Iɗibea ãrĩãdu informacionɗebena ãrĩã ũri duanua. Ara ɓua dachi biʼia nibapeɗa apii nibai baita. ¡Madu dau omea nibaba! Ũriyu ɓua nau kĩraka:

•   Noticiarã biʼia jaraɗawẽeɗebena

•   Chi jarabudau setaa jara panuu

•    Chi ẽbẽrarãba kʉ̃risiaburuu setaa jaraɗai baita

 Pandemia COVID-19ɗe tãeɗe, chi secretario general Naciones Unidasɗebenaba jaraɓoosii epidemia kĩraka barau setaa jara panuu ʉ̃rʉbena. Jaraɓoosii “ʉrmidia mauba aliviabibarii” asii, ʉrmidia barau mau ẽbẽraba ijãabadau servi ɓuu kĩra maka ɓumina bari daño asebarii. Maaɗaba jaraɗa baɗa: “Internetɗe barau ãrĩã ẽbẽrarãba kʉ̃risiaburuu setaa jaraɗai baita. Internetɗe ẽbẽrarã aude iadaabarii”.

 Jãabera akawa setaa jara panua. Maka ɓumina Bibliaba jara ɓuu iɗibea chi ne kachirua asebadaurã “audeburu miadaa wãɗayua, ãchia setaa jara duanuu mauɗe ãchi siɗa setaaba kũrua panuu” (2 Timoteo 3:1, 13). Iɗibea Internetɗeeba eteuɗe chi noticia ũriɗapeɗa jarabadaa. Jãuɗeeburu, chi mensaje neebaria biawãrawẽe, dachi correo electronicoɗaa mauɗe dachi celularɗaa.

 ¿Saka aseɗaiba chi jarabudau setaa jara kʉ̃risia panuu ijãaɗaamaaba? Nama ũriyua consejo biʼia Bibliaɗebena.

•   Ijãarã́ba ichia unu ɓuu mauɗe ũriburuu siɗa

   Chi Bibliaba jara ɓuu: “Chi kawayuwẽe nii joma ijãabarii chi jarabudaurã maamina aɓa biʼia kuitaa niibʉrã biʼia ãrĩã kʉ̃risiabarii ichi asei naeɗe” (Proverbios 14:15).

   Dai dau omea niiwẽebʉrã, isa jʉrʉ adaui ɓua. Kʉ̃risiaba chi videorã mauɗe chi imagenna jomaurãba unubarii internetɗe. Jãu asebadaa ʉibiaɗai baitaburu, chi computadorɗeeba cosarã asebiɗai ɓua ẽbẽrarãmaa mau ãchia aseɗakau ɓooɗa chi ãrĩã setaa jara ɓeeɗebena.

   “Internetɗe duanuu naarã fotorã mauɗe videorãba ẽbẽra ãyaa kʉ̃risiai ɓua waabenarã ẽbẽrarã ʉ̃rʉbena” (Axios Media).

   Kʉ̃risiaba: “¿Chi noticia biawãra ɓuu o maebʉrã ʉibii baitabaa?”.

•   Kʉ̃risiaba kaiba jaraɗaa chi noticia

   Chi Bibliaba naka jara ɓuu: “Joma mau kauwa ũrísturu” (1 Tesalonicenses 5:21).

   Bariara chi ẽbẽrarãba jarabudau noticiadu jãuɗe isa ijãarã́ba, abau jarai naeɗe, kawapeɗa kʉ̃risiayua biawãra ɓuu.

   Wiɗiba chi jarapeɗaaɗa baɗa kaiba biawãra jara ɓuu. Ɓoobaria chi noticierorã akawa chi biawãra jaraɗakaa chi nejarra aude kanaɗayua. Jãuɗeeburu, ara chi aɓa ɓuu noticia jʉrʉba chi junebena parteɗe biɗa. Ɓesɗe chi amikorã siɗa mensaje setaa biɗa urubʉeɗayu eteuɗe ijãarã́ba. Naa kawaba kaiba jaraɗa.

   Wiɗiba sakaeɗe jarapeɗaaɗa nau beɗea. Kawaba chi jara panuuɗebena biawãra kawayua. Kʉ̃risiaba chi jara panuuɗebena perabiɗayua makawẽebʉrã kĩrubiɗayua kachirua kʉ̃risiabiɗai baita.

   “Kawayua chi biawãra jara panuu jãu dachi jua jareeruu kĩra ɓua” (Sridhar Dharmapuri, oficial superior inocuidad alimentaria mauɗe nutrición Naciones Unidasɗebena).

   Nauɗe kʉ̃risiaba: “¿Cha nau beɗea ara aɓa nii beɗea kĩraka ɓua? ¿Chi jara ɓuu jãu joma pasa ɓubaaka?”.

•   Ochiaba chi pasaɗa baɗa, mau bichia kʉ̃risia ɓuuwẽma

   Chi Bibliaba jara ɓuu: “Chi corazonɗeeburu ijãa niibʉrã, biʼia kʉ̃risia niiwẽma” (Proverbios 28:26).

   Ẽbẽrarãba ijãabadau ãchia kʉ̃risia panuu kĩra. Empresa internetɗebenaba ochiabadau chi ẽbẽrarã jʉrʉ panuu internetɗe, jãuburu chi noticia urubʉebadaa. Maka ɓumina chi ũri kʉ̃ria panuu jãuwẽma.

   “Jomaurãba kauwa kʉ̃risiaɗai ɓua, maka ɓumina ɓesɗe ijãabadaa dachi biʼia sentibi panuudu” (Peter Ditto, psicólogo social).

   Nauɗe kʉ̃risiaba: “¿Mʉa ijãabaree mʉa ũribarii mʉʉmaa biʼia ɓuuɗeeba?”.

•   Jaraabayua chi setaa jara panuuɗebena

   Chi Bibliaba jara ɓuu: “Jaraabayua chi setaa jara ɓuuɗebena” (Éxodo 23:1).

   Junebenamaa deabʉeburuu diwaraa kʉ̃risiabii ɓua. Chi setaa jara ɓuu urubʉeburuubʉrã, jãu miadaa ɓuma.

   “Biʼia kʉ̃risiayua dachi urubʉeeruu chi biawãradu ɓuubʉrã. Joma ẽbẽrarã jãka asebudaubʉrã, jãka setaa jaraɗaabai ɓua internetɗe” (Peter Adams, vicepresidente sénior News Literacy Projectɗebena).

   Nauɗe kʉ̃risiaba: “¿Mʉa urubʉeeruu biawãra ɓubaaka?”