PARTE 5
Chi biawãra brujería ʉ̃rʉbena mauɗe karta leabadau, juaɗe ochiabadau, jãka koɓeeba unubadauɗebena
1. ¿Kãare kʉ̃risiabadaa ẽbẽrarãba chi brujería, hechicería mauɗe magia ʉ̃rʉbena?
“AFRICAƊE jomaurãba ijãabadau bruja ʉ̃rʉbena, jãma aria jomaurã baita biʼia ãrĩã ɓuu chi brujeriaɗebena”, naka a ɓuu chi libro African Traditional Religion (La religión tradicional africana). Chi kuitaa ãrĩã nuree mauɗe lea adua nureeba ijãabadau chi jaibana ʉ̃rʉbena mauɗe chi brujería siɗa. Chi líder abadau chi religión cristiana mauɗe Islamɗebena jãarã biɗa ijãabadau nauɗe.
2. Chi nuree ẽbẽrarã jarabadau, ¿samabena neesii chi jãu magia?
2 Chi ẽbẽrarã Africaɗebenaba, ãchia ijãa nureerã chi poder barau, dachia poyaa unuɗaabai. Mau chi Dachi Akõreɗebena nee ɓuu. Jãu poder adau nuree chi jaurirã mauɗe chi naeɗeeɗabenarãba jãu poderɗeeba ase nuree chi bia ɓee (magia blanca) makawẽebʉrã chi kachirua ɓeeɗebenarã (magia negra).
3. ¿Kãareba chi magia negra, mauɗe chi ẽbẽraba kãare kʉ̃risia panaa jãuɗebena?
3 Chi magia negra, o maebʉrã hechicería abadau, jãuba asebadau ãchia kʉ̃riaɗakaurã. Jarabadau chi jãu ase nureerãba sirṹ, ibana, mosca mauɗe junebena ãnimararã jãuba kachirua aseɗayua ẽbẽra. Chi nureeba kʉ̃risiabudau chi magia negraba kachirua asebadau, ẽbẽra chi brujeriaɗeeba ẽbẽra chĩobadau, ara jãu magiaɗeeba poyaa wẽra warr ataubiɗakau mauɗe ẽpermaɗapeɗa biubadaa.
4. ¿Chi ẽbẽraba kãare kʉ̃risiabadaa chi brujarãɗe mauɗe chi brujeriaɗebena ase nureeba kãare jarabadaa jãuɗebena?
4 Magia negra abudau jãu siɗa ara jãuba brujarãɗebena jaraaruu a kuɓua. Ẽbẽrarã jarabadau ẽsebuɗe chi bruja chi kakuara kãi noɓeepeɗa mauɗe chi jaurirã ũubarii wãbarii junebenarã brujarã ome unuɗayua, makawẽe bikãa bea wãyua chi ẽbẽrarã. Nau jarabadau chi ẽbẽra naeɗe brujería ase nibaɗaburu. Chi revista Africaɗebenaba jara ɓuu awẽrarã naeɗeeɗa bruja nibaɗaburu naka jarabadau: “Mʉa 150 ẽbẽrarã beaɗa baɗa carro bʉraa waubiburuuba”; “mʉa 5 warrana beaɗa baɗa chi oa joma doburuuba”; “mʉa novio õbea beaɗa baɗa mʉ jirata ɓuipeɗaaɗaɗeeba.”
5. ¿Kãareba chi magia blanca mauɗe chi ẽbẽraba saka asebadau jãu?
5 Jarabadau chi magia blancaba aiɗabarii chi kachirua ɓuuɗebena. Jãu asebadaurãba juaɗe jʉ̃badau pulsera mauɗe anillo siɗa magia bara ɓee mauɗe kiɗua ɓaa doɗapeɗa kakuaɗe biɗa purukuabadau. Mauɗe deeɗa biɗa mera kuɓubadau maebʉrã jeeɗa, mau ãchia jarabadau kachirua ɓee awara bʉekaɗai baita chi kachirua ɓeeɗebena biʼia nibaɗe wãyua mauɗe ataubadau siɗa Bibliaɗebena ɓʉɗa baɗa maebʉrã Coranɗebena.
Biawãrabena ɓuu mauɗe setaa ɓuu
6. ¿Chi naeɗebenaba kãare asebadaa Satanás chi demoniorã ome mauɗe kãare kʉ̃risiaɗaiba chi poder ãchirãɗebena?
6 Satanás mauɗe demoniorã dachirã ome ẽbẽrarã chi iadaa ãrĩã nii. Ãchia dachi kʉ̃riasiabiɗai ɓua, mauɗe ãchia kʉ̃ria panúturu asebibadaa dachimaa, naeɗeeɗa chi demoniorã dachi kakuaɗe eɗa entrabadau basii mauɗe ãnimaraɗe biɗa (Mateo 12:43-45). Bariara ãchirãba ãrĩã́turu asebiɗai ɓumina, dachia nauɗe ãrĩã kʉ̃risiaɗaabayua.
7. ¿Satanasba kãareɗe kʉ̃risiabi kʉ̃ria ɓua, jarachãu kãare pasaɗa baɗa chi país Africaɗe?
7 Satanasba dachi ẽbẽra kʉ̃risia ãrĩã́turu kawayuwẽe nibabiyua. Dachimaa ijãabi panuu ichíturu poder ãrĩã bara nii, mau makawẽe ɓua. Jãka pasaɗa baɗa chi país Africaɗebena, mauɗe soldaorãba ãchi parlanteɗe ẽbẽrarãmaa ũribiasiɗau bomba mauɗe ɓataburuu mau biawãrabenawãe basii, setaaburu asepeɗaaɗa baɗa. Ãchia maka asesiɗau chi ẽbẽra perabiɗayua. Chi Diabloba ara mau kĩra ase nii, ichi du aude nii senti kuɓuuba ẽbẽra perabiayua ichia kʉ̃ria níturu asebiayua, Jeowaba kʉ̃ria ɓuura aseɗawẽa. Ochiaɗaika dachi õbeaɗebena setaa jara ɓuu Satanasba.
8. ¿Sãuba chi setaa jara ɓuu Satanasba?
8 Chi setaa jara ɓuu Satanasba: Bichi kachirua pasasiibʉrã; jaiɗeeburu jãka pasasii, a jara ɓua. Jaraɗaika nau ejemploɗe, warr cheke biusiibʉrã malariaɗeeba. Chi nawebara kuitaa ɓuu jãu ẽpermeda deabarii sãkuɗaba kaaɗaɗeeba. Maka ɓumina chi naweba kʉ̃risiai ɓuu chi niiba brujería asesiiɗeeba jãka pasasii.
Kawawẽeɗe ne miadaa pasai ɓuu
9. ¿Kãare jara ɓua chi Bibliaba chi miadaa nau iujãaɗe kuɓuu jãu kachirua joma nee kuɓuuwẽe Satanasɗebena?
9 Satanasba chi kachirua ɓuu asei ɓua, maka ɓumina joma chi kachirua ɓuu maara Satanasɗeebara neewẽe. Chi Bibliaba naka jara ɓuu: “Chi isa pirabadaurã jãarãbara pirabadau joma kanaɗakaa, ni ichi aude poder bara nureerãba kanaɗakaa chi peleabudauɗe, ni chi kuitaa ɓuurã siɗa chiko waaburu ira duanaɗakaa, ni chi boro biarã siɗa waaburu chi nejarra bara duanaɗakaa, waaburu biʼia wãuriɗakaa chi aude kuitaa ɓuurã siɗa, mauɗe jomaurãmaa kachirua ɓooyu siɗa neebaria mauɗe dachia adua koɓooɗa baɗa chi pasayuɗebena siɗa neebaria” (Eclesiastés 9:11). Chi nii ẽbẽra mechibena pirai nia, maka ɓumina chi carrera kanawẽa. Jãu perdei ɓuu jʉ̃rʉ drʉʉruuba makawẽebʉrã ẽpermaburuuɗeeba. Barikia nureemaa jãu pasai ɓua. Mau brujeriaɗeeba makawẽebʉrã Satanasba jãkasiiɗeeba wẽebayua.
10. ¿Kãare jarabadaa chi ẽbẽraba brujarãɗebena mauɗe saka kuitaa panaa jãu setaa ɓuu?
10 Mauɗe maucha setaa jara ɓuu Satanasba: chi ẽbẽra kãi nuɓuu chi kakua ɓuipeɗa mauɗe kaitawẽe wãbarii junebenarã bruja unuɗe wãyua. Cha nau wãrabena ɓuubʉrã, ¿kãaréturu wãbaraa ãchi kakuaɗebena? Chi alma abadau jãu ara chi ẽbẽraturua, mau dachi kakuaɗebena awara wãbariiɗeeburuwẽma. Mauɗe chi espíritu abudau jãuba dachi kakuáturu chokae nibabii nii dachi kakuaɗe barawãe chi espíritu serbiwẽa nia.
Brujarãba ãchi kakua ɓuiɗaabayua
11. ¿Saka kuitaa panaa chi brujarã awara wãɗaabai ɓuu ãchi kakuaɗebena? ¿Bichia ijãabaree jãuɗe?
11 Chi espíritu chi alma kakuaɗebena awara wãabayua, mauɗéburu chi kachirua ɓuu maebʉrã chi biʼia ɓuu aseebayua. Mauɗéburu, chi brujarã ãchi kakua poyaa ɓuibai. Ẽbẽrarãba jarabadau chi brujarã aseeruu ʉ̃rʉbena jãu setaa.
12. ¿Saka Satanasba kʉ̃risiabibaraa ẽbẽramaa biawãra pasa ɓuu ãchia asepeɗaaɗa baɗawẽe?
12 ¿Chi brujarã nureapeɗaaɗaba nebʉrʉ panuu ariɗe ɓuka? Satanasba ijãabii nii chi ẽbẽramaa chi pasawẽeɗebena. Mauɗéburu ẽbẽrarãba nebʉrʉbadau chi historia brujeriaɗebena. Komakaraaɗeeba Satanás ijãabibarii ẽbẽramaa unuɗapeɗa, ũribadau mauɗe asebadau maka ɓumina jãu setaa. Jãu asebudauba, Satanasba kʉ̃riabarii chi ẽbẽra Jeowaɗeeba kaitawẽe nuree mauɗe ijãabadau chi Bibliaba setaa jara ɓuu.
13. (1) ¿Chi magia blanca biʼia ɓue? (2) ¿Chi Bibliaba kãare jara ɓua nau ʉ̃rʉbena?
13 Chi magia biʼia ɓuuba chi magia kachirua ɓuu jiratai ɓuu abadau. Bibliaba jara ɓuuwẽma magia biʼia ɓuu mauɗe magia kachirua siɗa. Bibliaba jara ɓuu joma chi magia kachirua ɓuu. Kʉ̃risiaba cha nau Jeowaba deaɗa chi puuru Israelɗebenamaa chi magia ʉ̃rʉbena, mauɗe kãare pasayu ɓuu chi magia asebudaurã:
-
“Chi magia adau nibaabayua” (Levítico 19:26).
-
“Chi nii mukĩra maebʉrã wẽra barikia nii espiritista makawẽebʉrã adivino nii, mau biuyua” (Levítico 20:27).
-
“Machiɗebena wãʼãe bayua [...] chi adivinacionɗebena asebarii nii, chi nii ẽbẽra adaubarii magia makawẽebʉrã agüerorã, mauɗe ẽbẽra hechizo asebarii nii, mauɗe chi ẽbẽra niiba maleficio junebena asebarii nii mauɗe wãʼãe bayua chi espiritista jʉrʉɗe wãi siɗa” (Deuteronomio 18:10-14).
14. ¿Sakãera Jeowaba ichi puurumaa chi ley deaɗaba magia aseɗaamaaba?
14 Dachi Akõre jãu ʉ̃rʉbena jaraɗa baɗa ichia magia bustakauɗeeba. Jeowaba jãu ley jaraɗa baɗa ichi puurumaa ichia kʉ̃ria niiɗeeba. Ichia kʉ̃riawẽebasii jãarã pera nureaɗayua demoniorãɗeeba.
15. ¿Saka jara ɓua chi Bibliaba Jeowa aude chaarea nii Satanasɗeebiɗa?
15 Bibliaba jara ɓuuwẽma joma chi demoniorãba aseɗai ɓuu maebʉrã chi aseɗaabai ɓuu, maka ɓumina jara ɓuu Jeowa aude chaarea nii Satanás mauɗe demoniorãɗeebiɗa. Jeowaba jʉretaɗa baɗa Satanás bajãaɗebena (Apocalipsis 12:9). Mauɗe Satanasba permiso wiɗiɗa baɗa Jeowamaa Job kachirua aseyua, Jeowaba jaraɗa baɗa Job beawẽebayu, mau ũriɗa baɗa Satanasba (Job 2:4-6).
16. ¿Kaituru jʉrʉɗaiba dachi karebabiyua?
16 Proverbios 18:10 naka jara ɓuu: “Chi Jeowa trʉ̃ torre choroma kĩraka ɓua. Ẽbẽra bia ãrĩã nii jãmaburu pirabaria”. Jeowaba dachi karebayua dachia ichíturu jʉrʉ niɗaubʉrã. Jeowa baita traja nureerã kiɗua chuu doɗaabayua magia siɗa jʉrʉɗaabayua chi Satanás mau demoniorãɗebena karebaɗai baita, mau peraɗaabayua jaibanarãba dachi maleficio aseɗayuɗebena. Chi Jeowaɗebenarãba ijãabadau chi Bibliaba nama jara kuɓuuɗebena: “Jeowa dauba iujãa joma nu ira ɓua ichi chaarea ɓuu unubiyua ichi baita corazonɗe traja duanuu baita” (2 Crónicas 16:9).
17. Santiago 4:7ba jara ɓuuɗeebara, ¿dachia kãare aseɗaiba?
17 Bichia Jeowaɗe jãka ijãai ɓuu ichi baita traja niibʉrã. Santiago 4:7ba jara ɓuu: “Chi miadaa nii ijãa nibarã́baɗa, makaburu ichi machi jʉ̃kaabena miru wãyua”. Bichi Jeowaɗebena niibʉrã, chi Dios ariɗe nii ichia bichi karebayua.