Mateo 21:1-46
21 Jerusalenɗe bamaa panuuɗe Betfagé puuruɗe, Olivo eaɗe neesiɗau. Mauɗe Jesusba ichi baara nibabadaurã ome panuu puuruɗaa bʉisii.
2 Maarãmaa naka jarasii: «Chi Dachi kĩraare puuru kuɓuumaa wã́sturu. Aria baaduuɗe burro wẽra warr bara nii jʉ̃ nuɓuu unuɗai. Enaɗapeɗa maabae omea mʉʉmaa enésturu.
3 Aɓauba machimaa sakãe jãka wau panuma a iɗiiruubʉrã, jarásturu: “Dachi Mechiuba naarã kʉ̃ria ɓuu. Maamina ichiba waya urubʉʉi”».
4 Mau makasii Dachi Akõre baita berreabariiba jaraɗa kĩra. Naka jarasii:
5 «Sión puuruɗebenarãmaa jarásturu:“Ichiásturu, machi Rey burro ʉ̃rʉ machimaa neeruu.Chi mechiu kĩra neewẽe. Burro cheke ʉ̃rʉ neeruu”».*
6 Ara makʉɗe ome Jesús baara nibabadaurã wãɗapeɗa Jesusba jaraɗa kĩra wausiɗau.
7 Burro wẽra, chi warr baara Jesusmaa adoeɗapeɗa ãchiba chi anaɓari jʉ̃badau burro ʉ̃rʉ kuɓusiɗau. Maabae Jesús chi mau ʉ̃rʉ akʉ ɓeesii Jerusalén puuruɗaa wãi baita.
8 Ẽbẽrarã ãrea panuuba ãchi anaɓari jʉ̃badau oɗe tõ ɓuikasiɗau, Jesús biꞌia irsibiɗayua. Waabenarãba bakuru jua kiruu bara ɓee tariɗapeɗa oɗe tõbʉikabachiɗau.
9 Mauɗe ãrea ẽbẽrarã ichi naa nibapeɗaaɗaba, ichi kaaɗe needuu biɗa maka ɓiasiɗau:
¡Biꞌia nii Davidɗebena neeɗa!¡Ãrea biꞌia nii chi Dachi Mechiu trʉ̃ɗeeba neeruu!* ¡Biꞌia nii chi Bajãaɗe Ɓuu!
10 Jesús Jerusalenɗe neesiiɗe, puuruɗebenarã joma ɓiuka bara ɓeesii. Naka iɗibachiɗau:
—Jãu ¿kaima?
11 Iɗiiduucha Jesús ome neepeɗaaɗarãba panausiɗau:
—Jãu Jesusbʉ, Dachi Akõre baita berreabarii. Ichi Nazaret puuruɗebena, Galilea druaɗebenabʉ.
Jesusba ne kaebea nedobʉibadaurã duabʉikaɗa
Marcos 11:15-19; Lucas 19:45-48; Juan 2:13-22
12 Mau maaɗakare Jesús Dachi Akõre de mechiu duɗaa wãsii. Aria ne kaebea nedobadaurã mauɗe nedobʉibadaurã unusiiɗe,* ãchi duabʉika koɓeesii.* Aria chi nejarra nedobʉibadaurã mesa ɓee, paloma nedobʉibadaurã akʉ paneebadau joma korekuasii.*
13 Ãchimaa naka jarasii:
—Dachi Akõre beɗeaɗe naka ɓʉ kuɓuu: “Mʉ de, chi ʉtaa iɗibadau de aɗai”. Maamina machiba “nechiruabadaurã de choɓea kĩra” uru panuu.*
14 Jesús Dachi Akõre de mechiu duɗa ɓuasiiɗe dau pãriu nuree mauɗe jʉ̃rʉ nʉka nuree ichimaa imisiɗau. Mauɗe ãchi aribiabiasii.
15 Maamina Jesusba aria ẽbẽrarãba ne poyaa wauɗakau wauruuɗe, warrarã Dachi Akõre de mechiuɗe panaɗaba Jesusmaa naka jĩwa jarasiɗau: «¡Biꞌia nii Davidɗebena neeɗa!» Chi paare mechiurãba mauɗe Moisesba ɓʉɗa jaradeabadaurã biɗa mau unusiɗauɗe,* kĩrusiɗau.
16 Ãchiba Jesusmaa naka jarasiɗau:
—¿Nau warrarãba jara panuu bichiba biꞌia ũri ɓuka?
Jesusba panausii:
—Maerã. ¿Machiba nau beɗea eɗa jaraɗawãe panuu kĩra?
“Bichiba warrarã mauɗe ju do nuree ɓusii bichimaa biꞌia berreaɗamera”.*
17 Maabae Jesusba ãchi ɓʉipeɗa Jerusalenɗebena Betania puuruɗaa kãi ɓuaɗe wãsii.
Jesusba higo bakuru iadaaɗa
Marcos 11:12-14,20-26
18 Norema dapeɗe Jesús waya Jerusalenɗaa wãsii. Wãaruuɗe jarrbisia koɓeesii.
19 Mauɗe higo bakuru aɓa o kaita unusii.* Maamina araa neesiiɗe bari kirúturu nuɓuu unusii.* Mauɗeeba higo bakurumaa jarasii:
—¡Bichira jãabae chauwẽa ɓuai!
Ara makʉɗe higo bakuru poasii.
20 Jesús baara nibabadaurãba mau unusiɗauɗe pera duanuu kĩra duaneesiiɗeeba iɗisiɗau:
—¿Sakãe jãu higo bakuru isa poasma?
21 Jesusba panausii:
—Biawãra mʉʉba jarakuaruu: machiba iɗi panuu Dachi Akõreba biawãra waui ijãaduubʉrã, mauɗe ichiba poyaa waubai ɓuu kʉ̃risiaɗawẽebʉrã, mʉʉba jãu higo bakurumaa wausii kĩra audeara wauɗai. Machiba nau eamaa jãmabena marɗe ɓaeɗe wã́baɗe aaduubʉrã, machiba jaraaduu kĩra makai.
22 Joma machiba Dachi Akõremaa ʉtaa iɗiiduu biawãra adauɗai ijãaduubʉrã, mau adauɗai.
¿Kai trʉ̃ɗeeba Jesusba jaradeaɗa?
Marcos 11:27-33; Lucas 20:1-8
23 Jesús waya Dachi Akõre de mechiu kaita neepeɗa jaradea ɓeesii. Maka ɓuuɗe paare mechiurã mauɗe judiorã mechiurã ichimaa neeɗapeɗa ichimaa iɗisiɗau:
—Bichiba nama wau ɓuu ¿kaiba naka waubi ɓuma?*
24 Jesusba panausii:
—Mʉa biɗa machimaa iɗiiruu. Machiba panauduubʉrã mʉʉba jarai kaiba mʉʉmaa naka waubi ɓuu.
25 ¿Juan samareeba neesma boro eamera? ¿Bajãaɗe Ɓuuba mau bʉiska, maebʉrã nau iujãaɗebenarãba?* ¿Ẽbẽraba maebʉrã Bajãaɗe Ɓuuba?
Mauɗe ara ãchi chiya berrea bara ɓeesii: «Bajãaɗe Ɓuuba bʉisii aaduubʉrã, ichiba jaraaruu: “Mau ¿sakãe ijãaɗaabasma?”
26 Maamina ¿saka jaraɗaima mau ẽbẽrarãba bʉipeɗaaɗa?»
Chi ẽbẽrarã wapea panasiɗau, Juan biawãra Dachi Akõre baita berreabarii basii a kʉ̃risiasiɗauɗeeba.
27 Mauɗeeba Jesusmaa jarasiɗau:
—Daiba adua panuu.
Mauɗe Jesusba jarasii:
—Maka ɓuubʉrã mʉa biɗa machimaa jaraabai kaiba mʉʉmaa naka waubi ɓuu.
Warr ome ʉ̃rʉbena
28 Maka panuuɗe Jesusba paare mechiurãmaa, judiorã mechiurãmaa biɗa jarasii:
—Machiba nau nebʉrʉ ʉ̃rʉbena ¿saka kʉ̃risia panuma? Ẽbẽra ɓuasii. Mau ẽbẽraba warr ome uru ɓuasii. Ewari aɓauɗe chi naa ɓuumaa naka jarasii: “Warr, mʉ uva uu nuɓuuɗaa trajaɗe wãse”.
29 Mauɗe chi warrba panausii: “¡Mʉ wãwẽma!” Maamina waya kʉ̃risiapeɗa trajaɗe wãsii.
30 Mau maaɗakare chi akõreba chi aɓabena warrmaa araɓauɗe jarasii. Mauɗe chi warrba panausii: “Chacha, mʉ wãaruma”. Maamina wãabasii.
31 Mau machimaarã, chi omeɗebena ¿sãuba chi akõreba kʉ̃ria ɓuaɗa wausma?
Ãchiba panausiɗau:
—Chi naa ɓuuba.
Mauɗe Jesusba ãchimaa jarasii:
—Maerã. Maamina biawãra mʉʉba jaraaruu: Romaɗebena baita chi nejarra pebadaurã mauɗe wẽrarã auɗuabadaurã machi audeara Dachi Akõreba ichiɗirã ichi juaɗe ua ɓuabariiɗe paneeɗai.*
32 Juanba jaradeaɗakaɗe nee ɓuasii, ãchi jipa nureaɗamera, maamina ijãaɗaabasii. Maamina Romaɗebena baita chi nejarra pebadaurãba mauɗe wẽrarã auɗuabadaurãba ijãasiɗau. Mauɗe machiba mau unusiɗamina machi kachirua wauɗai ida ɓuɗaabasii, ichi beɗea ijãaɗai baita.
Trajabadaurã kachiruarã ʉ̃rʉbena nebʉrʉɗa
Marcos 12:1-12; Lucas 20:9-19
33 »Ũrísturu. June nebʉrʉʉruu. Ẽbẽra aɓa ɓuasii. Ewari aɓauɗe mau ẽbẽraba uva uusii* maabae mokaraba aɗu karaasii. Aria choɓea korosii chi uva barasui baita. Mauɗe de ʉtʉ wausii mamauba joma ichiai baita. Maabae ichi uva uu nuɓuu waabenarã ẽbẽrarã juaɗe ɓusii. Maarã ome beɗea deasiɗau chi uva uuɗa chauruuɗe sãabe ichimaa deaɗai panuu. Maka beɗea deaɗapeɗa chi chibari ãibena druaɗaa wãsii.
34 Maabae chi uva waraa nuɓeeruuɗe chi chibariba chi trajabadaurã bʉikasii chi uu nuɓuu ʉ̃rʉbena ichimaa deaɗai panuu adoeɗe wãɗamera.
35 Maamina chi uu nuɓuu nubadaurãba mau trajabadaurã jidausiɗau. Aɓa sĩsiɗau, aɓa beasiɗau mauɗe aɓa mokaraba ɓata duabʉisiɗau.
36 Mau maaɗakare chi chibariba june waabena trajabadaurã bʉikasii. Maarã chi naa wãpeɗaaɗa audeara panasiɗau, maamina chi uu nuɓuu nubadaurãba maarã siɗa araɓauɗe kachirua wausiɗau.
37 »Kaaɗaa chi chibariba ichi warr ãchimaa bʉisii. Naka kʉ̃risiasii: “Ãchi mʉ warr wapeadee panaɗai ɓubaa”.
38 Maamina ãchiba mau warr unusiɗauɗe ãchi chiya jarasiɗau: “Jãuba ichi akõre ne kaebea joma adaui chi akõre biuruuɗe. ¡Jãu beáduru! Makaburu chi drua dachi baita ɓeei”.
39 Ara makʉɗe chi warr jidauɗapeɗa chi uuɗaɗebena wãbiɗapeɗa, beatasiɗau.
40 Jãu chibari neeruuɗe chi uuɗa nubadaurã ome ¿kãare sãaibaama?
41 Mauɗe paare mechiurãba mauɗe judiorã mechiurãba naka panausiɗau:
—Ichiba kĩra chuburiawẽa mau ẽbẽrarã kachiruarã kenapeɗa, waabena ẽbẽrarã ome beɗea deai chi uuɗa nuɗamera. Mau ẽbẽrarãba ichi uuɗaɗebena deaɗai panuu chi uva waraa nuɓeeruuɗe deaɗai.
42 Mauɗe Jesusba ãchimaa jarasii:
—Ara mau kĩra Dachi Akõreba machi audeara waabenarã ichi juaɗe ua ɓuai. Maarãburu ichiba kʉ̃ria ɓuu wauɗai. Machiba ¿Dachi Akõre beɗea eɗa jaraɗawẽa panuu kĩra? Naka jara ɓuu:
“Chi mo chi de waubadaurãba ida ɓupeɗaaɗa, mau chi biara ɓeesii.Dachi Mechiuba maka wauɗaɗeeba dachimaarã ãrea biꞌia ɓuu”.*
43 —.
44 Barikia chi mau mokara ʉ̃rʉ ɓaeruubʉrã joma ãrii, mauɗe mau mokara ẽbẽra ʉ̃rʉ ɓaeruubʉrã berpetai.*
45 Paare mechiurãba mauɗe fariseorãba mau nebʉrʉɗa ũrisiɗauɗe kuitaasiɗau Jesusba ãchi ʉ̃rʉbena berrea ɓuu.
46 Mauɗeeba ãchiba Jesús jidau kʉ̃ria panasiɗau. Maamina puuruɗebenarã wapea panuuɗeeba ida ɓusiɗau. Puuruɗebenarãba kʉ̃risia panasiɗau Jesús Dachi Akõre baita berreabarii.
Notas
^ Zacarías 9:9.
^ 21:9 Biꞌia nii. Arameo beɗeaɗe jarabadau «Hosanna». Salmos 118:25-26.
^ 21:12 Ne kaebea nedobadaurã. Dachi Akõre de mechiu duɗa ne kaebea nedobachiɗau, ẽbẽrarãba ne kaebea deaɗamera Dachi Akõremaa.
^ Zacarías 14:21.
^ 21:12 Chi nejarra nedobʉibadaurã. Mau ewariɗe Dachi Akõre de mechiuɗe chi nejarra nedobachiɗau ẽbẽrarã ãibena druaɗebena imiiduurãmaa, mau chi nejarra ãibena druaɗebena deabai ɓuasiiɗeeba Dachi Akõremaa.
^ 21:13 Mʉ de, chi ʉtaa iɗibadau de aɗai. Isaías 56:7. Nechiruabadaurã de choɓea kĩra. Jeremías 7:11.
^ 21:15 Judiorãba jarabachiɗau dau pãriu nuree, jʉ̃rʉ nʉka nuree siɗa Dachi Akõre de mechiuɗaa wãɗaabai ɓuasii. 2 Samuel 5:8.
^ Salmos 8:2.
^ 21:19 Dachi Akõre beɗeaɗe chi higo bakuru Israel puuru a jara ɓuu.
^ 21:19 Israel druaɗe higo jõ kaebeu marzoɗe mauɗe abrilɗe poyaa koɗai panuu. Chi ne jõ kaebeu unuuduubʉrã kuitaabadau junioɗe ɓistĩika chaui, mauɗe agostoɗebena octubreɗaa ãrea chaui. Jesusba bari kirúturu nuɓuu unusiiɗeeba kuitaasii joma mau añoɗe chi higo bakuru chaubai.
^ 21:23 Bichiba nama wau ɓuu. Mau jara ɓuu Jesusba ne kaebea nedobʉibadaurã duabʉikaɗa, maebʉrã saka Jesús Jerusalenɗe neeɗa, ichiba dau pãriu nuree, jʉ̃rʉ nʉka nuree siɗa Dachi Akõre de mechiu kaita aribiabiaɗa, maebʉrã puuru ʉ̃rʉbena jaradea ɓuu.
^ Mateo 3:1-12; Juan 1:6-28.
^ 21:31 Dachi Akõreba ichiɗirã ichi juaɗe ua ɓuabariiɗe paneeɗai. Griego beɗeaɗe naka ɓʉ kuɓuu: Dachi Akõreba ichiɗirã ichi juaɗe ua ɓuabariiɗe naa wãɗai.
^ Isaías 5:1-7.
^ Salmos 118:22-23.
^ 21:44 Griego beɗeaɗe chi ɓee kartaɗe mau versículo wãꞌãe. Mo. Isaías 8:14-15; Daniel 2:34-35,44-45.
