Marcos 15:1-47
15 Dapeɗeeɗe paare mechiurã, chi judiorã mechiurã mauɗe chi Moisesba ɓʉɗa jaradeabadaurã, maarã jomaurãba,* ãbua beɗea deasiɗau Jesús Pilatomaa adoeɗai baita.* Ara makʉɗe Jesús jʉ̃ɗapeɗa adoesiɗau.
2 Pilatoba Jesusmaa iɗisii:
—¿Bichi biawãra judiorã reyka?
Jesusba panausii:
—Maerã, ara bichiba jarasii.
3 Mauɗe paare mechiurãba Jesús ne ãrea jideasiɗau.
4 Mauɗeeba Pilatoba wapeaɗeeba waya Jesusmaa iɗisii:
—Ũrise, jãarãba bichi aude jidea panuu. ¿Bichiba panauwẽka?
5 Maamina Jesusba mau siɗa panaubasii. Mauɗeeba Pilatoba kãare kʉ̃risiai adua basii.
Jesús beaɗai baita jarapeɗaaɗa
Mateo 27:15-31; Lucas 23:13-25; Juan 18:38—19:16
6 Mau bari panabadau ewariɗe Pilatoba chi jʉ̃a ɓuaɗaɗebena aɓa enatabachii, chi puuruɗebenarãba iɗipeɗaaɗa.
7 Mauɗe ẽbẽra Barrabás abadau ɓuasii. Mau Barrabás chi kõpaerorã baara puuruɗe kĩrubikasiɗauɗe ẽbẽra mia beasiɗau. Mauɗeeba jʉ̃a uru panasiɗau.
8 Mauɗe ãrea judiorã Pilatomaa neeɗapeɗa iɗi kopaneesiɗau ichiba waubarii waumera.
9 Pilatoba kuitaa ɓuasii paare mechiurãba Jesús jiwaa panuuɗeeba ichi jidau deasiɗau. Mauɗeeba chi aria ãbua imi nuɓuumaa iɗisii:
—¿Machiba kʉ̃ria panuka mʉʉba cha nii judiorã rey ena ɓui?
10 —.
11 Mauɗe paare mechiurãba chi aria ãbua imi nuɓuumaa naka jarasiɗau: “Pilatomaa jarásturu Barrabásturu enatamera”.
12 Mauɗeeba Pilatoba waya ãchimaa iɗisii:
—Makarã machiba judiorã rey abadau ¿mʉʉba saka wauima?
13 Mauɗe ãchiba jĩwa ɓia jara kopaneesiɗau:
—¡Cruzɗe jiraɓu beabise!
14 Pilatoba iɗisii:
—¿Sakãe maka wauima? ¿Ichiba kãare kachirua wausma?
Maka berrea ɓuuɗe waya aude ɓiasiɗau:
—¡Cruzɗe jiraɓu beabise!
15 Pilato ẽbẽrarã ome kachirua ɓeebayua, Barrabás enatasii. Maamina Jesús pebipeɗa kokoroarãmaa deasii cruzɗe jiraɓu beaɗamera.
16 Ara makʉɗe chi kokoroarãba Jesús de mechiu Pretorio abadauɗe eɗa adoesiɗau. Aria waabena kokoroarã joma iukuasiɗau.
17 Maabae anaɓari jʉ̃barii pupuchia ɓuu jʉ̃bisiɗau. Boro jũra ʉri kaɗa jʉ̃ ɓusiɗau.
18 Maabae jĩwa jara kopaneesiɗau:
—¡Ãrea biꞌia nii, judiorã rey!
19 Boromaa bakuruba ubachiɗau. Iɗubachiɗau mauɗe ichi kĩraare õdarrɗe kopaneebachiɗau ichimaa biꞌia berreaduu kĩra.
20 Ichi atua jara kopanuuba kachirua jaraɗapeɗa ãchiba chi anaɓari jʉ̃barii jʉ̃bipeɗaaɗa ẽetasiɗau. Maabae ichi paru waya jʉ̃biɗapeɗa cruzɗe jiraɓuɗe adoesiɗau.
Jesús cruzɗe jiraɓupeɗaaɗa
Mateo 27:32-44; Lucas 23:26-43; Juan 19:17-27
21 Jesús puuru awara adoesiɗauɗe ẽbẽra Simón abadau Jerusalenɗaa neeruu basii. Mau Alejandro mauɗe Rufo akõre basii.* Mau Cirene puuruɗebena basii. Kokoroarãba ichimaa Jesús cruz adoebisiɗau.
22 Maka Jesús drua Gólgota abadaumaa adoesiɗau. Gólgota jara ɓuu: «Dachi Boro Ɓʉʉrʉ».
23 Aria uva ɓaa orekea mirra baara peraɗa Jesusmaa deasiɗau chi puꞌua aribiabiɗai baita. Maamina Jesusba doobasii.
24 Maabae cruzɗe jiraɓusiɗau. Mau maaɗakare ne jemenesiɗau Jesús paru kaiba adauɗai kuitaaɗai baita.
25 Mau dapeɗe las 9ɗe ichi cruzɗe jiraɓusiɗau.
26 Chi ɓʉɗaɗe ichi sakãe biui ɓuu ʉ̃rʉbena naka ɓʉ nuɓusii: «Judiorã Reybʉ».
27 Aria nechirurã siɗa ome cruzɗe jiraɓusiɗau, aɓa Jesús jua biare, aɓa jua sordoare.
28 [Mau makasii Dachi Akõre Beɗeaɗe ɓʉɗa kĩra:
«Kachirua waubadaurã baara ãbua nuɓusiɗau».]*
29 Chi arare wãaduuba ãchi boro bʉraaduuba Jesusmaa naka kachirua jajarabachiɗau:
—¡Ay, Bichiba Dachi Akõre de mechiu ãripeɗa ewari õbeaɗe waya poyaa wauruubʉrã, ¡biawãra bichi du aɓa karibase! ¡Jãu cruzɗebena eɗaa uruse!
30 —.
31 Ara mau kĩra paare mechiurãba mauɗe Moisesba ɓʉɗa jaradeabadaurãba Jesús atua jajarabachiɗau:
—Jãuba waabenarã karibasii, maamina ara ichi du aɓa poyaa karibawẽe.
32 Jãu Dachi Akõreba Dachi Karibabarii deai jaraɗa, jãu Israelɗebena Rey, cruzɗebena eɗaa uruubʉrã makarã ijãaɗai.
Chi ichi jãkaa jira panaɗa biɗa ichi ʉ̃rʉbena kachirua berreabachiɗau.
Jesús cruzɗe biuɗa
Mateo 27:45-56; Lucas 23:44-49; Juan 19:28-30
33 Ʉmada jipaɗebena ʉmada ɓaare baaruuɗaa joma pãriu nuɓeesii.*
34 Ãsa ʉ̃rʉ õbea baaruuɗe Jesusba jĩwa jarasii: «Eloi, Eloi, ¿lama sabactani?»
Mau arameo beɗeaɗe jara ɓuu: «Chacha, Chacha, ¿Sakãe mʉ ida ɓuisma?»
35 Mau beɗea ũriiduuɗe chi nuree aria duanuuba jarasiɗau:
—Ũrísturu! Dachi Akõre baita berreabarii Elías iumaa ɓuu.
36 Mauɗe mukĩra aɓa isa pira wãpeɗa uva ɓaa orekea modaa ɓuumaa ɓekeapeɗa adoesii. Bakuruɗe jʉ̃peɗa Jesusmaa deasii domera. Maabae jarasii:
—Ida ɓústuru, ichiaɗai baita Eliasba cruzɗebena eɗaa adauɗe neei kuitaa.
37 Maka ɓuuɗe Jesús jĩwa ɓiapeɗa biusii.
38 Mauɗe Dachi Akõre de mechiuɗe eɗa chi piezaɗe paru eaɓari jiraɓu ʉtʉʉba eɗaa ẽsa kõa urusii.*
39 Kokoroarã jaradea ua ɓuabarii Jesús kĩraare akʉ nuɓuaɗaba ichi maka biumaa ɓuu unusiiɗe, jarasii:
—¡Biawãra, nau mukĩra Dachi Akõre Warr basii!
40 Chi nuree wẽrarã aria duanaɗaba kaitawẽeba ichiamaa panasiɗau: María Magdalena, Salomé mauɗe chi aɓau María. Mau Santiago (chi kũudrãa) mauɗe José nawe basii.
41 Jesús Galilea druaɗe nibasiiɗe, maarã wẽrarãba ichi nubachiɗau. Mauɗe chi ichi baara Jerusalenɗaa neepeɗaaɗarã wẽrarã ãrea panasiɗau.
Jesús jau ɓuɗa
Mateo 27:57-61; Lucas 23:50-56; Juan 19:38-42
42 Norema bari panabadau ewari basii. Mau ewari baita chi judiorãba ne wau panasiɗau. Kewaraa baaruuɗe,
43 José Arimatea puuruɗebena Pilatomaa wapeawẽa iɗiɗe wãsii Jesús jau ɓui baita. Mau judiorã chi jaradea ua ɓuabadaurãɗebena aɓa chi aude mechiu basii mauɗe kʉ̃ria ɓuasii Dachi Akõreba ichiɗirã ichi juaɗe ua ɓuamera.
44 Pilatoba Jesús isa biusii ijãabasii. Mauɗeeba chi kokoroarã jaradea ua ɓuabarii iupeɗa, maumaa iɗisii Jesús biawãra biusii kuitaai baita.
45 Maabae mauba Jesús biusii asiiɗe, Pilatoba Josemaa chi Jesús eɗaa adáubaɗe asii.
46 Maabae Joseba paru torr nedopeɗa chi Jesús kakua cruzɗebena eɗaa adaupeɗa, mau paru torrɗe bʉra adausii. Maabae mo choɓea koroɗaɗe eɗa jau ɓupeɗa, mo mechiuba chi eɗa wãbariimare bʉraa kuɓusii.
47 María Magdalenaba mauɗe José nawe Mariaba Jesús aria ɓuuduu unusiɗau.*
Notas
^ 15:1 Maarã jomaurãba. Griego beɗeaɗe naka ɓʉ kuɓuu: Sanedrín.
^ 15:1 Pilato. Romaɗebena chi aude mechiu Tiberio abadauba Pilato Judea druaɗebena chi karr ɓusii, año 26ɗebena aɓa 36ɗaa. Judiorã mechiurãba Jesús Pilatomaa adoesiɗau chi jʉ̃a panuurã beaɗakau panuuɗeeba. Aɓa romaɗebenarãba maka wauɗai panasiɗau.
^ Romanos 16:13.
^ 15:28 Griego beɗeaɗe chi ɓee kartaɗe versículo 28 wãꞌãe. Isaías 53:12.
^ Amós 8:9-10.
^ Éxodo 26:31-33; Hebreos 9:1-15.
^ 15:47 José. Nau José chi Jesús kakua Pilatomaa wãpeɗa iɗiɗawãebʉ, maumaarã junebena Santiago ãbabʉ. Marcos 15:40; 16:1.
