Domingo 20 noviembreɗe 2022ɗebena, COP27ɗe, Naciones Unidas abadauba jaradeɗeka ɓeesii chi clima cambia kuɓuu ʉ̃rʉbena. Chi wãuribudaurãba jarasiɗaa chi nejarra adauɗai baita chi paisrãɗe ẽbẽrarã poore nuree aiɗayua chi miadaa neeburuuɗe chi climaɗéburu. Maka ɓuu siɗa, mau acababiibayua chi problema mechibena ɓuu chi clima miadaa ãrĩã ɓuuɗeeba.

•   “Mʉ kĩrajʉʉ ɓuu naka chi nejarra adauɗayu kakua chi sufri kirureerã baita chi climaɗeeba […]. Maamina mau ariɗe ɓuuwẽe […]. Chi iujãa ẽpermo atua ɓuuka ɓuu”. Naka jarasii António Guterresba chi secretario general Naciones Unidasɗe, 19 noviembreɗe 2022ɗebena.

•   “Chi iujãa ãrĩã daña bara ɓooyu clima miadaa ɓuuɗeeba” (Mary Robinson, presidente baɗa Irlandaɗe mauɗe alto comisionado basii ONUɗebena Derechos Humanos baita; 20 noviembreɗe 2022ɗebena).

 Kũudrãarã ãwerarã baare ãrĩãdu kʉ̃risia panuu chi iujãa saka ɓeeyu ʉ̃rʉbena. ¿Joma chi gobiernorã nau iujãaɗebenarã ãbua traja panubaaka chi iujãa biʼia ua ɓeeyua ãchia jaraɗa kĩrachaa? ¿Chi Bibliaba saka jara ɓua?

 Chi Bibliaba jara ɓuu chi ãchia bereka ase panuu arreglai baita chi problema mechia kuɓuu chi climaɗeeba mau bariarã ase kopanuu. Kawaba mau sakaba:

•   “Chi jʉ̃rea ɓuu poyaa jipa ɓeebai ɓua” (Eclesiastés 1:15).

   Mau sakayua: Chi gobiernorã iujãaɗebena akawa biʼia poyaa kãribaɗaabai ɓuu, ãchi waubasiiɗeeba du aɓa kobernaɗayua (Jeremías 10:23). Ãbua trajaɗayua a kʉ̃risia panumina, joma chi miadaa kuɓuu nau iujãaɗe poyaa acabaabai.

•   “Ẽbẽrarã ãchi du aɓaburu kʉ̃ria duanaɗaiɗeeba; chi nejarradu ãrĩã kʉ̃riaɗai […], waabenarãba jaraaduu ũriɗaabai” (2 Timoteo 3:2, 3).

   Mau sakayua: Chi Bibliaba ariɗe jarasii ẽbẽrarã iɗibeabenarã ãchi du aɓaburu kʉ̃risia duanaɗai mauɗe ãbua trajaɗaidu naka kʉ̃riaɗaabai.

 Chi iujãa ariɗeburu ua koɓeeburua chi ẽbẽrarã jeeɗabena poyaaɗawẽe adua. Dachi Akõreba irubʉisii chi gobernante aude biʼia kiɗii nau iujãa biʼia ua ɓooi baita: Jesucristobʉ. Nakaburu chi Bibliaba jara ɓuma ichiɗebena:

•   “Chi gobierno ichi juaɗe ua koɓeeburua. Ichimaa jaraburua Aude Jaradeɗeka Nii, Dios Poder Aude Bara Nii, Akõre Waaburu Nibabarii, Príncipe Joma Ãbua Duanabibarii” (Isaías 9:6).

 Jesusdu chi rey Dachi Akõre Kobiernoɗebenabʉ, mau ʉtʉ bajãaɗebena bẽrã (Mateo 6:10). Ichia poder barapeɗa, ãrĩã kuitaapeɗa mauɗe kʉ̃ria ɓuu nau iujãa mauɗe joma eɗa nureerã biʼia ua ɓooyua (Salmo 72:12, 16). Ichi gobierno ʉtʉ bajãaɗebenaɗeeba, kenayua “chi jari iujãa kiruu dañamaa panuu” waya biʼia ɓeebiyua (Apocalipsis 11:18; Isaías 35:1, 7).

 Maucha kawa kʉ̃ria ɓuubʉrã saka solucionai ɓuu chi problema chi clima cambia ɓuuɗebena, leas chi artículo, “¿Chi Bibliaba kãare jaradea ɓuu chi clima cambia ɓuuɗebena mauɗe chi uruuɗebena?”.