Marcos 4:1-41
4 Waya Jesusba Dachi Akõre beɗea mar iikaa jaradea koɓeesii. Mauɗe ẽbẽrarã ãrea ichimaa pĩchuka koɓeesii. Mauɗeeba Jesús jãba marɗe nuɓuuɗe eɗa wãpeɗa maabae akʉ ɓeesii. Ẽbẽrarã ibuɗe mar iikaa duaneesiɗau.
2 Maabae Jesusba ne aꞌawaraa nebʉrʉ jarasii. Naka jarasii:
3 «¡Ũrísturu! Ẽbẽra aɓa netaa poɗe wãsii.
4 Maka po kãriiɗe chi ɓee netaa oɗe ɓaesiɗau. Maabae ibanarã neeɗapeɗa pemikuasiɗau.
5 Chi ɓee netaa mokara iɗaaɗe ɓaesiɗau. Chi ioro nausãa ɓuuɗeeba mau netaa isa tonosii.
6 Maamina pisiaba bʉʉsiɗau chi karr ãrea wãꞌãe ɓuasiiɗeeba.
7 Mauɗe chi ɓee netaa ʉri iɗaa ɓuuɗe ɓaesiɗau. Aria tonoɗapeɗa jʉ̃kara ʉri iɗaa ɓuuba bʉra kenasii. Mauba poyaa chauɗaabasii.
8 Maamina chi waabenarã netaa ioro biaɗe ɓaesiɗau. Mau tonoɗapeɗa, wariɗapeɗa ãrea chausiɗau. Chi nuree netaa aɓaɗebena 30 deasii, 70 maebʉrã 100 ».
9 Maabae Jesusba jarasii: «Chi kʉʉrʉ bara niiba kauwa ũrise».
Jesusba ¿sakãe chi nebʉrʉ jarasma?
Mateo 13:10-17; Lucas 8:9-10
10 Ẽbẽrarã wãsiɗauɗe Jesús baara nibabadaurã 12 panuuba mauɗe waabenarã ichi jãkaa panuuba iɗisiɗau ichiba nebʉrʉɗa jaradeaɗa ʉ̃rʉbena.
11 Jesusba panausii: «Dachi Akõreba ichiɗirã ichi juaɗe ua ɓuu ʉ̃rʉbena jomaurãmaa kuitaabiawẽa ɓumina machimaa kuitaabia ɓuu. Maamina waabenarãmaa mʉʉba nebʉrʉʉruuba berrea ɓuu,
12 “ãchiba ichia panumina unurãaɗamera,mauɗe ũri panumina kauwa ũrirãaɗamera.Maka nureaɗaabasirã Dachi Akõremaa neeɗapeɗa ãchiba kachirua waubadau perdonai basii”*».
Jesusba chi mau nebʉrʉɗa ʉ̃rʉbena jaradeaɗa
Mateo 13:18-23; Lucas 8:11-15
13 Mauɗe Jesusba ãchimaa jarasii: «¿Machiba chi mau nebʉrʉɗa ũriɗawẽka? Makarã ¿sakãe chi waabenarãba mau ũriɗaima?
14 Ũrísturu. Netaa pobarii Dachi Akõre beɗea jarabarii kĩra nii.
15 Netaa oɗe ɓaeɗa chi Dachi Akõre beɗea ũribadaurã kĩra nuree. Mau beɗea ũri panuu, maamina ara makʉɗe Satanás mau beɗea ãchi sõɗe neeɗa wãꞌãebibarii.
16 Netaa mo iɗaa ɓuuɗe poɗa nau jara ɓuu: waabenarã ẽbẽrarãba Dachi Akõre beɗea ũriɗapeɗa ãrea kĩrajʉʉ ũribadau.
17 Maamina ãrea chi karr jidauɗawẽa nureeɗeeba ãrea dauchia jãadua panaɗakau. Ewari kachirua ɓaeruuɗe maebʉrã Dachi Akõre beɗea ijãa panuu kakua ẽbẽrarãba kachirua wauduuɗe ãchiba ijãa panuu ida ɓubadau.
18 Netaa ioro ʉri iɗaa ɓuuɗe poɗa nau jara ɓuu: chi nuree ẽbẽrarãba Dachi Akõre beɗea ũribadau.
19 Maamina nau saka biꞌia panaɗai baita ãrea kʉ̃risia panabadau, ne joma uru panabadau mauɗe ne kaebea maucha ãrea kʉ̃riabadau. Joma mauba Dachi Akõre beɗea waa ũribiaɗakau mauɗe ne bia waubiaɗakau.
20 Maamina netaa ioro biaɗe poɗa nau jara ɓuu: waabenarãba Dachi Akõre beɗea bia ũriɗapeɗa ijãabadau. Maabae chi nureerãba biꞌia waubadau Dachi Akõre baita, waabenarãba aude biꞌia waubadau mauɗe waabenarãba aude biꞌia ãrea waubadau».*
Ʉ̃ɗaa koabarii ʉ̃rʉbena nebʉrʉɗa
Mateo 5:15; Lucas 8:16-18
21 Jesusba maucha nebʉrʉsii: «Dachiba ʉ̃ɗaa koabarii eneebadaka ¿cajón ekare mera nuɓuɗai baita maebʉrã kʉɗa ekare nuɓuɗai baita? Makawãema, ne kaebea ʉ̃rʉ ʉtʉ nuɓubadau.
22 Ara mau kĩra ne meraɗa jãaɗakare mau unui. Chi dachiba kuitaaɗawẽa panuu jãaɗakare Dachi Akõreba mau joma kuitaabiai.
23 Chi kʉʉrʉ bara niiba kauwa ũrise».
24 Mau awara Jesusba jarasii: «Mʉʉba jaradea ɓuu kauwa ũrísturu. Chi aɓau biꞌiawãe ɓuu a jarabadau kĩra, ara mau kĩra Dachi Akõreba machi biꞌiawãe panuu ai mauɗe machimaa aude kuitaabiai.
25 Aɓauba biawãra kuitaaruubʉrã, Dachi Akõreba aude kuitaabii. Maamina chi adua niiba ne kuitaa ɓuu kʉ̃risiaruubʉrã ichiba kʉ̃risia ɓuu Dachi Akõreba mau juakaa adaui».
Netaa waribarii ʉ̃rʉbena nebʉrʉɗa
26 Mauɗe Jesusba jarasii:
—Dachi Akõreba ichiɗirã ichi juaɗe ua ɓuu chi ioroɗe netaa pobarii kĩra ɓuu.
27 Ẽsabuɗe ẽbẽra kãi nuɓuumisa mauɗe ãyadaa chokae ɓuumisa, chi netaa tonopeɗa waribarii. Chi poɗaba saka waribi ɓuu kuitaakamina, makabarii.
28 Ioroɗe ara istu chaubarii. Naa tonobarii. Maabae ikupeɗa, otopeɗa, ãrea chaubarii.
29 Maabae chi netaa poa koɓeeruuɗe ẽbẽraba nekoba totabarii, chi ewari basiiɗeeba.
Mostaza taa ʉ̃rʉbena nebʉrʉɗa
Mateo 13:31-32,34-35; Lucas 13:18-19
30 Mauɗe Jesusba jarasii: «Dachi Akõreba ichiɗirã ichi juaɗe ua ɓuu ¿kãare kĩra ɓuma? ¿Kãare nebʉrʉʉruuba mʉʉba kuitaa jaraima?
31 Mostaza taa kĩra nii. Mau mostaza taa joma dachiba uubadau audeara kaebeara nii.
32 Maamina uuɗakare, waabenarã netaa audeara mechia waribarii. Chi bakuru jua mechia wariiruuɗe ibana chi bakuru juaɗe de waubadau».
33 Maka nebʉrʉʉruuba Jesusba jaradeabachii ẽbẽrarãba poyaa ũriɗaibia.
34 Nebʉrʉʉruuwãebʉrã, jaradeaka basii. Maamina ichi baara nibabadaurã ãchi du aɓa panuuɗe joma kuitaa jarabachii.
Jesusba pũaturã mauɗe mar mechiu apiibiɗa
Mateo 8:23-27; Lucas 8:22-25
35 Mau ewariɗe kiusiiɗe Jesusba ichi baara nibabadaurãmaa jarasii:
—Mar kĩaraa wãɗa.
36 Ara makʉɗe ãchiba ẽbẽrarã aria panuu ɓʉiɗapeɗa Jesús ara ichi ɓuu jãbaɗe kĩaraa adoesiɗau. Waabenarã ẽbẽrarã siɗa junebena jãbaɗe wãsiɗau.
37 Maka mar kĩaraa wãaduuɗe chi pũatu mimichia pũa koɓeesii mauɗe mar ʉ̃rapeba chi jãbamaa mechia wãkarãaɗeasii. Mauɗeeba chi jãba taawãmaa ɓuasii.
38 Mauɗe Jesús chi jãba druɗe borokaumaa sĩu kãi nuɓuasii. Mauɗeeba ichi baara nibabadaurãba ʉ̃rʉmaɗapeɗa naka jarasiɗau:
—Jaradeabarii, ¿bichimaarã dachi ʉ̃yaba jãri biuɗai bia ɓuka?
39 Maabae Jesús jiradupeɗa pũatu mauɗe do ʉ̃rapemaa iadaasii:
—¡Chũpease! ¡Apiise!
Ara makʉɗe pũatuwẽa diɗisii. Joma apii nuɓeesii.
40 Maka ɓuuɗe Jesusba ãchimaa jarasii:
—Machi ¿sakãe wapea panuma? ¿Dachi Akõreɗe wabiɗa ijãaɗawẽa panuka?
41 Maamina Jesusba wauɗa kakua ãchi ãrea wapeasiɗau. Mauɗeeba ãchi chiya iɗi bara ɓeesii:
—¿Nau kaima? Pũaturãba mauɗe mar biɗa ichi beɗea ijãa panuu.
