Romanos 1:1-32
1 Mʉ Pablobʉ, Jesucristo baita bari trajabariibʉ. Dachi Akõreba mʉ jʉrʉ adausii Jesucristoba bʉiɗa ɓuamera mauɗe ɓusii chi beɗea bia Dachi Akõre ʉ̃rʉbena jaradeaɗe wãmera.
2 Mau beɗea bia Dachi Akõreba nabẽraeɗe deai jara ɓuasii. Ichi baita berreabadaurãba mau ʉ̃rʉbena Ichi Beɗea arakʉɗe ɓʉsiɗau.
3 Mau beɗea bia ichi Warr ʉ̃rʉbena jara ɓuu. Ichi Warr Dachi Mechiu Jesucristo nau kakuaɗe Israelɗebena rey Davidɗebena neeɗabʉ.* Mauɗe ichi biu ɓuaɗa chokae jiradusiiɗe Dachi Akõre Jauriba unubisii mau Dachi Akõre Warr joma poyaa nii.*
4 —.
5 Jesucristoɗeeba Dachi Akõreba mʉ ɓusii ichiba bʉiɗa ɓuamera. Ichiɗeeba maka ɓusii joma druachabenarãba Jesucristoɗe ijãaɗamera, ichi beɗea wauɗamera mauɗe ichimaa biꞌia berreaɗamera.
6 Machi siɗa Dachi Akõreba iusii Jesucristoɗe nureaɗamera.
7 Mʉʉba nau karta ɓʉʉruu joma Romaɗebena ãbarã baita. Dachi Akõreba machi kʉ̃ria ɓuu mauɗe iusii ichi ẽbẽrarã nureaɗamera. Mʉʉba kʉ̃ria ɓuu Dachi Bajãaɗebena Akõreba Dachi Mechiu Jesucristo ome ãchi sõbiaɗeeba machi aiɗa panaɗai mauɗe jirukaraayuwãe panabiaɗai.
Pablo Romaɗaa wã kʉ̃ria ɓuaɗa
8 Naa mʉʉba jaraaruu: Jesucristoɗeeba mʉʉba joma machi baita Dachi Akõremaa ichíturu kiɗibai abarii machiba Jesucristoɗe ijãa panuu ʉ̃rʉbena druachabenarãba berrea panuuɗeeba.
9 Dachi Akõreba kʉ̃ria ɓuu joma mʉ sõɗeeba wau ɓuu chi beɗea bia ichi Warr ʉ̃rʉbena jaradea ɓuuɗeeba. Ichiba kuitaa ɓuu mʉʉba ʉtaa iɗiiruucha machi baita ʉtaa iɗibarii.
10 Mʉʉba ʉtaa iɗibarii ichiba kʉ̃ria ɓuubʉrã mʉ ida machi ichiaɗe wãbimera.
11 Biawãra mʉʉba machi ichia kʉ̃ria ɓuu Dachi Akõre Jauriɗeeba aiɗai baita. Maka machi karr chaarea nureaɗai.
12 Mʉʉba kʉ̃ria ɓuu dachiba araɓau Cristoɗe ijãa panuuɗeeba chiya aiɗa panaɗai karr chaarea panaɗai baita.
13 Ãbarã, mʉʉba kʉ̃ria ɓuu machiba kuitaaɗai biawãra ɓes ãrea machimaa wãi kʉ̃risia ɓuabarii. Maamina wabiɗa poyaa wãwẽa ɓuu. Machimaa wã kʉ̃ria ɓuu mʉʉba jaradea ɓuuɗeeba arabenarãba Jesucristoɗe ijãaɗamera waabenarã druaɗebenarãba ijãapeɗaaɗa kĩra.*
14 Mʉʉba chi beɗea bia Jesús ʉ̃rʉbena jomaurãmaa jaradeai ɓuu. Ne kuitaa nureerãmaa, ne adua nureerãmaa, karta kuitaa nureerãmaa mauɗe karta adua nureerãmaa jaradeai ɓuu.* Mauɗeeba machi Romaɗebenarãmaa biɗa jaradeaɗe wã kʉ̃ria ɓuu.
15 —.
16 Mʉ kĩra nejasiakau chi beɗea bia Jesús ʉ̃rʉbena jaradeai baita, chi mau beɗea ijãaduu Dachi Akõreba ichi poyaaɗeeba joma karibabariiɗeeba; naa judiorã karibai mauɗe judiowãerã siɗa.
17 Mau beɗea biaɗeeba Dachi Akõreba kuitaabia ɓuu dachi karibai, ichiba jara ɓuu kĩra.* Jesucristoɗe ijãaruubʉrã maka ɓuai. Dachi Akõre beɗeaɗe naka ɓʉ kuɓuu:
«Chi jipa nii, Dachi Akõreɗe ijãa niiɗeeba chokae nibai».*
Ẽbẽrarã Dachi Akõre daaɗe nebʉra bara nuree ʉ̃rʉbena
18 Dachi Akõreba bajãaɗebena kuitaabi ɓuu kachirua wau nuree mauɗe jipawãe nuree ichi kĩrubiɗeeba mau joma kastikai. Ãchiba kachirua wau panuuɗeeba chi biawãra beɗea ida kuitaabiɗakau.
19 Dachi Akõre ʉ̃rʉbena poyaa kuitaaɗai ɓuu ãchiba mau ãrea kuitaa panuu, ichiba mau kuitaabia ɓuuɗeeba.
20 Nau iujãa wausiiɗeeɗebena, maarãba chi ichiba wauɗa unu panuuɗeeba kuitaa panuu ichi ewaricha ne joma poyaa waubarii mauɗe ichi Dachi Akõre. Mau joma wauɗa unu panuuɗeeba ẽbẽrarã chi Dachi Akõre ʉ̃rʉbena unuɗakau mau biꞌia unubadau. Mauɗeeba kachirua waubadaurãba adua panuu poyaa jaraɗaabai panuu.
21 Maarãba Dachi Akõre kuitaa panasiɗamina ichimaa biꞌia berreaɗaabai mauɗe ichíturu kiɗibai aɗaabasii. Maumaarã kʉ̃risiaswãe nuree kĩra paneesiɗau. Maka paneeɗapeɗa pãriuɗe paneesiɗau.
22 Kʉ̃risia kuitaa nuree asiɗamina kʉ̃risiaswãe paneesiɗau.
23 Chi Dachi Akõre biukaraa nii mauɗe biꞌia nii ida ɓusiɗau. Maabae chi ẽbẽra biuɗa kĩra juaba ne kapeɗaaɗamaa ʉtaa iɗi kopaneesiɗau. Ibanarã, ãnimara jʉ̃rʉ kimare nuree mauɗe ãnimara ioroɗe ursu nuree kĩra juaba kapeɗaaɗamaa ʉtaa iɗi kopaneesiɗau.
24 Mauɗeeba Dachi Akõreba ida ɓusii ãchi sõɗe kachirua wau kʉ̃ria ɓuu wauɗamera. Mauɗeeba maarãba mia pera wau paneesiɗau.
25 Dachi Akõre biawãra ida ɓuɗapeɗa chi seta wau paneesiɗau. Dachi Akõreba joma wauɗamina ichi audeara ichiba wauɗaɗe ijãa paneesiɗau mauɗe maumaa biꞌia berrea paneesiɗau. Maamina dachiba Dachi Akõremáburu ewaricha biꞌia berreaɗai panuu. Biꞌia ɓuu maka ɓuai.*
26 Mauɗeeba Dachi Akõreba ida ɓusii mia pera wauɗamera. Wẽra mukĩra ome ɓuai ɓuu ida ɓuɗapeɗa araɓau wẽra ome paneesiɗau.
27 Ara mau kĩra mukĩra wẽra ome ɓuai ɓuu ida ɓuɗapeɗa araɓau mukĩra ome chiya kʉ̃riaɗapeɗa mia pera wau paneesiɗau. Mau kachirua wau panuu kakua Dachi Akõreba ãchi nebʉra kastikai, ichiba kastikai ɓuu kĩra.
28 Maarãba Dachi Akõre ida ɓupeɗaaɗaɗeeba ichiba maarã ida ɓusii kachirua kʉ̃risiaɗapeɗa maka wau panaɗamera.
29 Ne joma kachirua waubadau. Mia pera ɓuu waubadau, ne joma uru panaɗai kʉ̃riabadau, waabenamaa kachirua waubadau, waabenarãba uru panuu kakua kachirua kʉ̃risiabadau, mia beabadau, berreayaa panabadau, waabenarã setaa kũruabadau mauɗe waabenarã ʉ̃rʉbena kachirua kʉ̃risiabadau.
30 Waabenarã ʉ̃rʉbena kachirua berreabadau, Dachi Akõre kĩramaabadau mauɗe waabenarã daaɗe kachirua berreabadau. Waabenarã audeara chi bibuara nuree a kʉ̃risiabadau mauɗe maka jarabadau. Waabenarã kachirua wauɗai baita jʉrʉbadau. Ãchi akõrerã beɗea ũriɗakau.
31 Kʉ̃risiaswãe nuree. Ãchiba beɗea deapeɗaaɗa wauɗakau. Kʉ̃risiaswãe nuree mauɗe waabenarã kĩra chuburiaɗakau.*
32 Maarãba biꞌia kuitaa panuu Dachi Akõreba chi maka wau nuree ãrea kastikai.* Maamina ara maka wau nibabadau mauɗe waabenarãba ara mau kĩra kachirua wauduuɗe mau biꞌia ɓuu a kʉ̃risiabadau.
Notas
^ Jeremías 23:5-6.
^ Salmos 2:7.
^ 1:13 Arabenarãba Jesucristoɗe ijãaɗamera. Griego beɗeaɗe naka ɓʉ kuɓuu: ne jõ chi ɓee uru ɓuai.
^ 1:14-15 Karta kuitaa nureerãmaa mauɗe karta adua nureerãmaa. Griego beɗeaɗe naka ɓʉ kuɓuu: griegorãmaa mauɗe waabenarãmaa.
^ 1:17. Ichiba jara ɓuu kĩra. Griego beɗeaɗe naka ɓu kuɓuu: Dachi Akõre jipa niiɗeeba.
^ Habacuc 2:4.
^ 1:25 Biꞌia ɓuu maka ɓuai. Griego beɗeaɗe naka ɓʉ kuɓuu: amén.
^ 1:31 Waabenarã kĩra chuburiaɗakau. Griego beɗeaɗe mau chaarea ɓuu biꞌia ũriɗamera.
^ 1:32 Dachi Akõreba chi maka wau nuree ãrea kastikai. Griego beɗeaɗe naka ɓʉ kuɓuu: Dachi Akõreba jara ɓuu chi maka wau ɓee biuɗai panuu.
