗe joma ãrisiɗauɗe. Waabenarãmaarã jara ɓuu chi ẽbẽra kachirua niiba maka waui. 2 Tesalonicenses 2:3-10. Mauɗe waabenarãmaarã Jesusba jaraɗa kaaɗeare ewariɗe makai.
^ Daniel 7:13-14.
^ 13:33 ¡Kauwa nureásturu! ¡Dau kuitaa nureásturu! Griego beɗeaɗe chi ɓee kartaɗe ɓʉ kuɓuu: Ʉtaa iɗii nureásturu.
