Marcos 2:1-28
2 Kãꞌãabariwãeɗe Jesús waya Capernaum puuruɗaa wãsii. Ichi deɗe ɓuu kuitaasiɗauɗe ẽbẽrarã ãrea ichimaa pĩchua koɓeesii. Mauɗe chi poraareeba eɗa wãi siɗa wãꞌãe basii. Mauɗe Jesusba Dachi Akõre beɗea jaradea ɓuasii.
2 —.
3 Maka ɓuuɗe ẽbẽrarã kimare neesiɗau. Ẽbẽra ɓakara bʉʉ nii Jesusmaa adoeduu inibasiɗau.
4 Maamina pĩchua kuɓuuɗeeba poyaa Jesusmaa adoeɗaabasii. Mauɗeeba de ʉ̃rʉare choɓea uyaɗapeɗa chi ɓakara bʉʉ nii chi jira adoebadauɗe mama eɗaa bʉisiɗau.
5 Jesusba unusii ãchiba biawãra ijãa panuu chi ɓakara bʉʉ nii poyaa aribiabii ɓuu. Mauɗeeba Jesusba ichimaa jarasii:
Kũudrãa, bichiba kachirua wauɗa mʉʉba perdonasii.
6 Mauɗe Moisesba ɓʉɗa jaradeabadaurã chi nuree aria akʉ panasiɗau. Maarãba kʉ̃risiasiɗau:
7 «¿Nau sakãe jãka berrea ɓuma? ¡Dachi Akõre daaɗe kachirua berrea ɓuu! Aɓa Dachi Akõréburu ẽbẽraba kachirua wauɗa poyaa perdonabarii».
8 Ãchiba maka kʉ̃risia panuu Jesusba ichi sõɗe kuitaasii. Mauɗeeba ãchimaa jarasii:
«¿Sakãe machi sõɗe jãka kʉ̃risia panuma?
9 Machimaarã, ¿chi ɓakara bʉʉ niimaa jarai baita sãu bari au ɓuma: “Bichi kachirua wauɗa perdonasii ai maebʉrã nau ẽbẽra ɓakara bʉʉ nii jiradubipeɗa bichi jira adoebadau adoepeɗa nibabii?”
10 Dachi Akõreba mʉ, chi Ẽbẽra Ba Ɓuaɗa ɓusii nau iujãaɗe duanuuba kachirua waubadau perdonabiamera. Mau machimaa unubiai».
Ara makʉɗe chi ɓakara bʉʉ niimaa naka jarasii:
11 —Jiraduse. Chi bichi jira adoebadau adaupeɗa deeɗaa wãse.
12 Ara makʉɗe chi ɓakara bʉʉ ɓuaɗa jiradupeɗa ichi jira adoebadau adaupeɗa jomaurã daaɗe wãsii. Mauɗeeba jomaurãba kuitaa kʉ̃risiaɗaabasii mauɗe Dachi Akõremaa biꞌia berrea duaneesiɗau. Naka jarasiɗau:
—¡Nau kĩra dachiba unuɗaka basii!
Jesusba Leví iuɗa
Mateo 9:9-13; Lucas 5:27-32
13 Mau maaɗakare Jesús waya Galilea marɗaa wãsii. Mauɗe ẽbẽrarã ãrea ichimaa wãsiɗau. Ichiba maarãmaa jaradeasii.
14 Wãaruuɗe Jesusba Alfeo warr Leví unusii. Mau Leví Romaɗebena chi aude mechiu nii baita chi nejarra deabadau deɗe akʉ ɓuasii. Jesusba ichimaa jarasii: «Mʉ ome wãse».
Ara makʉɗe Leví jiradupeɗa Jesús ome wãsii.
15 Mau maaɗakare Jesús chi ichi baara nibabadaurã baara Leví deɗe koɗe wãsiɗau. Ãrea chi Romaɗebena baita chi nejarra pebadaurã mauɗe kachirua waubadaurã* aria akʉ panasiɗau, ãchi siɗa Jesús baara nibabachiɗauɗeeba.
16 Maka panuuɗe Moisesba ɓʉɗa jaradeabadaurã (maarã siɗa fariseorã basma), maarãba Jesús jãarã ẽbẽrarã baara komaa ɓuu unusiɗau. Mauɗeeba fariseorãba Jesús baara nibabadaurãmaa iɗisiɗau:
—Machi jaradeabarii ¿sakãe Romaɗebena baita chi nejarra pebadaurã mauɗe kachirua waubadaurã baara komaa ɓuma?
17 Mau ũripeɗa Jesusba jarasii:
—Chi ẽpermowãe nureeba ʉrrmiɗia deabarii jʉrʉɗakau. Maumaarã chi ẽpermo nuréburu jʉrʉbadau. Mʉ, chi jipa nuree iui baita neeɗawãe, maumaarã chi kachirua waubadaurã́turu iui baita nee ɓuu Dachi Akõremaa neeɗamera.
Chiko koɗakau ewari ʉ̃rʉbena
Mateo 9:14-17; Lucas 5:33-34
18 Mau ewariɗe Juan chi Boro Eabarii baara nibabadaurãba mauɗe fariseorãba chiko koɗakau ewari wau panasiɗau. Maka panuuɗe waabenarã Jesusmaa neeɗapeɗa iɗisiɗau:
—Juan chi Boro Eabarii baara nibabadaurãba mauɗe fariseorãba chiko koɗakau ewari waubadau. Maamina bichi baara nibabadaurãba ¿sakãe maka wauɗakama?
19 Jesusba panausii:
—Kãibadau kĩrajʉʉ ewari wau ɓuuɗe ¿kaiba chiko koɗakau ewari wauima? Mau mukĩra wabiɗa ichiba iuɗarã baara ɓuumisa chiko koɗakau ewari wauɗaabai.
20 Maamina ewari aɓaɗe waabena ẽbẽrarãba ichi ãyaa adoeɗai. Mau ewariɗéburu ichiba iuɗarãba chiko koɗakau ewari wauɗai.
21 Aɓau biɗa paru wiɗiɗebena ɓaꞌãra tõobai, paru soremaa kaapirui baita. Makaaruubʉrã, chi paru wiɗi araa chiraduuruuba chi paru sore aude kõai.
22 Mauɗe aɓau biɗa uva ɓaa wiɗi ãnimara e wauɗa chi soreɗe tʉɗakau. Maka wauduubʉrã ɓaaka koɓeeruuɗe chi ãnimara e wauɗa chi sore tojĩidrʉi. Maabae chi uva ɓaa eawãi, mauɗe chi ãnimara e wauɗa ãrii. Mauɗeeba uva ɓaa wiɗi ãnimara e wauɗa wiɗiɗe tʉɗai panuu.*
Jesús chi bari panabadau ewari chibaribʉ
Mateo 12:1-8; Lucas 6:1-5
23 Bari panabadau ewariɗe Jesús drua trigo uuɗaɗe nibasii. Mauɗe ichi baara nibabadaurãba chi trigo kuma aɓa ẽe kãribasiɗau chi taa koɗai baita.
24 Mauɗeeba fariseorã ãchimaa needuuba Jesusmaa jarasiɗau:
—Ichiáse, bichi baara nibabadaurãba ¿sakãe bari panabadau ewariɗe chi dachiba wauɗakau ɓuu maka wau panuma?
25 Jesusba ãchimaa jarasii:
—¿Dachi Akõre beɗea ɓʉɗaɗe eɗa jaraɗawẽa panuka? Ewari aɓaɗe Davidba mauɗe ichi baara nibabadaurãba koɗawẽa panasiɗau. Jarrbisia panasiɗauɗe ¿kãare wausiɗama?*
26 Abiatar paare mechiu ɓuasiiɗe David Dachi Akõre deɗe eɗa wãpeɗa, chi Dachi Akõre baita kuɓuaɗa pan adausii.* Mau pan ¿aɓa paarerã́buru koɗai panaswãeka? Maamina Davidba kopeɗa ichi baara nibabadaurãmaa deaɗakasii.
27 Maabae Jesusba ãchimaa jarasii:
—Dachi Akõreba ẽbẽra waubasii bari panabadau ewari nuɗamera maumaarã bari panabadau ewari ɓusii ẽbẽrarã kʉrrjĩruɗamera.
28 Mʉ, chi Ẽbẽra Ba Ɓuaɗa bari panabadau ewari Mechiubʉ.
