Mateo 11:1-30
11 Jesusba ichi baara nibabadaurã 12 panuumaa jaradeapeɗa arabena wãsii jaradeaɗakaɗe mau druaɗebena puurucha.
Juan chi Boro Eabarii ʉ̃rʉbena jaraɗa
Lucas 7:18-35
2 Juan chi Boro Eabarii chi jʉ̃abadau deɗe jʉ̃a ɓuasiiɗe ũrisii Dachi Akõreba Dachi Karibabarii deai jara ɓuaɗa wauruu ʉ̃rʉbena. Mauɗeeba ichi baara nibabadaurã ome bʉikasii Jesusmaa naka iɗiɗamera:
3 —¿Bichi chi neei ɓuaɗaka, maebʉrã june aɓa eseɗauɗai panuka?
4 Jesusba ãchimaa naka panausii:
—Machiba unu panuu mauɗe ũri panuu Juanmaa jaraɗe wã́sturu.
5 Dau pãriu nureaɗa unu panuu; nʉka nureaɗa biꞌia nuree; kakua chau nureaɗa aniɗapeɗa nuree; kʉʉrʉ kiape nureaɗa jãabae ũri panuu; biupeɗaaɗarã waya chokae nuree. Mau awara chi nejarr barauwãe nureerãmaa chi beɗea bia Dachi Akõre karibai ʉ̃rʉbena ũri panuu.*
6 Chi mʉʉɗe ijãai ida ɓukau nii biꞌia ɓuai.
7 Juanba bʉiɗarã wãsiɗauɗe Jesusba aria nureerãmaa Juan ʉ̃rʉbena nebʉrʉsii: «Drua sirua wãꞌãe ɓuuɗaa machiba Juan ichiaɗe wãsiɗauɗe ¿kãare unuɗai kʉ̃risiasiɗama? ¿Pũatuuruuba sia dodomia adoeruu kĩra maka unuɗai kʉ̃risiasiɗaka?
8 Maka kʉ̃risiaɗaabasii. Mau ¿kãare unuɗai kʉ̃risiasiɗama? ¿Ẽbẽra aɓaba paru mipitaa ãrea jʉ̃ nii unuɗai kʉ̃risiasiɗaka? Makawãema; chi ẽbẽra paru mipitaa jʉ̃ nureerã reyrã deɗe panabadau.
9 Mau ¿kãare unuɗai kʉ̃risiasiɗama? ¿Dachi Akõre baita berreabarii unuɗai kʉ̃risiasiɗaka? Maerã, Dachi Akõre baita berreabarii ichiaɗe wãsiɗau. Juan Dachi Akõre baita berreabarii chi mechiu nii.
10 Ichi ʉ̃rʉbena Dachi Akõre beɗeaɗe naka ɓʉ kuɓuu:
“Mʉ baita berreabarii bichi naa bʉiruu bichi o jaremera”.*
11 »Mʉʉba biawãra jaraaruu: nau druaɗe aɓa biɗa Juan audeara mechiu wãꞌãe.* Maamina Bajãaɗe Ɓuuba ichiɗirã ichi juaɗe ua ɓuuɗebena chi aude kaebeu nii ichi audeara chi mechiu nii.
12 Juan chi Boro Eabariiba jaradeaɗaɗeeɗebena iɗiiɗaa Bajãaɗe Ɓuuba ichiɗirã ichi juaɗe ua ɓuu, maarã ãrea biꞌiwãe panuu. Ẽbẽrarã kachiruarãba ãchi kachirua ãrea wau kʉ̃ria panuu.*
13 Dachi Akõre baita berreabadaurãba, Moisés biɗa chi Bajãaɗe Ɓuuba ichiɗirã ichi juaɗe ua ɓuai ʉ̃rʉbena berreabachiɗau aɓa Juan chi Boro Eabarii ewariɗaa.
14 Ãchiba jarabachiɗau aɓa Elías kĩra nii neei. Machiba kuitaaɗai kʉ̃ria panuubʉrã Juan Elías* chi neei a panaɗa; biawãra ichibʉ.
15 Chi kʉʉrʉ bara niiba kauwa ũrise.
16 »Iɗibaebena ẽbẽrarã, mʉʉba ¿kãare kĩra nuree jaraima? Puuruɗe warrarã jemene panuu kĩra nuree. Chi nureeba ɓia kopanuuba jarabadau:
17 “Daiba purrsiru chaasiɗauɗe machi baeraɗaabasii.Kari kĩra nomaa karisiɗauɗe machi jẽaɗaabasii”.
18 »Juan neesiiɗe kokau ewari waubachii mauɗe itua doka basii. Mauɗe ẽbẽrarãba jarabadau mau jai kachirua inii.
19 Maumaarã mʉ, chi Ẽbẽra Ba Ɓuaɗa, nee ɓuu. Mʉʉba ne joma kobarii mauɗe ne joma dobarii. Mauɗe machiba jarabadau mʉ chi ko ãrea nii mauɗe do ãrea nii. Mau awara jarabadau mʉ kachirua waubadaurã baara mauɗe Romaɗebena chi aude mechiu nii baita chi nejarra pebadaurã baara nibabarii. Maamina kuitaa panuu Dachi Akõre kʉ̃risia kuitaa jipa ɓuu, mau ijãa panuuba jipa waubadauɗeeba».
Jesusba ichi ijãawẽa nuree puuru iadaaɗa
Lucas 10:13-15
20 Maabae Jesusba waabenarã puuru iadaaɗaka koɓeesii. Maarã puuruɗe ichiba ẽbẽrarãba ne poyaa wauɗakau biꞌia wausmina ãchiba chi kachirua ida ɓuɗaabasii.
21 Naka jarasii:
—¡Corazín puuruɗebenarã mauɗe Betsaidaɗebenarã miichuburi nuree Dachi Akõreba kastikaiɗeeba! Mʉʉba machi tãeɗe ẽbẽrarãba ne poyaa wauɗakau ãrea wausii. Mʉʉba maka wauɗa basirã Tiroɗe mauɗe Sidonɗe, mau puuruɗebenarãba isa ãchi kachirua ida ɓuɗapeɗa Dachi Akõreɗe ijãaɗai basii.* Mauɗeeba paru parr jʉ̃ɗai basii mauɗe etaɓarr jora boro ʉ̃rʉ kuikuaɗai basii.
22 Maamina mʉʉba machimaa jaraaruu: Dachi Akõreba kastikai ewariɗe Tiroɗebenarã mauɗe Sidonɗebenarã audeara machi aude kastikai.
23 ¿Capernaumɗebenarã ʉtaa bajãaɗaa wãɗaika? ¡Wãɗaabai! ¡Dachi Akõreba machi chi biuɗarã panabadauɗe jirakuai!* Mʉʉba ẽbẽrarãba ne poyaa wauɗakau machi tãeɗe wauɗa Sodoma puuruɗe wauɗa basirã, jãu puuru wabiɗa ɓuai basii.*
24 Maamina mʉʉba jaraaruu: Dachi Akõreba kastikai ewariɗe Sodomɗebenarã audeara machi aude kastikai.
Jesusba ẽbẽrarã kʉrrjĩrubiaɗa
Lucas 10:21-22
25 Mau ewariɗe Jesusba jarasii: «Chacha, bichi bajãaɗebena Mechiu mauɗe nau iujãaɗebena Mechiu. Bichiba chi ne adua nureerãmaa mʉʉba jaradeaɗa kuitaabiasiiɗeeba mʉʉba bichi bia jarai. Ne kuitaa nureerãmaa bichiba kuitaabiabasii.
26 Maerã, Chacha, bichiba maka wausii maka waui kʉ̃ria ɓuasiiɗeeba.
27 »Mʉ Chachaba mʉʉmaa ara ichi ʉ̃rʉbena joma kuitaabisii. Aɓau biɗa adua panuu mʉ, chi Warr saka nii; aɓa mʉ Chacháburu kuitaa ɓuu. Ara mau kĩra aɓau biɗa adua panuu mʉ Chacha saka nii; aɓaburu mʉ, chi Wárrburu kuitaa ɓuu. Mʉʉba aɓaumaa mʉ Chacha kuitaabiiruubʉrã, mau ẽbẽraba kuitaai.
28 »Nejomaɗeeba kakua ãkaa panuubʉrã, mʉʉmaa nésturu. Mʉʉba machi kʉrrjĩrubiai.*
29 Mʉʉmaa ida adoebísturu. Mʉʉba ne jara ɓuu ũrísturu. Mʉ joma dauchia jãadua ɓuabarii mauɗe mʉ sõɗeeba waabenarã audeara kuitaa ɓuu a kʉ̃risiakau. Mʉʉmaa needuubʉrã machi biawãra kʉrrjĩrubiai.
30 Mʉʉba jaradea ɓuu chaareawãe ɓuu. Mʉʉba waubi ɓuu siɗa waui aude chaarea ɓuu».
Notas
^ Isaías 26:19; 35:5-6; 61:1-3.
^ Malaquías 3:1.
^ 11:11 Griego beɗeaɗe naka ɓʉ kuɓuu: Wẽrarãba warr adaupeɗaaɗaɗebena.
^ 11:12 Griego beɗeaɗe mau versículo june kʉ̃risia ɓuu. Waabenarãmaarã, mau jara ɓuu «Juan chi Boro Eabariiba jaradea ɓeeɗaɗebena iɗiɗaa Dachi Akõre puuruɗaa kĩrubadau eɗa wãɗai baita. Biawãra ẽbẽrarãba ne joma wau panuu Dachi Akõreba puuruɗebenarã baɗai baita».
^ 11:14 Elías. Dachi Akõre beɗea jarabarii basii. Dachi Akõre beɗea ɓʉɗaɗe jara ɓuu nau iujãa baribai naeɗe Elías waya neei israelɗebenarã tãeɗe. Malaquías 4:5.
^ 11:21 Dachi Akõreba Tiro mauɗe Sidón jisii. Amós 1:9-10.
^ 11:23 Biuɗarã panabadauɗe. Griego beɗeaɗe naka ɓʉ kuɓuu: Hades.
^ 11:23 Sodoma. Mau puuru mauɗe Gomorra Dachi Akõreba kastikasii. Génesis 18:16—19:29.
^ 11:28 Nejomaɗeeba kakua ãkaa panuu. Judiorã Moisesba ɓʉɗa jaradeabadauba ne chikʉa atoebi panuu kĩra ẽbẽrarãmaa ne chaarea waubibachiɗau. Mateo 23:4.
