Mateo 2:1-23
2 Belén puuruɗe Judea druaɗe chi naweba Jesús adausiiɗe Herodes chi Mechiu abadau chi rey basii.* Mau ewariɗe Jerusalén puuruɗe neesiɗau chi nuree ẽbẽrarã ʉmada neebariare. Maarã ẽbẽrarãba kuitaabachiɗau chi pusterrea kawa ichiaduuɗe.
2 Mauɗe ãchiba iɗisiɗau:
—Nau druaɗe judiorã rey bai ɓuu chi wãwa adausii. Mau ¿sama ɓuma? Daiba ʉmada neebariare pusterrea ichiɗebena unusiɗau.* Mauɗeeba dai neesiɗau ichimaa biꞌia berreaɗayua.
3 Herodesba mau beɗea ũrisiiɗe kĩra kachiruasii, ichíturu judiorã rey basiiɗeeba. Herodesba kãare waui adua panuuɗeeba, Jerusalenɗebenarã joma kĩra kachirua paneesiɗau.
4 Mauɗe Herodesba joma paare mechiurã mauɗe Moisesba ɓʉɗa jaradeabadaurã iubiapeɗa iɗikuasii:
—Dachi Akõreba Dachi Karibabarii deai jara ɓuaɗa ¿samaburu chi wãwa adaui ɓuma?*
5 Ãchiba panausiɗau:
—Belén puuru nau Judea druaɗe chi wãwa adaui ɓuu. Mau ʉ̃rʉbena Dachi Akõre baita berreabariiba naka jarasii:
6 Belén puuru chi aude kaebeuwãema chi Judeaɗebena puuru audeara.Mau puuruɗebena chi jaradea ua ɓuabarii aɓa neei.Mau jaradea ua ɓuabariiba mʉ puuru Israel nu uru ɓuai.*
7 Maabae Herodesba pusterrearã kuitaabadaurã mirubia iukuasii. Ãchimaa iɗisii chi pusterrea sakaeɗe unusiɗau chi wãwa adauɗa ewari kuitaaɗai baita. Mauɗe chi ewari jarasiɗau.
8 Ãchi Belenɗaa bʉikasiiɗe Herodesba jarasii:
—Aria baaduuɗe chi warr ʉ̃rʉbena biꞌia iɗísturu. Unuuduubʉrã, mʉʉmaa jaraɗe nésturu mʉa biɗa ichimaa biꞌia berreaɗe wãi baita.
9 Herodesba maka jarasiiɗe ãchi wãsiɗau. Maabae chi pusterrea ʉmada neebariare unu panaɗa waya unusiɗau. Unusiɗauɗe ãrea kĩrajʉʉsiɗau. Chi pusterrea ãchi naa kãribasii maabae apii nuɓeesii chi wãwa ɓuu kĩrapeta.
10 —.
11 Deɗe eɗa wãsiɗauɗe chi wãwa chi nawe María ome ɓuu unusiɗau. Ara makʉɗe õdarrɗeeba kopaneesiɗau maabae chi warr chekemaa biꞌia berreasiɗau. Maabae ãchicha ãchi ne pebadau ewaɗapeɗa chi wãwamaa nee, ne tuwaa mauɗe kera mirra deasiɗau.
12 Mau maaɗakare Dachi Akõreba kamokaraaɗe jarasii Herodesmaa wãɗaabai. Mauɗeeba o ãyare wãsiɗau ãchi druaɗaa.
Egipto druaɗaa miru wãpeɗaaɗa
13 Ãchi wãsiɗauɗe, Dachi Mechiuɗe ángel kamokaraaɗe neepeɗa Josemaa jarasii:
—Herodesba bichi wãwa jʉrʉ ɓuu beai baita. Jiradupeɗa bichi wãwa mauɗe chi nawe baara Egipto druaɗaa miru wã́sturu. Aria ɓeese aɓa mʉʉba jaraaruuɗaa.
14 Ara makʉɗe José jiradupeɗa, María mauɗe chi warr baara ẽsabuɗe Egiptoɗaa wãsiɗau.
15 Ãchi aria paneesiɗau aɓa Herodes biuruuɗaa. Joma makasii Dachi Mechiuba jaraɗa kĩra. Ichi baita berreabariiba naka jarasii: «Mʉʉba mʉ warr iusii Egipto druaɗebena neemera».*
Herodesba Belenɗebena warrarã kenabiaɗa
16 Herodesba kuitaasii pusterrea kuitaa jarabadaurãba ichi setaa kũruasiɗau. Maabae ãrea kĩrupeɗa Belenɗebena warrarã año ome baidia nuree joma kenabiasii. Ara kaitabena siɗa kenabiasii. Maka wausii pusterrea kuitaa jarabadaurãba pusterrea unupeɗaaɗa ewari ichimaa jarapeɗaaɗaɗeeba.
17 Maka joma biꞌiwãe panasiɗau Dachi Akõre baita berreabarii Jeremiasba jaraɗa kĩra. Naka jarasii:
18 «Ramá puuruɗe ũrisiɗau kĩruɗeeba kĩra nomaa jẽa ɓuu mauɗe jirukaraa jẽa ɓuu.Raquel ichi warrarã kakua maka jẽa ɓuasii.Ichiba kʉ̃ria ʉratʉɗai kʉ̃riabasii ichi warrarãswãe ɓeesiiɗeeba».*
José Egipto druaɗebena waya neeɗa
19 Herodes biuɗakare José wabiɗa Egiptoɗe ɓuasii. Mauɗe Dachi Mechiuɗe ángel ichimaa kamokaraaɗe unubisii.
20 Mauba maka jarasii:
—Bichi warr beaɗai kʉ̃ria panaɗa biusiɗau. Mauɗeeba jiradupeɗa chi warr, chi nawe baara waya Israelɗaa adoese.
21 Ara makʉɗe José jiradupeɗa ichi warr chi nawe baara Israelɗaa adoesii.
22 Maamina Joseba kuitaasii Arquelaoba ichi akõre Herodesba jaradea ua ɓuai baɗamaarã Arquelaóturu jaradea ua ɓuabarii ɓeeɗa. Mauɗeeba araa wãi wapeasii. Maamina Dachi Akõreba ichimaa kamokaraaɗeeba jaraɗaɗeeba Galilea druaɗaa wãsii.
23 Aria baaruuɗe Nazaret puuruɗe ɓuaɗe wãsii. Joma makasii Dachi Akõre baita berreabadaurã jarapeɗaaɗa kĩra: “Ichi Nazaretɗebena aɗai”.*
Notas
^ 2:1 Mau Herodes «chi Mechiu» abachiɗau. Ichi aɓaburu Mateo 2:1-22ɗe mauɗe Lucas 1:5ɗe unu panuu. Waabenarã ua ɓuabadaurã Herodes abadau ichiɗeeba neesiɗau.
^ Números 24:17.
^ 2:4 Dachi Akõreba Dachi Karibabarii deai jara ɓuaɗa. Mau griego beɗeaɗe naka ɓʉ kuɓuu: Cristo. Mau chi trʉ̃wãe. Arameo beɗeaɗe naka ɓʉ kuɓuu: Mesías.
^ Miqueas 5:2.
^ Oseas 11:1.
^ Jeremías 31:15.
^ 2:23 Ichi Nazaretɗebena aɗai. Nazaret trʉ̃ hebreo beɗeaɗe naka ɓʉ kuɓuu: Nezer. Mau beɗea jara ɓuu «bakuru tukuɗa». Isaías 4:2-6; 11:1-5; Jeremías 23:5-6; 33:14-18; Zacarías 3:8-10; 6:9-13.
