Mateo 22:1-46
22 Jesusba paare mechiurãmaa mauɗe judiorã mechiurãmaa waya jaradeamaa ɓuuɗe nebʉrʉsii:
2 «Bajãaɗe Ɓuuba ichiɗirã ichi juaɗe ua ɓuu nau kĩra ɓuu: Rey aɓa ɓuasii. Ichi warr miakãiɗai kĩrajʉʉ bara ɓuabarii ewari waui kʉ̃risia ɓuasii.
3 Chi reyba chi trajabadaurã bʉikasii chi ichiba iuɗarã adoeɗe wãɗamera. Maamina neei kʉ̃riaɗaabasii.
4 »Maabae waabena trajabadaurã bʉikaaruuɗe naka jarasii: “Ẽbẽrarã mʉʉba iuɗarãmaa jaraɗe wã́sturu neeɗamera chi chiko noe poeɗeeba. Paka mukĩra aɓa beabisii mauɗe waabenarã ãnimararã chi aude borea duanaɗa. Mau joma chuu nuɓeesiiɗeeba, urústuru chi miakãiduu kĩrajʉʉ bara ɓuabarii ewariɗe kooduuɗaa”.
5 Maamina ichiba iuɗarãba ijãaɗaabasii. Aɓa ichi peaɗaa wãsii. Mauɗe aɓa ichiba nedoɗokabariimaa wãsii.
6 Waabenarãba chi trajabadaurã jidauɗapeɗa sĩɗapeɗa beasiɗau.
7 Mauɗeeba chi rey ãrea kĩrusii. Ichi kokoroarã bʉikapeɗa mau mia beabadaurã kenaɗapeɗa ãchi puuru baa bʉisiɗau.
8 »Mau maaɗakare chi reyba chi trajabadaurãmaa jarasii: “Mʉ warr miakãiɗai kĩrajʉʉ bara ɓuabarii ewari joma wausii maamina chi mʉʉba iuɗarã nama neeɗaabai panuu.
9 Mauɗeeba waabena ẽbẽrarã o ɓeecha jʉrʉɗe wã́sturu. Machiba unuuduurãmaa jarásturu mʉ warr miakãiɗai kĩrajʉʉ bara ɓuabarii ewariɗaa neeɗamera”.
10 Ara makʉɗe chi trajabadaurã o ɓeecha wãsiɗau. Ẽbẽra bia nureerã mauɗe chi kachirua nureerã ãrea neesiɗau. Maka chi de mechiu ẽbẽrarãba pĩchuka koɓeesii.
11 »Chi reyba iuɗarã unuɗe wãsiiɗe ẽbẽra aɓa paru miakãibadauɗe jʉ̃badau jʉ̃wẽa ɓuu unusii.
12 Chi reyba mau ẽbẽramaa iɗisii: “Kõpaero, bichi ¿sakãe nama eɗa nee ɓuu kapipia jʉ̃wẽa ɓuma?” Chi ẽbẽra chũpeasii.
13 Mauɗe chi reyba chi trajabadaurãmaa jarasii: “Nau ẽbẽra jua mauɗe jʉ̃rʉ bʉraɗapeɗa awara pãriuɗaa jiratásturu. Aria kĩra nomaa jẽa panaɗai mauɗe puꞌuaba kiɗa kʉrrʉa ko panaɗai”.
14 Dachi Akõreba ãrea iukua ɓuu, maamina ɓaꞌãraburu pekuai».
Romaɗebena baita chi nejarra paaɗai ʉ̃rʉbena jaradeaɗa
Marcos 12:13-17; Lucas 20:20-26
15 Mau maaɗakare fariseorãba beɗea deasiɗau Jesusmaa ãi berreabiɗayua.
16 Mauɗeeba fariseorãba ãchi baara nibabadaurã mauɗe Herodes jãkaa panuurã Jesusmaa bʉisiɗau. Maarãba Jesusmaa jarasiɗau:
—Jaradeabarii, daiba kuitaa panuu bichi ẽbẽra jipa nii. Aɓau biɗa bichimaa awara kʉ̃risiabikau, bichiba joma ẽbẽrarã araɓauɗe unubariiɗeeba. Maumaarã biawãra Dachi Akõre o ʉ̃rʉbena jomaurãmaa jaradeabarii.
17 Maka ɓuubʉrã daimaa jarase, Romaɗebena baita chi nejarra paai ɓuu ¿dachi judiorãba paaɗai ɓuka maebʉrã ¿biꞌiwãe ɓuka?
18 Jesusba kuitaa ɓuasii ichi setaa kũrua panuu, mau nebʉraɗe ɓaebiɗayua. Naka jarasii:
—Machi setaa ẽbẽra bia nuree abadau, ¿sakãe mʉ kachirua berreabi kʉ̃ria panuma?
19 Parata sẽetao dachiba paabadau aɓa unubísturu.
Ara makʉɗe sẽetao aɓa unubisiɗau.*
20 Jesusba ichiapeɗa iɗisii:
—¿Kai kĩedarrma nau sẽetaoɗe ɓuu? ¿Kai trʉ̃ ɓʉ kuɓuma?
21 Ãchiba panausiɗau:
—Romaɗebena chi aude mechiu niiɗe.
Maabae Jesusba jarasii:
—Maka ɓuubʉrã deásturu Romaɗebena chi aude mechiu niimaa chi mauba iɗiiruu, mauɗe ara mau kĩra deásturu Dachi Akõremaa chi mauba iɗiiruu.
22 Mau ũrisiɗauɗe adua panasii kãare kʉ̃risiaɗai. Ara makʉɗe ãyaa wãsiɗau.
Chokae jiraduɗai ʉ̃rʉbena Jesusba jaraɗa
Marcos 12:18-27; Lucas 20:27-40
23 Ara mau ewariɗe waabenarã saduceorã Jesusmaa neesiɗau. Saduceorãba jarabadau biupeɗaaɗa chokae jiraduɗakau.* Mauɗeeba Jesusmaa naka jarasiɗau:
24 —Jaradeabarii, Moisesba jarasii ẽbẽra aɓa warrwãe ɓuuɗe biuruubʉrã, ichi ãbaba chi pẽdrãa wẽra adaui ɓuu chi ãba biuɗa baita warr adaui baita.*
25 Earaɓa dairãɗe 7 ãbarã panasiɗau. Chi nabena miakãisii, maamina warr deawẽeɗe biusii. Maka chi wẽra chi mawãarebena ãba ome ɓeesii.
26 Maamina mau siɗa warrwãe biusii. Mau maaɗakare chi mawãarebena ãba araɓauɗe makasii. Joma mau 7 panaɗa araɓauɗe makasiɗau.
27 Mau maaɗakare chi wẽra siɗa biusii.
28 Mau 7 ãbarãba araɓau wẽra ome miakãisiɗau. Makarã chokae jiraduɗai ewariɗe ¿sãu ãbaba mau wẽra uru ɓuaima?
29 Mauɗeeba Jesusba panausii:
—Machiba Dachi Akõre beɗea mauɗe chi poyaabarii adua panuuɗeeba biꞌia kʉ̃risiaɗawẽa panuu.
30 Ũrísturu. Biupeɗaaɗarã chokae jiraduɗai ewariɗe kima adauɗaabai mauɗe aɓau biɗa wẽra deaɗaabai miakãimera, maumaarã Dachi Akõre angelerã kĩra nureaɗai.
31 Dachi Akõreba biupeɗaaɗarã chokae jiradubadau ʉ̃rʉbena jaraɗa ¿machiba eɗa jaraɗawẽa panuka?
32 Naka jarasii: “Mʉ Abraham Akõre Mechiubʉ, Isaac Akõre Mechiubʉ mauɗe Jacob Akõre Mechiubʉ”.* Mau chi biupeɗaaɗa Akõre Mechiuwãe, maumaarã chokae nuree Akõre Mechiubʉ.
33 Jesusba maka jaradea ɓuu mau ũrisiɗauɗe, ẽbẽrarãba adua panasii kãare kʉ̃risiaɗai.
Dachi Akõre waubi ɓuu beɗea chi aude mechiu ɓuu
Marcos 12:28-34
34 Fariseorãba kuitaasiɗau Jesusba saduceorã chũpeabiaɗa. Mauɗeeba ãchi araa ãbua imiɗapeɗa Jesusmaa wãsiɗau.
35 Aɓa Moisesba ɓʉɗa jaradeabarii basii.* Mauba Jesús kachirua berreabiɗayua naka iɗisii:
36 —Jaradeabarii, Dachi Akõreba waubi ɓuu beɗeaɗebena ¿sãu chi aude mechiu ɓuma?
37 Maabae Jesusba naka panausii:
—Chi naa ɓʉɗa beɗea naka jara ɓuu: “Joma bichi sõɗeeba, joma bichi jauriɗeeba mauɗe joma bichi kʉ̃risiaɗeeba bichi Akõre Mechiu kʉ̃riáse”.* Dachi Akõreba waubi ɓuu beɗeaɗebena mau chi nabenabʉ mauɗe chi aude mechiubʉ.
38 —.
39 Mauɗe mawãare ɓuu ara mau kĩra ɓuu. Mauba naka jara ɓuu: “Waabenarã kʉ̃riáse ara bichi kʉ̃ria ɓuu kĩra”.*
40 Mau kʉ̃risia ome aude panuu dachiba ijãaduubʉrã, joma Moisesba ɓʉɗa mauɗe Dachi Akõre baita berreabadaurãba ɓʉpeɗaaɗa wauɗai.
Dachi Akõreba Dachi Karibabarii deai jaraɗa ¿kai warrma?
Marcos 12:35-37; Lucas 20:41-44
41 Fariseorã wabiɗa jãma panuuɗe Jesusba ãchimaa iɗisii:
42 —Machimaarã, Dachi Akõreba Dachi Karibabarii deai jaraɗa ¿kai warrma?
Ãchiba panausiɗau:
—Davidɗebʉ.
43 Mauɗe Jesusba iɗisii:
—Maka ɓuubʉrã, Davidba ¿sakãe Dachi Akõre Jauriɗeeba mau mʉ Mechiu nii asma? Davidba naka jarasii:
44 Dachi Akõre Mechiuba mʉ Mechiu niimaa jarasii: mʉ jua biare akʉ ɓeese aɓa bichi kĩramaarã mʉʉba joma bichi juaɗe ɓuuruuɗaa.*
45 Dachi Akõreba Dachi Karibabarii deai jaraɗa Davidba mʉ Mechiu nii a ɓuubʉrã, ¿saka David warr baima?
46 Mauɗe aɓau biɗa Jesusmaa poyaa panauɗaabasii. Makaeɗebena aɓauba Jesusmaa waya iɗiɗai kʉ̃riaɗaabasii.
