Chi nuree ẽbẽrarã itua ãrĩã dobadau aburri kuɓuuɗe, du aɓa kuɓuuɗe, mauɗe chi kawayuswẽa kuɓuuɗe. ¿Bichira? ¿Naeɗe do nibaɗaɗeeba aude dobaree? ¿Kãare asei ɓua ãrĩã do ɓoomaaba? Nama eɗa jara ɓuu kãare asei ɓuu apii do nibaamaaba.

•  ¿Sãabe itua doi ɓua?

•  ¿Mʉa saka kawaiba mʉ itua ãrĩã do nii?

•  Cinco consejorã dea ɓuu apii do nibaamaaba

 Chi Bibliaba jara ɓuu: “Vino dobadau ome meraarã́ba” (Proverbios 23:20).

 Cha nau kʉ̃risiaba: Bibliaba jarawẽa ɓua akawa itua doobayuɗebena (Eclesiastés 9:7). Maka ɓumina, Bibliaba jara ɓuura chi nuree ɓaʼãra itua dobadau, chi ɓee aude dobadaa mauɗe chi nuree akawa itua biubadaa (Lucas 21:34; Efesios 5:18; Tito 2:3). Bariara itua biuɗawẽe siɗa ãrĩã dobudaubʉrã, ẽpermaɗai ɓua. Waabenarã ome meraabarii baɗa siɗa wãʼãe bayua. Mauɗe biʼiawẽe wãɗai ɓuu (Proverbios 23:29, 30).

 Chi kuitaa ɓuu nureerãba kawa panuu sãabe itua doburuuba dachi daño asei ɓuu. ¿Saka kuitaa panaa? Ochia panuu aɓa nii ẽbẽraba diaɗe sãabe dobarii mauɗe sãabe semanaɗe do ɓuu. a Dachi ẽbẽra joma aɓau nureewẽe, chi nuree ara ɓiɗĩika dotaburuuba itua biu sentibarii, mauɗeeburu chi nureerã akawa itua doɗakaa. Chi Organización Mundial de la Saludba naka jara ɓuu akawa doobayua:

 Copa aɓa maebʉrã ome ãrĩã ɓoi ɓuu:

•   Carro o moto maneja kãriibʉrã.

•   Wẽra ɓi baraapeɗa nii maebʉrã wãwa ju do iniibʉrã.

•   Ʉrrmiɗia do niibʉrã.

•   Ẽpermo ɓuubʉrã.

•   Ara namauɗaa dooruu maka jarawẽebʉrã.

 Chi Bibliaba jara ɓuu: “Kauwa kʉ̃risiaɗaika saka kãriɗau” (Lamentaciones 3:40).

 Cha nau kʉ̃risiaba: Bichia itua ãrĩã dobarii kʉ̃risiapeɗa mau ida ɓuiruubʉrã bichi kakua biʼia nibayua. Bichi pasaburuubʉrã jari eɗa kuɓuu kĩra makarã bichi ãrĩã do awa ɓua:

•   Do niba kʉ̃riabarii biʼia au nibayua. Kĩrajʉʉ nibapeɗa, amikorã baare biʼia duanaɗayu mauɗe aburri ɓoomaaba problemarã kakua, itua do nibaidu nesta kuɓuu.

•   Naeɗe do nibaɗaɗeeba aude dobarii ɓuu. Ara kapichia do nibapeɗa jãuɗe soʼoa ɓuudu, aude do nibabarii itua biu ɓeeyua.

•   Trajoɗe biɗa biʼia wãkau deɗabenarã ome biɗa biʼia ɓookau. Chi nejarra wãʼãe nii siɗa, itua ãrĩã do ɓuuɗe chi nejarra joma wãbarii.

•   Itua do niiba biʼia kʉ̃risiakau. Dachi ãrĩã peligroɗe wã nia. Mauɗe itua do ɓuuɗe carro o moto manejaɗe wãburuu, trajaɗe wãburuu maquinaba makawẽebʉrã kuiɗe wãburuu.

•   Chi niiba bichimaa jaraɗa baɗa bichi ãrĩã dobariiɗebena. Bichimaa itua ãrĩã do nibabarii abudauɗe kĩru koɓeebaria, miru do nibapeɗa mauɗe setaa jara ɓuu sãabe itua do nibabariiɗebena.

•   Itua do nibabarii akawa ida ɓuiwẽa. Bariara ɓiɗĩikaburu do kʉ̃riabarii akawa itua dobarii poyaa ida ɓuwẽma.

 1. Naeɗe kʉ̃risiayua saka ɓiɗĩikaburu do nibai baita.

 Chi Bibliaba jara ɓuu: “Chi trajabarii naeɗe biʼia kʉ̃risiaburuubʉrã jãturua biʼia nibayua” (Proverbios 21:5).

 Chau nau aseyua: Kʉ̃risiaba semanaɗe kãare diaɗe doi ɓuu mauɗe sãabe doi ɓuu aude doomaaba. Jʉrʉ adause dos días semanaɗe akawa doomaaba.

 Chi organización Reino Unidoɗebenaba aiɗa ɓuu itua ãrĩã doobayuɗebena naka jara ɓuu: “Vicioɗe akawa ɓaemaaba chi diarã kauwa kʉ̃risiayu akawa itua doomaaba”.

 2. Bichia kʉ̃risia nibaɗa aseba.

 Chi Bibliaba jara ɓuu: “Chi trajo adaupeɗaaɗa terminábaɗa” (2 Corintios 8:11).

 Cha nau aseyua: Kauwa ochiaba chi itua chi vasuɗaa eamaa ɓuuɗe sãabe eamaa ɓuu kawayua mauɗe ochiaba chi botella ituamaa ɓʉ ɓoobarii kawayua sãabe alcohol ɓuu mauɗe sãabe soʼoa ɓuu chi itua.

 Chi Instituto Nacional sobre el Abuso del Alcohol y el Alcoholismo, Estados Unidosɗebenaba, naka jara ɓuu: “Ɓiɗĩi ɓiɗĩia ida ɓui kãribayua jãkaburu vicioɗaa deabayua”.

 3. Kauwa jãadua nibayua.

 Chi Bibliaba jara ɓuu: “Wauɗai aaduubʉrã, biawãra wáusturu. Mauɗe wauɗawẽe aaduubʉrã, biawãra waurã́sturu” (Santiago 5:12, Biblia Chamí, WPS.).

 Cha nau aseyua: Bichia itua doobai kʉ̃risiaɗa baɗabʉrã mauɗe itua dawabudaubʉrã adaurã́ba bari kĩruwẽa koɓooi.

 Chi Instituto Nacional sobre el Abuso del Alcohol y el Alcoholismo, Estados Unidosɗebenaba, naka jara ɓuu: “Bichiá deabudauɗe ara mauɗe adauwẽebʉrã, makarã bichi itua do kʉ̃riawẽa ɓooyua”.

 4. Kʉ̃risiaba itua ãrĩã dowẽebʉrã biʼia wãyua.

 Chi Bibliaba jara ɓuu: “Erdauburuuɗe biʼia ɓua kaaɗe terminaburuuɗaara aude biʼia ɓuu” (Eclesiastés 7:8).

 Cha nau aseyua: Ɓʉba sakayua bichia ida ɓu kʉ̃ria ɓuu ãrĩã dobarii baɗa; biʼia kãi kʉ̃ria ɓuu, ẽperma kʉ̃riawãe nii, chi nejarra gasta kʉ̃riawẽa nii, junebenarã ome biɗa biʼia niba kʉ̃ria nii. Waabenarã ome beɗeaburuuɗe chi bichia asei kʉ̃risia nibaɗa ʉ̃rʉbena mau chaarea ɓuu asei baita arã́ba bari jãu mʉ baita biʼia ɓuu ayua.

 5. Dachi Akõremaa mʉ chaareabiba aba.

 Chi Bibliaba jara ɓuu: “Mʉ fuerza baraa ɓua joma asei baita, chi mʉʉmaa poder dea ɓuuɗeeba” (Filipenses 4:13).

 Cha nau aseyua: Bichi ãrĩã itua do nibabarii niibʉrã Dachi Akõremaa mʉ aiɗaba ayua mʉʉmaa chaareabíbaɗa ayua apii do ɓoomaaba. b Tiempo jʉrʉ adauba Dachi Akõre Beɗeaɗe beɗea bia unuyua. Ichi bichi jʉ̃kaa niibʉrã, itua ãrĩã dobarii baɗa ida ɓuyua.