Marcos 16:1-20
16 Bari panabadau ewari wãsiiɗe María Magdalenaba, Santiago nawe Mariaba mauɗe Salomeba kera nedosiɗau Jesús puruɗai baita.
2 Misaɗe dapeɗeeɗe, ara ʉmada awara neeruuɗe, ãchi Jesús jau ɓupeɗaaɗamaa wãsiɗau.
3 Mauɗe naka jara nibasiɗau: «¿Jãu mo mechiu choɓea jʉ̃a kuɓuu kaiba dachi baita ãyaa bʉraaima?»
4 Maamina araa ichiaduuɗe chi mo mechiu jʉ̃a kuɓuaɗa ãyaa bʉraa kuɓuu unusiɗau.
5 Ara makʉɗe choɓeaɗe eɗa wãaduuɗe kũudrãa ãchi jua biare akʉ ɓuu unusiɗau. Mauba paru torroa jʉ̃ nibasii. Mau kakua wẽrarã perasiɗau.
6 Mau kũudrãaba ãchimaa jarasii:
—Perarã́sturu. Machiba Jesús Nazaretɗebena cruzɗe jiraɓupeɗaaɗa jʉrʉ panuu. Mau chokae jiradusii. Chi jau ɓupeɗaaɗamaa ichiásturu. Nama ɓuuwãe.
7 Jaraɗe wã́sturu chi ichi baara nibabadaurãmaa mauɗe Pedromaa, Jesús ãchi naa Galilea druaɗaa wãaruu. Aria ichi unuɗai ichiba naeɗe jaraɗa kĩra.*
8 Mauɗe pera panuuba kakua urisiɗau. Ara makʉɗe wẽrarã Jesús jau ɓupeɗaaɗa choɓeaɗebena pira wãsiɗau. Wapeaɗeeba aɓaumaa biɗa jaraɗaabasii.*
Jesusba María Magdalenamaa unubiɗa
Juan 20:11-18
9 Misa dapeɗeeɗe Jesús chokae jiradupeɗa naa María Magdalenamaa unubisii. Mau wẽra kakuaɗebena Jesusba naeɗe jai kachiruarã 7 duabʉika ɓuasii.
10 Maabae María chi Jesús baara nibapeɗaaɗarãmaa chi angelba jarabiɗa jaraɗe wãsii. Ichi neesiiɗe ãchi kĩra nomaa jẽa panasiɗau.
11 Maamina Mariaba Jesús chokae nii unusii a jarasiiɗe, ãchiba mau ijãaɗaabasii.
Jesusba ichi baara nibabadau omemaa unubiɗa
Lucas 24:13-35
12 Mau maaɗakare Jesús baara nibabadaurã ome puuru awara nibasiɗau. Maarãmaa Jesusba ichi kĩra awara unubiasii.
13 Ãchi waya wãɗapeɗa waabenarãmaa jarasiɗau. Maamina wabiɗa ijãaɗaabasii.
Jesusba chi ichi baara nibabadaurãmaa unubiaɗa
Mateo 28:16-20; Lucas 24:36-44; Juan 20:19-23
14 Mau maaɗakare chi Jesús baara nibabadaurã 11 komaa panuuɗe, Jesusba ichi unubiasii. Ãchi sõ chaareaɗeeba ijãaɗaabasiiɗeeba mauɗe chi ichi chokae jiraduɗa unupeɗaaɗaba ãchimaa jaraɗa ijãaɗaabasiiɗeeba ichiba ãchi iadaasii.
15 Maabae Jesusba ãchimaa jarasii: «Druacha wãɗapeɗa chi beɗea bia mʉ ʉ̃rʉbena jomaurãmaa jarásturu.
16 Mau beɗea ijãaduubʉrã mauɗe boro eaduubʉrã Dachi Akõreba mau karibai. Maamina chi mau beɗea ijãawẽe ichiba mau kastikai.
17 Chi mʉʉɗe ijãa nureeba nau ẽbẽrarãba ne poyaa wauɗakau wauɗai: mʉ trʉ̃ɗeeba jai kachiruarã duabʉiɗai mauɗe beɗea wiɗiɗe berreaɗai.
18 Ãchi juaba dama jidauɗai. Nearãa dooduubʉrã mauba kachirua waubai. Mauɗe chi ẽpermo nuree ʉ̃rʉ ãchi jua kuɓuuduuɗe aribiabiaɗai».
Jesús bajãaɗaa adoeɗa
Lucas 24:50-53
19 Maka jarasiiɗe Dachi Akõreba Dachi Mechiu Jesús bajãaɗaa adoesii. Aria ichi jua biare akʉ ɓeesii.
20 Maabae chi Jesús baara nibabadaurãba ichi beɗea ãchi wãaduumaacha jarasiɗau. Dachi Mechiuba ãchi aiɗabachii. Ẽbẽrarãba poyaa ne wauɗakau waubi ɓuuɗeeba kuitaabiabachii ãchiba jara panuu biawãra ɓuu.
