Mateo 1:1-25
1 Nau karta Jesucristo ʉ̃rʉbena. Jesucristo dachi nabẽrarã Abrahamɗebena mauɗe dachi rey Israelɗebena David naka neesii.*
2 Abraham Isaac akõre basii.Isaac Jacob akõre basii.Jacob Judá akõre basii mauɗe chi ãbarãɗe.
3 Judá Fares akõre basii mauɗe Zaraɗe. Ãchi nawe Tamar basii.Fares Esrom akõre basii.Esrom Aram akõre basii.
4 Aram Aminadab akõre basii.Aminadab Naasón akõre basii.Naasón Salmón akõre basii.
5 Salmón Booz akõre basii mauɗe Rahab Booz nawe basii.Booz Obed akõre basii mauɗe Rut Obed nawe basii.Obed Isaí akõre basii.
6 Isaí Israelɗebena Rey David akõre basii.Rey David Salomón akõre basii mauɗe Urías wẽra Salomón nawe basii.*
7 Salomón Roboam akõre basii.Roboam Abías akõre basii.Abías Asá akõre basii.
8 Asá Josafat akõre basii.Josafat Joram akõre basii.Joram Uzías akõre basii.
9 Uzías Jotam akõre basii.Jotam Acaz akõre basii.Acaz Ezequías akõre basii.
10 Ezequías Manasés akõre basii.Manasés Amón akõre basii.Amón Josías akõre basii.
11 Josías Jeconías akõre basii mauɗe ichi ãbarã akõre. Maarã panabachiɗau Babilonia puuru biɗarãba israelɗebenarã poyaasiɗauɗe mauɗe ãchi druaɗaa adoesiɗauɗe.*
12 Maarã Babilonia puuruɗaa wãpeɗaaɗakare,Jeconías Salatiel akõre basii.Salatiel Zorobabel akõre basii.
13 Zorobabel Abiud akõre basii.Abiud Eliaquim akõre basii.Eliaquim Azor akõre basii.
14 Azor Sadoc akõre basii.Sadoc Aquim akõre basii.Aquim Eliud akõre basii.
15 Eliud Eleazar akõre basii.Eleazar Matán akõre basii.Matán Jacob akõre basii.
16 Jacob José akõre basii.José María kima basii.María Jesús nawe basii. Ara mau Jesús Dachi Akõreba Dachi Karibabarii deai jaraɗa abadau.
17 Abrahamɗeeɗebena imipeɗaaɗarã 14 panasiɗau Rey David chi naweba adauruuɗaa. Davidɗebena imipeɗaaɗarã 14 panasiɗau israelɗebenarã Babilonia puuruɗaa adoesiɗauɗaa. Mauɗe mamauba 14 panasiɗau Jesucristo chi naweba adauruuɗaa.
Jesucristo chi naweba adauɗa
Lucas 2:1-7
18 Jesucristo chi naweba adauɗa naka ɓuasii: chi nawe María beɗea dea ɓuasii José ome miakãiɗayu. Maamina José ome ãbua ɓeei naeɗe, Dachi Akõre Jauriba María warr baraabisii.
19 Chi kima José mukĩra jipa nibasiiɗeeba, María chũpea ɓʉi basii jomaurã daaɗe kachirua berreaɗamaaba.
20 Maka kʉ̃risia ɓuuɗe Dachi Mechiuɗe ángel kamokaraaɗe Josemaa neepeɗa naka jarasii: «José, rey Davidɗebena neeɗa, María warr adaui wapearã́se, mau wẽra warr baraasiiɗeeba Dachi Akõre Jauriɗeeba.
21 Mariaba warr aɓa adaui. Mau warrba ichi puuru ãchi kachiruaɗebena karibakuai. Mauɗeeba mau trʉ̃ Jesús ɓuse».
22 Mau joma makasii Dachi Mechiuba naa jaraɗa kĩra. Ichi baita berreabariiba naka jara ɓuasii:
23 «Wẽra mukĩra adua nii warr baraai maabae warr aɓa adaui.
Ẽbẽrarãba chi warr Emanuel trʉ̃aɗai».*
(Mau trʉ̃ jara ɓuu «Dachi Akõre dachi baara ɓuu»).
24 Mauɗe José kamokaraa ɓuaɗa ʉ̃rʉmapeɗa Dachi Mechiuɗe angelba jaraɗa kĩra wausii. Maka María warr adausii.
25 Maamina mau wẽra ome kãi ɓeebasii chi warr imina adauruuɗaa.* Chi warr adauɗakare Joseba chi trʉ̃ Jesús ɓusii.
