Mateo 19:1-30
19 Maka jarasiiɗe Jesús Galilea druaɗebena Judea druaɗaa wãsii Jordán do kĩaraa.
2 Ẽbẽrarã ãrea ichi baara wãsiɗau. Aria chi ẽpermo nuree joma aribiabiasii.
3 Maka ɓuuɗe waabenarã fariseorã neesiɗau. Ichi kachirua berreabiɗai baita naka iɗisiɗau:
—¿Mukĩraba chi wẽra amaai biꞌia ɓuka ichi kʉ̃riaɗeeba?
4 Jesusba panausii:
—¿Machiba Dachi Akõre beɗeaɗe, nau eɗa jaraɗawẽa panuu kĩra? Nau drua wausiiɗe Dachi Akõreba mukĩra mauɗe wẽra wausii.*
5 Mauɗe jarasii: “Mauɗeeba mukĩraba chi akõre mauɗe chi nawe ɓʉipeɗa ichi wẽra ome ãbua ɓeei. Maka kakua ara aɓa nii kĩra nureaɗai”.*
6 Ãchi ome panuu kĩrawãe, maumaarã kakua aɓa nii kĩra nibaɗai. Mauɗeeba Dachi Akõreba chi araa ãbua ɓuɗa aɓau biɗa amaabai.
7 Mauɗeeba ãchiba iɗisiɗau:
—Makarã Moisesba ¿sakãe ɓusma wẽra amaai baita karta deai ɓuu, amaai naeɗe?*
8 Jesusba panausii:
—Machi sõ chaarea nureeɗeeba Moisesba maka ida ɓusii. Maamina Dachi Akõreba nau drua wausiiɗe maka kʉ̃riawẽa ɓuasii.
9 Mʉʉba jaraaruu: Barikiuba ichi wẽra junebena ome kãiwẽa ɓuu amaapeɗa, maabae junebena wẽra ome miakãiruubʉrã, mau mukĩraba kachirua wau ɓuu. [Junebena mukĩraba chi amaaɗa wẽra ome miakãiruubʉrã mau mukĩraba kachirua wau ɓuu mau wẽra ome.]*
10 Mauɗe Jesús baara nibabadaurãba ichimaa jarasiɗau:
—Maka ɓuubʉrã, mukĩra aɓa wẽra ome kãibai ɓuu.
11 Mauɗeeba Jesusba jarasii:
—Jomaurã poyaa du paneeɗaabai. Aɓaburu Dachi Akõre mau kʉ̃risia deaibʉrã poyaa du ɓuai.
12 Chi nureeba poyaa warr wauɗakau chi naweba chi warr adaupeɗaaɗaɗeeɗebena. Chi nureeba poyaa warr wauɗakau maka panabipeɗaaɗaɗeeba. Mauɗe waabenarãba miakãiɗai kʉ̃riaɗakau ãchi Mechiu Bajãaɗe Ɓuu baita ne wauɗai baita.* Machi poyaa du panuubʉrã, maka panásturu.
Jesusba warrarãmaa biꞌia jaraɗa
Marcos 10:13-16; Lucas 18:15-17
13 Maabae ẽbẽrarãba warrarã Jesusmaa adoesiɗau ichi jua maarã ʉ̃rʉ kuɓupeɗa Dachi Akõremaa ʉtaa iɗimera. Maamina Jesús baara nibabadaurãba chi mau warrarã adoepeɗaaɗarã iadaasiɗau.
14 Mauɗeeba Jesusba jarasii:
—Warrarã mʉʉmaa ida neebísturu, Bajãaɗe Ɓuuba ichiɗirã ichi juaɗe ua ɓuuɗerã naarã kĩra nureeɗeeba.
15 Maabae ichi jua warrarã ʉ̃rʉ kuɓupeɗa wãsii.
Barau nii Jesús ome berreaɗa
Marcos 10:17-31; Lucas 18:18-30
16 Ewari aɓauɗe kũudrãa Jesusmaa neesii. Mau kũudrãaba iɗisii:
—Jaradeabarii, Dachi Akõre ome ewaricha chokae ɓuai baita ¿mʉʉba kãare ne bia wauima?*
17 Jesusba panausii:
—¿Sakãe mʉʉmaa ne bia ʉ̃rʉbena iɗi ɓuma?* Aɓaburu Dachi Akõréturu biꞌia nii. Bichi Dachi Akõre ome ewaricha chokae ɓuai kʉ̃ria ɓuubʉrã, ichiba waubi ɓuu beɗea wause.
18 Ichiba iɗisii:
—¿Sãu?
Jesusba jarasii:
—Ẽbẽra bearã́se, junebena miakãiɗa ome kãi ɓeerã́se, nechiruarã́se, setaa jararã́se waabenarã ʉ̃rʉbena; bichi akõre, bichi nawe wapeadee nibase;* mauɗe waabenarã kʉ̃riáse ara bichi kʉ̃ria ɓuu kĩra.*
19 —.
20 Kũudrãaba jarasii:
—Mau joma wau ɓuu.* Mʉʉba ¿kãare maucha waui ɓuu?
21 Mauɗe Jesusba ichimaa jarasii:
—Bichi biawãra jipa ɓuai kʉ̃ria ɓuubʉrã, bichiba uru ɓuu joma nedobʉiɗe wãpeɗa chi nejarr barauwãe nureerãmaa deaɗakase. Maka bajãaɗe ne bia uru ɓuai. Maabae mʉ baara nibaɗe neese.
22 Kũudrãaba mau ũripeɗa kĩra nomaa wãsii ãrea chi nejarra barau niiɗeeba.
23 Mauɗe Jesusba ichi baara nibabadaurãmaa jarasii:
—Biawãra ãrea chaarea ɓuu ẽbẽra ne barau nii Bajãaɗe Ɓuu juaɗe ɓuai baita, ichiɗirã baara.
24 Waya mʉʉba jaraaruu: chaarea ãrea ɓuu barau nii Dachi Akõreba ichi juaɗe ua ɓuuɗe ɓuayu, camello aɓa ãkusa dauɗe wãi baɗamaarã.
25 Mauɗe ichi baara nibabadaurãba kãare kʉ̃risiaɗai adua basii, ãchiba Dachi Akõreba barau nuree aude kʉ̃riakua ɓuu kʉ̃risia panuuɗeeba. Ãchiba iɗisiɗau:
—Makarã Dachi Akõreba ¿kai karibaima?
26 Jesusba ãchi ichiapeɗa jarasii:
—Ẽbẽraba mau poyaa waukau maamina Dachi Akõreba poyaa joma waubarii.
27 Mauɗe Pedroba Jesusmaa jarasii:
—Daiba joma ɓʉisiɗau bichi baara wãɗai baita. ¿Maka ɓuubʉrã mau kuenda kãare adauɗaima?
28 Jesusba panausii:
—Mʉʉba biawãra jaraaruu: Dachi Akõreba ne joma chiwiɗi waui ewariɗe mʉ, chi Ẽbẽra Ba Ɓuaɗa mʉ rey ãkau biaɗe akʉ ɓeei. Mauɗe machi mʉ baara nibabadaurã 12 rey ãkauɗe akʉ paneeɗai Israelɗebena neepeɗaaɗa 12 puuru nebʉra ichiaɗai baita.
29 Mʉ kakua aɓauba ichi de, ãbarã, neekaurã, akõre, nawe, kima, warrarã mauɗe chi drua ɓʉiruubʉrã, ichiba ɓʉiɗa audeara 100 adaui mauɗe Dachi Akõre ome ewaricha chokae ɓuai.*
30 Maka chi naa nuree kaaɗe nureaɗai, mauɗe chi kaaɗeare nuree naa nureaɗai.
Notas
^ Génesis 1:27.
^ Génesis 2:24.
^ Deuteronomio 24:1-4.
^ 19:9 Griego beɗeaɗe chi ɓee kartaɗe beɗea corcheteɗe ɓuu wãꞌãe.
^ 1 Corintios 7:1-9.
^ 19:16 Griego beɗeaɗe chi ɓee kartaɗe ɓʉ kuɓuu: Jaradeabarii Bia.
^ 19:17 Sakãe mʉʉmaa ne bia ʉ̃rʉbena iɗi ɓuma. Griego beɗeaɗe chi ɓee kartaɗe naka ɓʉ kuɓuu: ¿Sakãe mʉ ẽbẽra bia nii a ɓuma?
^ Éxodo 20:12-16.
^ Levítico 19:18.
^ 19:20 Mau joma wau ɓuu. Griego beɗeaɗe chi ɓee kartaɗe ɓʉ kuɓuu: Mau joma wau ɓuu mʉ kũdrãaeɗebena.
^ 19:29 Kima. Griego beɗeaɗe chi ɓee kartaɗe mau wãꞌãe.
