Mayo 24ɗe 2022ɗebena, mia chuburi chi puuru ɓiɗĩika ɓuu Uvaldeɗe (Texas, Estados Unidosɗe) chi ãrĩã miadaa basii. Periódico The New York Times abadauba naka asii, “mukĩra nii escuela Robbɗe [...] pistolaba 19 warrarã primariaɗebena mauɗe ome profesorna beatasii”.

 Maka ɓuu, jãka kachirua ɓee kapichia ochiabadaa. Periódico USA Today abadauba jarasii, Estados Unidosɗe, “249 tiroteo escuelarãɗe unusiɗau año basiiɗe, mau aude basii 1970ɗeeɗabena kãyabãra”.

 ¿Sakayua chi iujãaɗe waaburu ãrĩãdu miadaa ase duaneesaa? ¿Saka waya biʼia sentiɗai ɓuu jãka kachirua ɓee ãrĩãdu dachi puʼuabi ɓuuɗe? ¿Chi cha miadaabena kuɓuu akababaaka? Bibliaba panau ɓuu.

•  Bibliaba jara ɓuu dachirãra “chi último diarãɗe” duanuu, mauɗeeba ẽbẽrarãba “deɗabena kʉ̃riaɗaabai” mauɗe “chi kĩrubi ãrĩã nureaɗai”; ẽbẽrarãba ãchi chiya miadaa aseɗapeɗa ãrĩã puʼuabibadaa. Mauɗe ãchia “waaburu chi kachirua ase nurea” (2 Timoteo 3:1-5, 13). Bʉa aude kawai kʉ̃ria ɓuubʉrã, leas chi artículo “¿Chi Bibliaba jara ɓue ẽbẽrarãba saka nureaɗayua chi último diarãɗe?”.

 Ẽbẽrarã aribiaurãba kʉ̃risiabadaa sakayua Dachi Akõreba idaarabibaraa chi miadaa pasaburuuɗe tiroteo escuelaɗe kĩraka. Bibliaba kãare jara ɓua kawai baita, leas chi artículo “¿Sakayua chi kachirua ãrĩãdu neebaraa ẽbẽra biarãmaa?”.

•    “Joma Dachi Akõreba naeɗe ɓʉbiɗa baɗa dachimaa jaradeai baita ɓuu, makaburu […] daiba biawãra kawa panuuɗe biʼia panaɗayua” (Romanos 15:4).

 Consejorã Bibliaɗebenaba bichi aiɗa ɓuu jãadua nibayua. Bichia waaburu kawa kʉ̃ria ɓuubʉrã, lease chi karta ¡Despertad! “¿Jãaɗakare chi cha miadaabena kuɓuu akababaaka?”.

 Ɓesesɗe televisor maebʉrã internetɗe, warrarãba noticia kachiruaɗebena ochiaɗapeɗa ũribadauɗeeba pera kopanua. Bʉ akõre niibʉrã maebʉrã nawe niibʉrã, bichi warrarã saka aiɗayua kuitaa, ãchia naka miadaa ochia panuuɗe, leas chi artículo “Chi noticia miadaa ɓee ochiaduuba chi warrarã perabadaa”.

•    “Chi machi miadaa asebadauɗebena mauɗe chi maltratabadauɗebena karebakuayua” (Salmo 72:14).

•    “Nekoba chi drua eraɗapeɗa mauɗe chi miasuba ponoyua. Puururã nekoba peleabai mauɗe chi guerra aseyua kawaɗaabai” (Miqueas 4:3).

 Dachi Akõreba aseburuu chi ẽbẽrarãba poyaa aseɗaabaiɗebena. Ichi Kobiernoɗeeba, ʉtʉ bajãareeba chi cha miadaabena kuɓuu akabayua. Bichia maucha kawa kʉ̃ria ɓuubʉrã chi Dachi Akõre Kobiernoba aseeruuɗebena, leas chi artículo “Dachi Akõre Kobiernoɗeeba dauchia nureaɗai”.