Marcos 7:1-37
7 Ewari aɓa fariseorã, Moisesba ɓʉɗa jaradeabadaurã mauɗe Jerusalén puuruɗebena Jesusmaa neesiɗau.
2 Mau ẽbẽrarãba unusiɗau waabenarã Jesús baara nibabadaurã chi nuree ãchi jua jeraaɗawẽa komaa panuu. Nabẽraeɗe jua jeraabachiɗau kĩra wauɗawẽa panuuɗeeba ãchiba kachirua wau panuu a jarasiɗau.*
3 (Fariseorãba mauɗe waabena judiorãba jua ɓes ãrea jeraabadau nabẽraeɗe jaradeabachiɗau kĩra.* Maka jeraaɗawẽebʉrã koɗakau.
4 Mauɗe chi nedobʉibaɗaumarebena deeɗaa neeɗapeɗa nabẽraeɗe jaradeabachiɗau kĩra jeraaɗawẽebʉrã koɗakau. Mau awara ãchi basu, choko, paratu koore wauɗa mauɗe kʉɗa kauwa jeraabadau.* Ne ãrea kauwa waubadau nabẽraeɗebenaba jaradeabachiɗau kĩra).
5 Mauɗe fariseorãba mauɗe Moisesba ɓʉɗa jaradeabadaurãba Jesusmaa iɗisiɗau:
—¿Bichi baara nibabadaurãba sakãe wauɗawẽa panuma, dachi nabẽraeɗebenarãba jaradeapeɗaaɗa kĩra? Mau ida ɓuɗapeɗa, jua jeraaɗawẽa kobadau.
6 Jesusba panausii:
—Chi Dachi Akõre baita berreabarii Isaiasba machi ʉ̃rʉbena arakʉɗe ɓʉsii. ¡Setaa ẽbẽra bia nuree abadau! Isaiasba jarasii:
Nau puuruɗebenarãba mʉʉmaa biꞌia berreabadau, maamina biawãra ãchi sõɗeeba mʉʉɗe kʉ̃risiaɗakau.
7 Mʉ bari kʉ̃riabadau.Mʉ beɗea jaradeaɗai baɗamaarã, ẽbẽra kʉ̃risiaburu jaradeabadau.*
8 Ara mau kĩra Dachi Akõreba waubi ɓuu beɗea machiba ida ɓubadau nabẽrarãba jaradeapeɗaaɗa wauɗai baita.*
9 Mau awara Jesusba jarasii:
—Ara machiba waubadauɗeeba Dachi Akõreba waubi ɓuu beɗea ida ɓubadau.
10 Moisesba naka jarasii: “Bichi akõre mauɗe bichi nawe wapeadee ɓuase”.* Nau siɗa jarasii: “Barikiuba ichi akõre maebʉrã ichi nawe kachirua jaraaruubʉrã, mau biui ɓuu”.*
11 Maamina machiba jaradeabadau ẽbẽra aɓaba poyaa jarai chi akõremaa maebʉrã chi nawemaa: “Joma mʉʉba uru ɓuu Dachi Akõremaa deasiiɗeeba mʉʉba machi poyaa aiɗaabai”.*
12 Maka jaradeabadau chi warrba chi akõre mauɗe chi nawe aiɗabiɗaamaaba.
13 Maka machi nabẽraeɗebenarãba jaradeabachiɗau kĩra wau panuuɗeeba Dachi Akõre beɗea ida ɓubadau. Machiba mau kĩra ne ãrea waubadau.
14 Maabae Jesusba ẽbẽrarã aria panuu joma iukuapeɗa naka jarasii:
—Jomaurãba mʉ beɗea ũrísturu kuitaaɗamera.
15 Dachiba kobadauba Dachi Akõre daaɗe miadaa ɓukau. Maumaarã chi sõɗebena neeruuba dachi miadaa waubibarii.
16 Chi kʉʉrʉ bara niiba kauwa ũrise.*
17 Maabae Jesusba ẽbẽrarã aria panuu ɓʉipeɗa deeɗa eɗa wãsii. Aria ichi baara nibabadaurãba ichiba nebʉrʉɗa ʉ̃rʉbena iɗisiɗau.
18 Mauɗe Jesusba jarasii:
—¿Machia biɗa wabiɗa mau adua panuka? Ũrísturu: dachiba kobadauba Dachi Akõre daaɗe miadaa ɓukau,
19 dachi sõɗe eɗa wãwẽa ɓuuɗeeba. Joma chi ẽbẽra okarrɗe wãaruu, ɓiɗe wãbarii maabae awara wãbarii.
Maka jara ɓuuɗeeba Jesusba kuitaabiasii ne joma koɗai biꞌia ɓuu.
20 Maabae jarasii:
—Ẽbẽra sõɗebena neeruuba mau ẽbẽra kachirua ɓeebibarii Dachi Akõre daaɗe.
21 Nakʉ kʉ̃risia kachirua awara wãbarii: Kʉ̃risia kachirua ɓeeyu, waabenarã ome ne kachirua wauyu, chiruayu, mia beayu, aɓa miakãiɗa junebena ome kãi nuɓeeyu, joma uru ɓuai kʉ̃riayu, ne kachirua wauyu, waabenarã setaa kũruayu, perawẽa wauyu, waabenarãba uru ɓuu kakua kĩra kachirua ɓuayu, aɓau ʉ̃rʉbena miadaa berreayu, waabenarã audeara biꞌia ɓuu kʉ̃risiayu mauɗe kʉ̃risia wãꞌãe ɓukau wau ɓuayu.
22 —.
23 Joma mau kachirua sõɗebena neeruuba ẽbẽra Dachi Akõre daaɗe miadaa ɓubarii.
Jesusba wẽrakau aribiabiɗa
Mateo 15:21-28
24 Maaɗakare Jesús Tiro druaɗaa wãpeɗa aɓa ẽbẽra deɗe ɓeesii.* Ichi sama ɓuu aɓaumaa biɗa kuitaabi kʉ̃riawẽa ɓuasii. Maamina kuitaasiɗau.
25 Mau druaɗe wẽra ɓuasii. Ichi kau jai kachirua bara ɓuasii. Mau wẽraba Jesús ʉ̃rʉbena ũrisiiɗe ichi ɓuumaa wãpeɗa ichi jʉ̃rʉ kaita õdarrɗe koɓeesii.
26 Mauɗe chi chuburia iɗisii Jesusba jai kachirua ichi kau kakuaɗebena duabʉimera. Maamina chi wẽra judiowãe basii.* Sirofenicia druaɗebena basii.
27 Mauɗeeba Jesusba ichimaa jarasii:
—Warrarã naa ida kobiai ɓuu. Biꞌiwãe ɓuu warrarã chiko juakaa adauyu maabae usarãmaa deaɗakayu.
28 Mauɗe chi wẽraba panausii:
—Bichiba jara ɓuu biawãrabʉ, mʉ Mechiu, maamina warrarãba chiko jurrchoabipeɗaaɗa usarãba mesa ekare kobadau.
29 Mau ũripeɗa Jesusba jarasii:
—Bichiba maka biꞌia panausiiɗeeba jirukaraayuwãe deeɗaa wãse. Bichi kau kakuaɗe ɓuaɗa jai kachirua ãyaa wãsii.
30 Chi wẽra ichi deɗe neesiiɗe ichi kau kʉɗaɗe jirukaraayuwãe ɓuu unusii. Chi jai kachirua biawãra ãyaa wãsii.
Jesusba ẽbẽra kʉʉrʉ kiape nii aribiabiɗa
Mateo 15:29-31
31 Jesús Tiro druaɗe ɓuaɗa waya wãsii. Sidón druare wãpeɗa Decápolis druaɗaa Galilea marɗaa wãsii.
32 Aria ẽbẽrarãba kʉʉrʉ kiape nii Jesusmaa adoesiɗau. Mau ẽbẽra bosara ɓuasii. Ãchiba Jesusmaa chi chuburia iɗisiɗau ichi jua mau ẽbẽra ʉ̃rʉ kuɓupeɗa aribiabimera.
33 Mauɗe Jesusba chi kʉʉrʉ kiape nii awara adoesii. Maabae ichi jua jimiɗi chi ẽbẽra kʉʉrʉ choɓeacha bʉisii. Maka waupeɗa ara ichi jua jimiɗiba iɗuɓaba purupeɗa maabae chi ẽbẽra kẽrame wausii.
34 Maabae bajãaɗaa ichiapeɗa ʉ̃yabapeɗa arameo beɗeaɗe jarasii: «¡Efatá!» Mau beɗea jara ɓuu «Kʉʉrʉ ẽesãase».
35 Ara makʉɗe chi mukĩra berrea koɓeesii mauɗe chi kʉʉrʉ ẽesãasii.
36 Jesusba ãchimaa jarasii mau ʉ̃rʉbena aɓaumaa biɗa jararãaɗamera. Maamina aude nebʉrʉbachiɗau.
37 Chi ũripeɗaaɗarã pera bara ɓeesii maabae chiya berrea bara ɓeesii: «Biawãra ɓuu Jesusba joma biꞌia waubarii. ¡Kʉʉrʉ kiape ɓee ũribiabarii mauɗe bosara nuree berreabiabarii!»*
Notas
^ 7:2 Ãchiba kachirua wau panuu a jarasiɗau. Griego beɗeaɗe chi ɓee kartaɗe mau wãꞌãe.
^ 7:3 Paarerã jeraaɗai panuu ʉ̃rʉbena ɓʉ kuɓuu, maamina Jesús ewariɗe fariseorãba jarabachiɗau jomaurãba maka wauɗai panuu. Levítico 22:4-8.
^ 7:4 Kʉɗa. Griego beɗeaɗe chi ɓee kartaɗe mau wãꞌãe.
^ Isaías 29:13.
^ 7:8 Griego beɗeaɗe chi ɓee kartaɗe nau siɗa ɓʉ kuɓuu: Machiba choko mauɗe sãu kauwa jeraabadau. Machiba ne ãrea mau kĩra waubadau.
^ Éxodo 20:12.
^ Éxodo 21:17.
^ 7:11 Joma mʉʉba uru ɓuu Dachi Akõremaa deasiiɗeeba. Griego beɗeaɗe ɓʉ kuɓuu: Nau Corbán.
^ 7:16 Griego beɗeaɗe chi ɓee kartaɗe mau versículo wãꞌãe.
^ 7:24 Tiro. Griego beɗeaɗe chi ɓee kartaɗe naka ɓʉ kuɓuu: Mauɗe Sidón.
^ 7:26 Judiowãe. Griego beɗeaɗe naka ɓʉ kuɓuu: Griego.
^ Isaías 35:5-6.
