Marcos 3:1-35
3 Waya Jesús judiorã araa ãbua imibadau deɗe wãsii. Aria ẽbẽra jua bʉʉ nii ɓuasii.
2 Chi nuree waabenarãba Jesús ichia panasiɗau bari panabadau ewariɗe mau ẽbẽra aribiabii kuitaa. Aribiabiɗa basirã kachirua jaraɗai kʉ̃risia panasiɗau.
3 Mauɗe Jesusba chi ẽbẽra jua bʉʉ niimaa naka jarasii:
—Jiradupeɗa ẽsa ʉkʉ nuɓuaɗe neese.
4 Maabae Jesusba ãchimaa iɗisii:
—¿Bari panabadau ewariɗe kãare wauɗai panuma? ¿Chi bia maebʉrã chi kachirua? ¿Waabenarã karibai maebʉrã ida biubiaika?
Maamina ãchi chũpea paneesiɗau.
5 Mauɗe Jesús jirukaraasii sõ chaarea nureeɗeeba. Nomaa kĩru kuɓuuba ãchi ichiapeɗa chi jua bʉʉ niimaa jarasii:
—Jua jiwaase.
Maka jiwaaruuɗe ichi jua biꞌia diɗisii.
6 Ara makʉɗe chi fariseorã awara wãsiɗauɗe, Herodesɗebenarã baara araa ãbua imiɗapeɗa, berreasiɗau saka Jesús beaɗai baita.
Galilea mar iikaa duanaɗa
7 Maabae Jesús ichi baara nibabadaurã ome Galilea marɗaa wãsiɗauɗe, aria Galilea druaɗebenarã ãrea ichi baara nibasiɗau.*
8 Jesusba ẽbẽrarãba ne poyaa wauɗakau wau ɓuu waabenarã biɗa ũriɗapeɗa, Judea druaɗebenarã, Jerusalén puuruɗebenarã, Idumea druaɗebenarã, Jordán do kĩaraabenarã, Tiro druaɗebenarã mauɗe Sidón druaɗebenarã Jesús ɓuumaa wãsiɗau.
9 Ichiba ẽpermo nuree aribiabiaɗaɗeeba ẽbẽrarãba ichi wauɗayua pĩchua imisiɗau. Ichi pĩchua uru panarãaɗamera Jesusba ichi baara nibabadaurãmaa jarasii jãba adoeɗamera.
10 —.
11 Ẽbẽra jai kachirua bara nureeba Jesús unuuduuɗe ichi daaɗe õdarrɗe kopaneeɗapeɗa wapeaɗeeba jĩwa jarasiɗau: «¡Bichi Dachi Akõre Warrbʉ!»
12 Maamina Jesusba jai kachiruarãmaa iadaakuabachii ichi ʉ̃rʉbena arakʉɗe jararãaɗamera.
Jesusba ẽbẽrarã 12 jʉrʉ adauɗa
Mateo 10:1-4; Lucas 6:12-16
13 Mau maaɗakare Jesús eaɗaa wãpeɗa ichiba kʉ̃riaruu iukuasii. Chi maarã neesiɗauɗe,
14 12 jʉrʉ adaupeɗa, «ichiba bʉiɗarã» duanusii, ichi baara nibaɗamera mauɗe ichi beɗea jara nibaɗamera.*
15 Jesusba ãchimaa poyaabarii deaɗakasii ẽpermo nuree aribiabiɗamera mauɗe jai kachirua siɗa duabʉiɗamera.
16 Chi ichiba 12 panuu duanuɗa naarãbʉ: Simón (Jesusba Pedro trʉ̃aɗa).*
17 Zebedeo warr Santiago mauɗe chi ãba Juan. Mau omeɗebena Jesusba trʉ̃ jarasii Boanerges, mau trʉ̃ «bã warrarã» jara ɓuuɗeeba.
18 Naarã siɗa duanusii: Andrés, Felipe, Bartolomé, Mateo, Tomás, Alfeo warr Santiago, Tadeo mauɗe Simón Cananeo.*
19 Jesusba Judas Iscariote siɗa bʉisii, chi ichi jidaubiɗa.
Jesús kachirua jarapeɗaaɗa
Mateo 12:22-32; Lucas 11:14-23; 12:10
20 Jesús deeɗa eɗa neesiiɗe waya ẽbẽrarã ãrea pĩchuka koɓeesiɗau. Mauba Jesús mauɗe ichi baara nibabadaurã chiko poyaa koɗaabasii.
21 Jesús ãbarãba mau kuitaasiɗauɗe ichi adoeɗai baita neesiɗau ichi kĩranema ɓuu a jarasiɗauɗeeba.
22 Maamina Moisesba ɓʉɗa jaradeabadaurã Jerusalén puuruɗebena neepeɗaaɗaba jarasiɗau:
—Jãu Jesús jãka ɓuu, jai kachiruarã karr Beelzebuba wara ɓuuɗeeba. Ichiba jai kachirua duabʉibarii Beelzebuba mau poyaabarii deasiiɗeeba.
23 Mau ũripeɗa Jesusba ãchi iukuapeɗa naka nebʉrʉsii: «¿Saka Satanasba ara ichi duabʉiima?
24 Araɓau druaɗebenarã ara ãchi chiya chĩo panaaduubʉrã waa panaɗaabai.
25 Mauɗe araɓau deɗe chi ẽbẽrarã ãchi chiya chĩo panaaduubʉrã ãrea panaɗaabai.
26 Ara mau kĩra Satanás ara ichi jai kachiruarã ome chĩopeɗa ãchi kakawaa wãaduubʉrã waa poyaa panaɗaabai. Mau ara mamauɗaaburu ɓuai.
27 »Mauɗe ẽbẽra dadarraa nii naa jʉ̃wẽebʉrã, ¿saka ichi deɗe eɗa nechiruaɗe wãima? Aɓa maka jʉ̃ nuɓuuruubʉrã poyaa chiruai ɓuu.
28 »Biawãra mʉʉba machimaa jaraaruu: ẽbẽrarãba kachirua waubadau mauɗe kachirua berreabadau Dachi Akõreba joma perdonai.
29 Maamina aɓaba Dachi Akõre Jauri ʉ̃rʉbena kachirua berrearuubʉrã, Dachi Akõreba mau perdonaabai. Mau ẽbẽra ewaricha nebʉraɗe ɓuai».
30 Jesusba maka jarasii ichi jai kachirua uru ɓuu apeɗaaɗaɗeeba.
Jesús ẽbẽrarã ichimaa neepeɗaaɗa
Mateo 12:46-50; Marcos 3:21; Lucas 8:19-21
31 Mauɗe Jesús ãbarã, chi nawe baara neesiɗau. Maamina awara paneeɗapeɗa Jesús iubisiɗau ãchimaa awara wãmera.
32 Maabae ẽbẽrarã Jesús jãkaa akʉ panaɗaba jarasiɗau:
—Bichi nawe mauɗe bichi ãbarã awara panuu.* Maarãba bichi jʉrʉ panuu.
33 Maamina Jesusba jarasii:
—Machimaarã ¿kai mʉ nawe mauɗe mʉ ãbarãma?
34 Ichi kaita akʉ ɓeemaa ichiapeɗa jarasii:
—Cha duanuu mʉ nawe mauɗe mʉ ãbarãbʉ.
35 Chi Dachi Akõreba kʉ̃ria ɓuu waubadaurã mʉ ãbarãbʉ, mʉ neekaurãbʉ mauɗe mʉ nawebʉ.
Notas
^ 3:7 Griego beɗeaɗe chi ɓee kartaɗe nau siɗa ɓʉ kuɓuu: Judeaɗebenarã siɗa.
^ 3:14 Ichiba bʉiɗarã. Griego beɗeaɗe chi ɓee kartaɗe mau wãꞌãe.
^ 3:16 Griego beɗeaɗe chi ɓee kartaɗe nau siɗa ɓʉ kuɓuu: Naarã 12 panuu adoesii.
^ 3:18 Simón Cananeo. Lucasba naka ɓʉ kuɓuu: Simón Celote. Lucas 6:15.
^ 3:32 Griego beɗeaɗe chi ɓee kartaɗe naka ɓʉ kuɓuu: Bichi neekaurã.
