Marcos 5:1-43
5 Maabae mar mechiu kĩare basiɗau Gerasa druaɗe.*
2 Jesús jãbaɗebena eɗaa wãsiiɗe ara mauɗe ẽbẽra jai kachirua uru ɓuu ichimaa neesii.
3 Mau ẽbẽra biuɗarã jau ɓubadaumare choɓeaɗe ɓuabachii. Aɓau biɗa ichi ome poyaaɗaka basii, kaenaba jʉ̃ʉduu siɗa.
4 Ɓes ãrea ichi kaenaba jʉ̃rʉ mauɗe jua jʉ̃bachiɗamina aɓaeɗe joma tuikuabachii. Ichi ome aɓau biɗa poyaaɗaka basii.
5 Ãyadaa mauɗe ẽsabuɗe eaɗe nibabachii mauɗe biuɗarã jau ɓubadaumare. Ara istu mooba drʉkuabachii.
6 Ichiba kaitawẽeba Jesús unusiiɗe pira neesii. Jesús daaɗe õdarrɗe koɓeepeɗa,
7 jĩwa jarasii:
—Dachi Mechiu Warr, Jesús, ¿sakãe mʉ joe ɓuma? ¡Michuburia, Dachi Akõre daaɗe jarase mʉ biꞌiwãe ɓeebiibai!
8 Maka berreasii Jesusba ichimaa naka jara ɓuasiiɗeeba: «¡Jauri kachirua, nau ẽbẽra kakuaɗebena awara wãse!»
9 Maabae Jesusba chi jai kachiruamaa iɗisii:
—¿Bichi trʉ̃ kaima?
Chi jai kachiruaba panausii:
—Mʉ trʉ̃ Legionbʉ,* dai ãreaɗeeba.
10 Mauɗe chi jai kachiruaba Jesusmaa chi chuburia iɗisii mau druaɗebena duabʉirãamera.
11 Mau kaita eakarr jãkaa sinarã ãrea komaa panasiɗau.
12 Mauɗeeba chi jai kachiruarãba Jesusmaa naka chi chuburia iɗisiɗau:
—Dai sina jari duanuu kakuaɗe eɗa wãbiáse.
13 Jesusba makabiasii. Mau mukĩra kakuaɗebena awara wãɗapeɗa sinarã kakuaɗe eɗa wãsiɗau. Maabae chi sina pira wãuriɗapeɗa eakarrɗebena doeɗaa jĩichoaɗapeɗa ʉ̃yaba jãri kinisiɗau. Chi sinarã beraa 2.000 basii.
14 Mauɗe chi sina nu panaɗa pira wãsiɗau. Ãchiba unupeɗaaɗa nebʉrʉsiɗau chi puuruɗebenarãmaa mauɗe puuru joma aude ara kaita ɓeemaa. Maarãba chi makaɗa ichiaɗe neesiɗau.
15 Jesús ɓuumaa neesiɗauɗe, mau mukĩra jai kachiruarã uru ɓuaɗa unusiɗau. Mau paru jʉ̃peɗa akʉ ɓuu mauɗe kĩrabia ɓuu unusiɗauɗe, perasiɗau.
16 Chi mau unupeɗaaɗaba waabenarãmaa nebʉrʉsiɗau chi jai kachirua uru ɓuaɗa mauɗe sinarã ome kãare sãaɗa.
17 Mauɗeeba Jesusmaa chi chuburia iɗisiɗau ãchi druaɗebena ãyaa wãmera.
18 Jesús jãbaɗe atausiiɗe chi jai kachirua uru ɓuaɗaba chi chuburia iɗisii ichi ome wãi baita.
19 Maamina Jesusba ida wãbiibasii. Maumaarã jarasii:
—Deeɗaa wãpeɗa bichi ẽbẽrarãmaa jarase Dachi Mechiuba bichi ome ne ãrea wauɗa. Maarãmaa nebʉrʉse saka ichiba bichi ãrea kĩra chuburiasii.
20 Ara makʉɗe chi jai kachirua uru ɓuaɗa wãpeɗa joma Decápolis druaɗe nebʉrʉbachii Jesusba ichi ome ne ãrea wauɗa. Mauɗeeba jomaurãba kuitaa kʉ̃risiaɗaabasii.
Jesusba wẽrakau aribiabiɗa
Mateo 9:18-26; Lucas 8:40-56
21 Jesús waya jãbaɗe mar mechiu kĩaraa wãsiiɗe ẽbẽrarã ãrea ichi ɓuumaa neesiɗau. Mauɗeeba Jesús do iikaa ɓeesii.
22 Maka ɓuuɗe ẽbẽra Jairo abadau neesii. Mau ẽbẽra judiorã araa ãbua imibadau deɗe chi karr basii. Mau Jesús kaita neepeɗa ichi jʉ̃rʉ kaita õdarrɗeeba koɓeepeɗa,
23 naka chi chuburia iɗisii:
—Mʉ kau biumaa ɓuu. Bichi jua ichi ʉ̃rʉ kuɓuɗe neese aribiamera.
24 Ara makʉɗe Jesús Jairo baara wãsiiɗe ẽbẽrarã ãrea ãchi kaaɗe wãsiɗau. Ãreaɗeeba ichi pĩchuka uru panasiɗau.
25 Mauɗe ẽbẽrarã tãeɗe wẽra aɓa 12 año oamia inibasii.
26 Mau wẽraba ʉrrmiɗia deabadaurãmaa chi nejarra joma deasmina, aribiabasii. Chi nuree ʉrrmiɗia deabadaurãba ichi ãrea biꞌiwãe ɓeebisiɗau, maamina aribiai baɗaɗe chi oamia aude kãribasii.
27 Mauɗe Jesús ʉ̃rʉbena berrea panuu ũripeɗa ẽbẽrarã tãeɗe Jesús kaaɗeeba ara kaita wãsii. Naka kʉ̃risiasii: «Ichi anaɓari jʉ̃barii wauruubʉrã, mʉ aribiaika». Ara makʉɗe Jesús anaɓari jʉ̃barii wausii.
28 —.
29 Ara makʉɗe, ichi oamia tʉ diɗisii. Maka kuitaasii ichi ẽpermo ɓuaɗa aribiasii.
30 Maamina Jesusba kuitaasii ichi poyaaɗeeba aɓa aribiasii. Mauɗeeba waya ichiapeɗa iɗisii:
—¿Kaiba mʉ paru wausma?
31 Mauɗe ichi baara nibabadaurãba jarasiɗau:
—¿Saka bichiba iɗi ɓuma kaiba bichi wausii? ¿Bichiba unuwẽa ɓuka ẽbẽrarãba dachi pĩchua uru panuu?
32 Maka jarasiɗamina Jesusba joma aɗu purra ichiasii ichi wauɗa kuitaai baita.
33 Maka ɓuuɗe wẽra aɓa peraba uri koɓeesii Jesusɗeeba aribiaɗa kuitaasiiɗeeba. Maabae Jesusmaa neepeɗa ichi daaɗe õdarrɗeeba koɓeepeɗa jarasii:
—Mʉʉba biawãra bichi wausii.
34 Mauɗeeba Jesusba ichimaa jarasii:
—Kau, biawãra ijãasiiɗeeba bichi aribiasii. Jirukaraayuwãe wãse bichi ẽpermo ɓuaɗa aribiasiiɗeeba.
35 Jesús wabiɗa berreamaa ɓuuɗe, Jairo deɗebena ẽbẽrarã neeɗapeɗa maabae Jairomaa jarasiɗau:
—Bichi kau biusii. ¿Sakãe chi Jaradeabarii ome wabiɗa berrea ɓuma?
36 Jesusba maka jaraaduu ũrismina, Jairomaa jarasii:
—Wapearã́se; mʉʉɗe ijãase.
37 Maabae Jesusba Pedro, Santiago mauɗe Santiago ãba Juan, Jairo deemaa adoesii. Chi waabenarã ida wãbiabasii.
38 Jairo deemaa needuuɗe Jesusba ẽbẽrarã kĩra nomaa jẽa duanuu ũrisii.
39 Eɗa wãpeɗa Jesusba chi kĩra nomaa jẽa duanuumaa jarasii:
—¿Sakãe ãrea kĩra nomaa jẽa panuma? Jãu wẽrakau biuwẽa ɓuu, bari kãi nuɓuu.
40 Mauɗeeba ẽbẽrarãba ichimaa ichiaɗapeɗa ʉisiɗau. Maamina Jesusba jomaurã awara wãbiasii. Maabae ichi baara nibabadaurã õbea, chi wẽrakau akõre mauɗe chi nawe eɗa adoesii chi wẽrakau biuɗa nuɓuumare.
41 Wẽrakau juaɗe jidaupeɗa Jesusba jarasii:
—Talita cum. (Mau arameo beɗeaɗe naka jara ɓuu: “Wẽrakau, mʉʉba bichimaa jaraaruu: jiraduse”).
42 Ara makʉɗe jiradupeɗa wãkarãaɗeasii. Mau wẽrakau 12 año nibasii. Mau unusiɗauɗe, ẽbẽrarã kãare kʉ̃risiaɗai adua duaneesiɗau.
43 Maamina Jesusba ãchimaa ãrea jarasii aɓaumaa biɗa jararãaɗamera. Mauɗe jarasii wẽrakaumaa ne kobiɗamera.
