Romanos 5:1-21
5 Dachi Mechiu Jesucristoɗe ijãa panuuɗeeba Dachi Akõreba dachi chi ichiɗirã jipa nuree baara duanubarii. Mauɗeeba Cristoɗeeba Dachi Akõre ome sõbia panuu.
2 Mau awara Jesucristoɗe ijãa panuuɗeeba Dachi Akõreba ichi sõbiaɗeeba dachi ewaricha aiɗabarii. Mauɗe kĩrajʉʉ panuu kuitaa panuuɗeeba Dachi Akõre biaɗebena adauɗai.
3 Mau awara dachi ãrea biꞌiwãe panuuɗe kĩrajʉʉ panabadau, kuitaa panuuɗeeba mauba dauchia jãaduaɗai kuitaaɗai.
4 Mau dauchia jãadua panuuɗeeba kuitaa panuu Dachi Akõreba dachi biꞌia unu ɓuu. Mauɗeeba kuitaa panuu Dachi Akõre biaɗebena adauɗai.
5 Mau setawãema, maumaarã biawãra adauɗai. Maka kuitaa panuu Dachi Akõreba ichi Jauri dachimaa deasiiɗeeba. Ichi Jauriɗeeba dachi sõɗe kuitaabia ɓuu dachi biawãra ãrea kʉ̃ria ɓuu.
6 Dachiba ara dachi kachiruaɗebena poyaa karibaɗawẽa panasiɗauɗe ewari araa baaruuɗe Cristo dachi chi kachiruarã kakua biusii.
7 Ẽbẽra ɓaꞌãra biɗa wãꞌãe aɓa jipa nii kakua ara ichi beabii. Maamina ẽbẽra biꞌia nii kakua ¿aɓauba ara ichi beabii ɓubaaka?
8 Maamina Dachi Akõreba dachi ãrea kʉ̃ria ɓuu unubiasii wabiɗa kachiruaɗe panuuɗe Cristo dachi kakua biusiiɗeeba.
9 Cristo oa chesiiɗeeba Dachi Akõreba dachi chi ichiɗirã jipa nuree baara duanusii. Mauɗeeba Cristoɗeeba Dachi Akõreba dachi kastikai baɗa biawãra karibai.
10 Dachi wabiɗa Dachi Akõre ome chi kĩramaa nureasiiɗe ichi Warr biusiiɗeeba dachi ichi ome biꞌia ɓusii. Cristo chokae ɓuuɗeeba, maka dachi biawãra karibai.
11 Mau awara Dachi Mechiu Jesucristoɗeeba Dachi Akõre ome biꞌia nureeɗeeba ichiɗeeba Dachi Akõre ome sõbia panuu.
Adán mauɗe Cristo
12 Ẽbẽra aɓaɗeeba kachirua nau iujãaɗe neesii. Mauɗe mau kachiruaɗeeba dachi biuɗai neesii. Jomaurãba kachirua waubadauɗeeba biubadau.
13 Dachi Akõreba ichi beɗea Moisesmaa ɓʉbii naeɗe, ẽbẽrarãba nau iujãaɗe kachirua waubachiɗau. Maamina mau Moisesba ɓʉɗa wãꞌãe basiiɗeeba, mauba jarawẽa ɓuu ẽbẽrarãba kachirua wau panuu kakua, nebʉra bara nuree aabasii.
14 Maka ɓumina Adán ewariɗeeɗebena aɓa Moisés ewariɗaa ẽbẽrarã biubachiɗau kachirua waubachiɗauɗeeba. Adanba Dachi Akõreba ichimaa jaraɗa ijãabasii, maamina ãchiba Adán kĩra maka kachirua wauɗaabasii.
Adán kakua, joma kachirua paneeɗa kĩra, chi neei ɓuu a panaɗa kakua joma poyaa biꞌia paneesiɗau.*
15 Biawãra ẽbẽra ara aɓaba kachirua wauɗa kakua joma biusiɗau. Maamina ẽbẽra june aɓaɗeeba Dachi Akõreba ichi sõbiaɗeeba chokae ɓuai bari deasii joma chokae nureaɗamera.* Jesucristoba ichi sõbiaɗeeba dachi baita wauɗa, chi Adanba kachirua wauɗa audeara bibuara ɓuu. Mauɗeeba chi Dachi Akõreba bari dea ɓuu, Adanba kachirua wauɗa kakua neeɗa kĩra ɓuwãema.
16 Mau awara Adanba kachirua wauɗa kakua, Dachi Akõreba ẽbẽrarã ichiapeɗa joma nebʉra bara nuree asii. Maamina ẽbẽrarãba kachirua ãrea waubachiɗamina Dachi Akõreba ichi sõbiaɗeeba maarã chi ichiɗirã jipa nuree baara duanubarii.
17 Biawãra ẽbẽra aɓaba kachirua wauɗa kakua joma biubadau. Maamina june ẽbẽraɗeeba, mau kãyabãra ewaricha ichi ome chi reyrã kĩra panaɗai. Mau Jesucristoɗeeba Dachi Akõreba ne aɓa biɗa deábaɗe awẽa, ichi sõbiaɗeeba ãrea karibapeɗa, ẽbẽrarã nebʉraswãe nuree a jarabarii.
18 Maka ẽbẽra aɓaba kachirua wauɗa kakua Dachi Akõreba ichiapeɗa joma nebʉra bara panuu asii. Mauɗe ẽbẽra aɓaba jipa wauɗa kakua Dachi Akõreba joma poyaa chi ichiɗirã jipa nuree baara ɓui ewaricha ichi ome chokae panaɗamera.
19 Biawãra ẽbẽra aɓaba Dachi Akõreba jaraɗa waubasiiɗeeba ẽbẽrarã ãrea kachirua waubadaurã paneesiɗau. Mauɗe ẽbẽra aɓaba ichiba jaraɗa joma wausiiɗeeba ẽbẽrarã ãrea Dachi Akõreba jipa nuree a jarai.
20 Dachi Akõreba Moisesmaa ɓʉbisii, ẽbẽrarãba kuitaaɗamera ãchiba kachirua ãrea waubadau. Maamina ẽbẽrarãba kachirua ãrea wausiɗauɗe Dachi Akõreba ichi sõbiaɗeeba ãrea kĩra chuburiasii.
21 Biawãra ẽbẽrarãba kachirua waubadauɗeeba biubadau. Maamina Dachi Akõreba ichi sõbiaɗeeba ẽbẽrarã chi ichiɗirã jipa nuree baara duanubarii Dachi Mechiu Jesucristoɗeeba ewaricha ichi ome chokae panaɗamera.
