Marcos 8:1-38
8 Mau ewariɗe waya ẽbẽrarã Jesusmaa ãrea pĩchua neesiɗau. Koɗawẽa panasiɗauɗeeba Jesusba ichi baara nibabadaurã iukuapeɗa jarasii:
2 —Mʉʉba nau ẽbẽrarã kĩra chuburia ɓuu, mʉ baara panuu ewari õbea baaruuɗeeba. Ãchiba koɗai baita uru panaɗa wãꞌãesii.
3 Mʉʉba ãchi deemaa ara jãka bʉikaaruubʉrã, oɗe jarrbaba wawa diɗiɗai, chi nuree kaitawẽeba neesiɗauɗeeba.
4 Ichi baara nibabadaurãba iɗisiɗau:
—Nama ẽbẽra wãꞌãeɗe ¿samabena jãu ẽbẽrarã baita chi koɗai unuɗaima?
5 Mauɗe Jesusba iɗisii:
—¿Machiba pan sãabe uru panuma?
Ãchiba panausiɗau:
—7.
6 Maabae Jesusba ẽbẽrarã joma jeeɗa akʉ ɓeebiasii. Mau 7 pan ichi juaɗe adaupeɗa Dachi Akõremaa ichíturu kiɗibai apeɗa, maabae chi pan ɓʉakuapeɗa ichi baara nibabadaurãmaa deasii deaɗakaɗamera. Maabae deaɗakasiɗau.
7 Mauɗe ɓeda ãreawãe uru panasiɗau. Jesusba mau kakua Dachi Akõremaa ichíturu kiɗibai apeɗa ẽbẽrarãmaa deaɗakabiasii.
8 Jomaurãba koɗapeɗa ɓi jãwaakuasiɗau. Chi ʉ̃rʉ ɓeeɗa araa pesiɗauɗe 7 jaɓara mechiu waabirubiasiɗau.
9 Aria chi kopeɗaaɗa 4.000 basii. Ara makʉɗe Jesusba chi ẽbẽrarã wãbiasii.
10 Maabae ichi mauɗe chi ichi baara nibabadaurã jãbaɗe atauɗapeɗa Dalmanuta druaɗaa wãsiɗau.
Fariseorãba Jesusmaa ne poyaa wauɗakau waubi panaɗa
Mateo 16:1-4; Lucas 12:54-56
11 Mau ewariɗe fariseorã neeɗapeɗa Jesús ome kĩru berrea panasiɗau. Ichi bajãaɗebena nee ɓuu kuitaaɗai baita ichimaa iɗisiɗau ẽbẽrarãba ne poyaa wauɗakau waumera.
12 Ãchiba maka waa jara panuuɗeeba Jesús iɗu ʉ̃yabapeɗa jarasii:
—Iɗibena ẽbẽrarãba ¿sakãe ẽbẽrarãba ne poyaa wauɗakau unu kʉ̃ria panuma? Biawãra ara mʉʉba jaraaruu: mʉ Dachi Akõreɗebena nee ɓuu kuitaaɗamera mʉʉba ẽbẽrarãba ne poyaa wauɗakau waubai.
13 Maka jarapeɗa fariseorã ɓʉikasii. Jesús mauɗe ichi baara nibabadaurã jãbaɗe atausiɗau waya mar kĩaraa wãɗai baita.
Fariseorã masa ẽesãabibarii
Mateo 16:5-12
14 Mau wãaduuɗe Jesús baara nibabadaurãba chiko adoeɗai kĩrabaɗaabasii. Jãbaɗe pan aɓaburu uru panasiɗau.
15 Mauɗe Jesusba jarasii:
—Fariseorã masa ẽesãabibarii mauɗe Herodesɗe siɗa, kauwa panásturu.
16 Jesús baara nibabadaurã ãchi chiya naka berreasiɗau:
—Ichiba maka jarasii dachiba pan eneeɗaabasiiɗeeba.
17 Jesusba kuitaa ɓuasii kãare ʉ̃rʉbena berrea panuu. Mauɗeeba jarasii:
—¿Sakãe pan wãꞌãe a panuma? ¿Mʉʉba wauɗa machiba unusiɗamina kuitaaɗaabaska? ¿Aɓaeɗe poyaa kuitaaɗaabaska? ¿Adua panuka mʉ kai?
18 ¿Machi dau bara nuremina unuɗakama? ¿Kʉʉrʉ bara nuremina ũriɗakama? Mʉʉba wauɗa ¿kĩrabaɗawẽka?
19 Mʉʉba pan jua aɓaɗebena ẽbẽrarã 5.000 kobiasiiɗe machiba chi ʉ̃rʉ ɓeeɗa araa pesiɗauɗe ¿jaɓara mechiu sãabe waabirubiasiɗama?
Ãchiba panausiɗau:
—12.
20 Jesusba jarasii:
—Mauɗe mʉʉba 7 panba ẽbẽrarã 4.000 kobiasiiɗe machiba chi ʉ̃rʉ ɓeeɗa araa pesiɗauɗe ¿jaɓara mechiu sãabe waabirubiasiɗama?
Ãchiba panausiɗau:
—7.
21 Maabae Jesusba ãchimaa iɗisii:
—¿Sakaburu machiba wabiɗa kauwa ũriɗawẽma?
Jesusba ẽbẽra dau pãriu nii aribiabiɗa
22 Betsaida puuruɗe neesiɗauɗe waabenarãba ẽbẽra dau pãriu nii Jesusmaa adoeɗapeɗa chi chuburia iɗisiɗau aribiabimera.
23 Jesusba mau dau pãriu nii jua jidaupeɗa puuru awara adoesii. Maabae chi ẽbẽra dauɗe iɗusii. Ichi jua ʉ̃rʉ kuɓupeɗa iɗisii:
Jãabae ¿ɓaꞌãra unu ɓuka?
24 Maabae aɗu ichiapeɗa jarasii:
—Mʉʉba ẽbẽrarã bakuru kĩra niɗau unu ɓuu.
25 Jesusba waya ichi jua chi ẽbẽra dau ʉ̃rʉ kuɓusii. Mauɗe ichi dau aribiasiiɗeeba joma ʉ̃ɗaa unu koɓeesii.
26 Jesusba ichimaa naka jarasii:
—Deeɗaa wãaruuɗe puuruɗaa wãrã́se. Mʉʉba wauɗa aɓaumaa biɗa jararã́se.*
Pedroba Jesús ʉ̃rʉbena jaraɗa
Mateo 16:13-20; Lucas 9:18-21
27 Mau maaɗakare Jesús ichi baara nibabadaurã ome Cesarea-Filipoɗe, puuru kaebeu ɓeecha nibaɗe wãsiɗau. Oɗe niɗauɗe Jesusba ichi baara nibabadaurãmaa iɗisii:
—Ẽbẽrarãba mʉ ¿kai kʉ̃risia panuma?
28 Ãchiba panausiɗau:
—Chi nureeba jara panuu bichi Juan chi Boro Eabarii. Chi nureeba jara panuu bichi Elías. Waabenarãba jara panuu bichi Dachi Akõre baita berreabarii.
29 Mauɗe Jesusba iɗisii:
—Maamina machiba mʉ ¿kai kʉ̃risia panuma?
Pedroba panausii:
—Bichi Dachi Akõreba Dachi Karibabarii deai jaraɗabʉ.*
30 Jesusba ãchimaa jarasii mau aɓaumaa biɗa jararãaɗamera.
Jesusba ichi beaɗai ʉ̃rʉbena jaraɗa
Mateo 16:21-28; Lucas 9:22-27
31 Maaɗakare Jesusba ichi baara nibabadaurãmaa jara koɓeesii ichi ãrea biꞌiwãe ɓuai ɓuu. Naka jarasii:
—Puuruɗebena jaradea ua ɓuabadaurãba, paare mechiurãba mauɗe Moisesba ɓʉɗa jaradeabadaurãba mʉ, chi Ẽbẽra Ba Ɓuaɗa, ida ɓuɗapeɗa beabiɗai. Maamina mʉ ewari õbeaɗe chokae jiradui.
32 Jesusba mau arakʉɗe jarasii. Mauɗeeba Pedroba ichi awara adoepeɗa iadaa ɓuu kĩra maka berrearãaba asii.
33 Maamina Jesús aɗu purraɓaripeɗa, chi ichi baara nibabadaurãmaa ichiaruuɗe Pedromaa jarasii: «¡Satanás, mʉ jãkaabena ãyaa wãse! Bichiba Dachi Akõre kĩra kʉ̃risiawẽa ɓuu. Maumaarã ẽbẽra kĩra kʉ̃risia ɓuu».
34 Jesusba ichi baara nibabadaurã mauɗe waabenarã iukuapeɗa jarasii:
«Aɓa mʉ baara nibai kʉ̃ria ɓuubʉrã, mauba wau kʉ̃ria ɓuu ida ɓupeɗa ãrea biꞌiwãe ɓuai baita ɓuai ɓuu.* Maabae mʉ baara wãi ɓuu.
35 Aɓa ara ichi karibai kʉ̃riaruubʉrã, mau poyaabai. Maamina aɓa mʉ kakua biuruubʉrã maebʉrã chi beɗea bia mʉ ʉ̃rʉbena jara ɓuu kakua biuruubʉrã, Dachi Akõre ome ewaricha chokae nibai.
36 Ẽbẽra nau iujãaɗe ne joma uru ɓuuɗe biuruubʉrã, ¿ichiba uru ɓuuba karibai ɓuka?
37 Biubiimaaba ichiba uru ɓuuɗebena ¿sãabe poyaa deaima?
38 Aɓauba mʉ ʉ̃rʉbena kĩrakayaaruubʉrã mauɗe mʉ beɗeaɗe, mʉ, chi Ẽbẽra Ba Ɓuaɗa neeruuɗe mau ẽbẽra kakua kĩrakaya ɓuai. Mau ewariɗe mʉ Chachaba mʉʉmaa poyaabarii deaɗaɗeeba neei, chi ichi angelerã biꞌia nuree baara».
Notas
^ 8:26 Mʉʉba wauɗa aɓaumaa biɗa jararã́se. Griego beɗeaɗe chi ɓee kartaɗe mau wãꞌãe.
^ 8:29 Dachi Akõreba Dachi Karibabarii deai jaraɗa. Mau griego beɗeaɗe naka ɓʉ kuɓuu: Cristo. Mau chi trʉ̃wãe. Arameo beɗeaɗe jarabadau «Mesías».
^ 8:34 Ãrea biꞌiwãe ɓuai baita ɓuai ɓuu. Griego beɗeaɗe naka ɓʉ kuɓuu: Ichi cruz adooi ɓuu.
