Marcos 9:1-50
9 Mauɗe Jesusba jarasii:
—Mʉʉba biawãra jaraaruu: chi nuree nama panuu biuɗai naeɗe unuɗai Dachi Akõre poyaaɗeeba ichiɗirã ichi juaɗe ua ɓuu neeruu.*
Jesús kĩra awara diɗiɗa
Mateo 17:1-13; Lucas 9:28-36
2 6 ewari baɗakare Jesusba Pedro, Santiago mauɗe Juan ãchi du aɓa ea ʉtʉ nuɓuuɗaa adoesii. Aria ãchi daaɗe Jesús kĩra awara diɗisii.
3 Ichi paru ãrea torroa diɗisii. Nau iujãaɗebenarãba mau paru kĩra poyaa torroabiɗaabai.
4 Mauɗe ãchiba unusiɗau Elías mauɗe Moisés Jesús ome berreamaa panuu.
5 Mauɗeeba Pedroba Jesusmaa jarasii:
—Jaradeabarii, biꞌia ɓuu dai nama panuu. Daiba de cheke õbea pãeɓariɗai; aɓa bichi baita, aɓa Moisés baita mauɗe aɓa Elías baita.
6 Pedroba adua basii kãare jara ɓuu ãchi ãrea perasiɗauɗeeba.
7 Maka ɓuuɗe jʉ̃rʉara ãchi ʉ̃rʉ neesii. Mau jʉ̃rʉaraɗebena nau beɗea jĩwa ũrisiɗau: «Nau mʉ Warrbʉ. Mʉʉba mau ãrea kʉ̃ria ɓuu. Mauba jara ɓuu ũrísturu».
8 Ara mauɗe ãchi aɗu ichiaduuɗe chi waabenarã unuɗaabasii. Aɓaburu Jesús ãchi ome ɓuasii.
9 Maabae eaɗebena eɗaa wãaduu niɗauɗe Jesusba ãchimaa ãrea jara koɓeesii eaɗe unupeɗaaɗa aɓaumaa biɗa jararãaɗamera aɓa chi Ẽbẽra Ba Ɓuaɗa chokae jiraduuruuɗaa.
10 Mau ara ãchi kʉ̃risiaɗe uru paneesiɗau. Ãchi chiya berrea bara ɓeesiɗau mau «chokae jiradui» ʉ̃rʉbena.
11 Maabae Jesusmaa iɗisiɗau:
—Makarã Moisesba ɓʉɗa jaradeabadaurãba ¿sakãe jarabadama Elías naa neei ɓuu?
12 Jesusba panausii:
—Biawãra Elías naeɗe neei ɓuu ne joma biꞌia ɓui baita. Maamina ¿sakãe Dachi Akõre beɗeaɗe ɓʉ kuɓuu chi Ẽbẽra Ba Ɓuaɗa ãrea biꞌiwãe ɓuu mauɗe ẽbẽrarãba ida ɓuɗaima?
13 Mʉʉba machimaa jaraaruu jãabae Elías neesii.* Maamina Dachi Akõre beɗeaɗe ɓʉ kuɓuu kĩra ẽbẽrarãba mau ome ãchi kʉ̃ria wausiɗau.*
Jesusba warr jai kachirua uru ɓuu aribiabiɗa
Mateo 17:14-21; Lucas 9:37-43
14 Jesús, Pedro, Santiago mauɗe Juan waabenarã Jesús baara nibabadaurã panuumaa neesiɗau. Mauɗe unusiɗau ãrea ẽbẽrarã ãchimaa pĩchuka imi nuɓuu. Chi nuree Moisesba ɓʉɗa jaradeabadaurã ãchi ome kĩru berrea duanasiɗau.
15 Jesús unusiɗauɗe jomaurãba ãrea kuitaa kʉ̃risiaɗaabasii. Ara makʉɗe ichimaa pira wãɗapeɗa biꞌia irsibisiɗau.
16 Jesusba ãchimaa iɗisii:
—¿Sakãe kĩru berrea panuma?
17 Mau pĩchuka nee nuɓuuɗebena aɓaba panausii:
—Jaradeabarii, mʉ warr adoesii bichiba aribiabimera. Mau jai kachiruaba uru ɓuu. Mau jai kachiruaba bosara babi uru ɓuu.
18 Jauri kachiruaba jidauruuɗe ɓaebibarii, okarrɗebena kõpepeabibarii, kiɗa kʉrrʉabibarii mauɗe kakua ʉɓʉabibarii. Mʉʉba bichi baara nibabadaurãmaa jarasii mau jai kachirua duabʉiɗamera. Maamina poyaaɗaabasii.
19 Jesusba jarasii:
—¡Machiba Dachi Akõreɗe ijãaɗakau! Machiba ijãaɗamera ¿sakaeɗaa mʉ dauchia jãadua ɓuaima? Mau warr namaa enésturu.
20 Ara makʉɗe chi warr Jesusmaa adoesiɗau. Chi jai kachiruaba Jesús unuuruuɗe chi warr wawabisii. Chi warr jeeɗa ɓaepeɗa bʉraa wã koɓeesii mauɗe okarrɗaa kopepea koɓeesii.
21 Jesusba chi mau warr akõremaa iɗisii:
—¿Sakaeɗeeɗe jãka ɓuma?
Chi akõreba panausii:
—Kaebe niiɗeeɗe jãka ɓuu.
22 Ɓes ãrea ichi tʉbʉchiaɗe mauɗe doeɗa ɓaebibarii beai baita. Poyaa ɓuubʉrã dai kĩra chuburiáse mauɗe dai karibase.
23 Mauɗe Jesusba jarasii:
—Bichiba ¿saka mʉʉmaa poyaa karibai ɓuubʉrã a ɓuma? Ijãa ɓuubʉrã, mʉʉba joma poyaa karibai.
24 Ara makʉɗe chi akõreba jĩwa jarasii:
—Mʉʉba ijãa ɓuu maamina karibase aude ijãai baita.
25 Jesusba ẽbẽrarã araa pĩchuka imiiduu unusiiɗeeba chi jai kachirua naka iadaasii:
—Jauri kachirua kʉʉrʉ kiapebibarii mauɗe bosara babibarii, mʉʉba bichimaa jaraaruu: nau warr kakuaɗebena awara wãse. Waya ichi kakuaɗe eɗa wãrã́se.
26 Ara makʉɗe chi jai kachirua ɓiapeɗa waya chi warr ãrea wawabisii. Maabae ichi kakuaɗebena wãsii maamina chi warr biuɗa kĩra ɓaesii. Mauɗeeba chi aria panuuba jarasiɗau:
—¡Ay, jãu warr biusii!
27 Maamina Jesusba chi warr juaɗe jidaupeɗa jiradubisii. Mauɗe chi warr ʉkʉ nuɓeesii.
28 Jesús deeɗaa wãsiiɗe ichi baara nibabadaurãba ãchi chiya iɗisiɗau:
—¿Sakãe daiba jãu jai kachirua poyaa duabʉiɗaabasma?
29 Jesusba panausii:
—Jauri kachirua nau kĩra nuree duabʉiɗai baita Dachi Akõremaa ʉtaa iɗiɗai panuu mauɗe chiko koɗakau ewari wauɗai panuu.*
Jesusba ichi beaɗai ʉ̃rʉbena waya jaraɗa
Mateo 17:22-23; Lucas 9:44-45
30 Arabena wãɗapeɗa, Galilea druaɗe nibasiɗau. Jesusba sama panuu aɓaumaa biɗa kuitaabii kʉ̃riawẽa ɓuasii,
31 ichi baara nibabadaurãmáburu jaradeaɗakai ɓuuɗeeba. Mauɗe ãchimaa jarasii: «Mʉ, chi Ẽbẽra Ba Ɓuaɗa ẽbẽrarãmaa jidaubiai. Maarãba mʉ beaɗai, maamina ewari õbeaɗe mʉ chokae jiradui».
32 Maamina ãchiba Jesusba maka berreaɗa kuitaaɗaabasii. Ichimaa iɗiɗai wapea panasiɗau.
¿Kai chi mechiu nima?
Mateo 10:42; Lucas 9:46-50
33 Maabae Capernaum puuruɗaa waya neesiɗau. Deeɗaa neesiiɗe Jesusba iɗisii:
—¿Sakãe oɗe kĩru berrea neesiɗama?
34 Ãchi chũpea paneesiɗau biawãra kĩru berrea panasiiɗeeba. Ãchi berrea duaneesiɗau kai chi aude mechiu nii kuitaaɗayua.
35 Maabae Jesús akʉ ɓeepeɗa ichiba adoeɗa 12 panuu kaita iukuapeɗa jarasii:
—Aɓa chi mechiu nibai kʉ̃ria ɓuubʉrã, jomaurã audeara kaebeu nibai. Waabenarã baita bari trajabarii ɓuai.
36 Mauɗeeba warr adoepeɗa ãchi ẽsa nuɓusii. Maabae ichi juaɗe ore adaupeɗa jarasii:
37 —Aɓauba mʉʉɗe ijãa ɓuuɗeeba naarã warrarãɗebena aɓa biꞌia irsibiiruubʉrã, mʉ siɗa biꞌia irsibiiruu. Chi mʉ biꞌia irsibiiruuba aɓaburu mʉ irsibiiruuwãe, maumaarã chi mʉ bʉiɗa siɗa biꞌia irsibii.*
Chi dachi kĩramaawẽe dachi baara ɓuu
38 Mauɗe Juanba Jesusmaa jarasii:
—Jaradeabarii, daiba unusiɗau ẽbẽraba bichi trʉ̃ɗeeba jai kachirua duabʉikua ɓuu. Maamina ichi daiɗiwãeɗeeba daiba jarasiɗau waa maka waurãamera.
39 Mauɗe Jesusba jarasii:
—Maka waurã́sturu. Chi mʉ trʉ̃ɗeeba ẽbẽrarãba ne poyaa wauɗakau wau ɓuuba mʉ ʉ̃rʉbena poyaa kachirua berreabai.
40 Chi dachi kĩramaawẽe dachi baara ɓuu.
41 Biawãra ara mʉʉba jaraaruu: machi mʉʉɗeɗeeba barikiuba machimaa bania deaɗakaaruubʉrã, Dachi Akõreba biawãra mau ẽbẽramaa ne bia deai.
Kaubaa kachirua wauɗai
Mateo 18:6-9; Lucas 17:1-2
42 »Barikiuba mʉʉɗe ijãa nuree chi mechiuwãe nureeɗebena aɓa kachiruaɗe ɓaebiiruubʉrã, Dachi Akõreba mau ẽbẽra ãrea kastikai. Mauɗeeba bibuara ɓuu mau ẽbẽra ostaɗe kũruma jʉ̃ɗapeɗa marɗe jirataɗai.
43 Bichi juaba bichimaa kachirua waubiiruubʉrã, mau ɓʉatutase. Bibuara ɓuu Dachi Akõre ome ewaricha juaswãe nii ɓuai, bichi jua omea inii tʉbʉchia aoko kuɓuu kiikaumaa wãi baɗamaarã.*
44 —.
45 Ara mau kĩra bichi jʉ̃rʉba bichimaa kachirua waubiiruubʉrã, mau ɓʉatutase. Bibuara ɓuu Dachi Akõre ome ewaricha jʉ̃rʉswãe nii ɓuai, bichi jʉ̃rʉ omea inii tʉbʉchia aoko kuɓuu kiikauɗe jiratai baɗamaarã.*
46 —.
47 Mauɗe bichi dauba bichimaa kachirua waubiiruubʉrã, mau ẽetase. Bibuara ɓuu dau ɓerrea nii ewaricha Dachi Akõre juaɗe ɓuai, dau omea inii tʉbʉchia aoko kuɓuu kiikauɗe jiratai baɗamaarã.
48 Aria kii biuɗakau baraa mauɗe chi aoko nuɓuu siɗa kiikau.*
49 Dachi ãrea biꞌiwãe panuuɗeeba Dachi Akõre baita biꞌia nureaɗai.*
50 Biawãra tã ãrea bibuara nii, maamina chi kuyaa wãꞌãeruubʉrã ¿saka waya chi kuyaa ɓeeima? Mauɗeeba Dachi Akõre baita biꞌia nureásturu.* Mauɗe ãbua jirukaraayuwãe nureásturu.
Notas
^ 9:1 Unuɗai Dachi Akõre poyaaɗeeba ichiɗirã ichi juaɗe ua ɓuu. Arakʉɗe kuitaaɗawẽa panuu kãare unuɗai. Chi nureemaarã jara ɓuu Jesús kĩra awara nuɓeei ʉ̃rʉbena unuɗai. Chi nureemaarã jara ɓuu Jesús chokae jiradui ʉ̃rʉbena, ichi bajãaɗaa wãi ʉ̃rʉbena maebʉrã Dachi Akõre Jauri neei ʉ̃rʉbena unuɗai.
^ Mateo 11:14; 17:11-12; Lucas 1:16-17.
^ Marcos 6:14-29.
^ 9:29 Mauɗe chiko koɗakau ewari wauɗai panuu. Griego beɗeaɗe chi ɓee kartaɗe mau wãꞌãe.
^ 9:37 Mʉʉɗe ijãa ɓuuɗeeba. Griego beɗeaɗe naka ɓʉ kuɓuu: Mʉ trʉ̃ɗe.
^ 9:43-44 Griego beɗeaɗe chi ɓee kartaɗe nau siɗa ɓʉ kuɓuu: Aria kii biuɗakau mauɗe chi tʉbʉchia kiikau.
^ 9:45-46 Griego beɗeaɗe chi ɓee kartaɗe nau siɗa ɓʉ kuɓuu: Aria kii biuɗakau mauɗe chi tʉbʉchia kiikau.
^ Isaías 66:24.
^ 9:49 Mau versículo aɓaeɗe arakʉɗe ɓuuwãe. Griego beɗeaɗe naka ɓʉ kuɓuu: Jomaurã tʉbʉ aokoba kuyaa nureaɗai.
^ 9:50 Mauɗeeba Dachi Akõre baita biꞌia nureásturu. Mau griego beɗeaɗe naka ɓʉ kuɓuu: Tãswãe nureásturu.
