Jeowa Dachi Akõrebʉ, ichiaburu dachi aseɗa bẽrã mauɗe ichi dachi aude kuitaania. Ichia dachirã chi kʉ̃ria ãrea uanii mauɗe dachirãɗe kʉ̃risiania. Ichia ichi jʉ̃kaabena kaitawẽ duanaɗai baita dachi aseebasia (Jeremías 10:23). Ara jãka wawa chuburinuree chi akõrerãba biʼia waribiɗayua orientaɗai nesitapanuu kĩra, dachi ẽbẽrarã biɗa nesitapanua Dachi Akõreba dachi orientaɗai baita (Isaías 48:17, 18). Dachi Akõreba ichi beɗeaɗeeba orientaɓua ichi saka kʉ̃risiaɓuu jararuuba. 2 Timoteo 3:16 leas.

Chi lei mauɗe Jeowaba kʉ̃risiaɓuuba jaradeɗekaɓua dachirãmaa saka biʼia duanaɗaiɗebena mauɗe kãare aseɗaiba Dachi Akõreba nejoma biakeɗee uaneeburuu adauɗayua. Ichia dachi waukaɗa bẽrã kuitaaɓua saka orientakuayu, mauɗeeba dachia ida orientabiɗai ichimaaburu. Salmo 19:7, 11; Apocalipsis 4:11 leas.

Dachi Akõre kʉ̃risiaɗebenaba ũkuru dachirãmaa kʉ̃risiabiɓua kãare aseɗai, mauɗe leirãbara dachimaa kʉ̃risiabiwẽa, kãare asei mauɗe kãare aseebai ɓuudu jaraɓuu (Deuteronomio 22:8). Dachia biɗa Dachi Akõre kĩra kʉ̃risiaɗayua akuɓeepeɗa kawa kʉ̃risiabaraɗai (Proverbios 2:10-12). Bibliaɗe jaraɓuu dachi bida jãara ʉrrekalo Dachi Akõreba deaɗa. Nau kʉ̃risiaruuba dachia kawaɗayua dachi bida saka kawa ochiaɗai trajanureeɗe, deɗanureeɗe waa eɗaa wãburuuɗe. Mauɗeeburu dachia kawa kʉ̃risiai jãara nejoma asei naeɗe, maka dachi bida pelikroɗe bueemaba maẽbʉrã wabenarãɗe. Hechos 17:28 leas.

Jesusba Dachi Akõre kʉ̃risiaɗebena ome jaraɗaa. Chi naabenaba dachirãmaa jaradeaɓuu kãare baita Dachi Akõreba dachi waukaɗaa: ichi kawa unuɗai baita, jipa trajaduanaɗai baita mauɗe  ichi kʉ̃riaɗai baita. Dachia kʉ̃risiaɗayua Dachi Akõre kĩraka chi joma asebudauɗe (Proverbios 3:6). Chi nau asebudau ẽbẽrarã maũcha Dachi Akõre ome amiko baɗapeɗa mauɗe waa biuɗawẽa kĩrajʉʉnurepaaɗe wãi. Mateo 22:36-38 leas.

Chi aɓabena kʉ̃risia jaraɓuu maara wabenarã ome dachirã biʼia duanaɗaiɗebena jaraɓua (1 Corintios 13:4-7). Mau aseɗarã dachia biɗa wabenarã ẽbẽrarã trata uaduanaɗai Dachi Akõreba dachi ome aseɓuu kĩraka. Mateo 7:12; 22:39, 40 leas.

Dachirã Dachi Akõre kĩra kʉ̃risiaɗarã, wabenarã kʉ̃riaɗapeɗa aude ambua duanaɗai baita deɗabenarã ome (Colosenses 3:12-14). Dachi Akõreba dachimaa jaraɓuu dachi kima amaabai. Dachi Akõre kĩraka kʉ̃risianureebʉrã biʼia wãɗayua dachi deɗabenarã ome. Génesis 2:24 leas.

Dachi Akõre kĩra kʉ̃risianureebʉrã kĩrajʉʉ ãrea duanaɗai ɓuu mauɗe traju biɗa biʼia duanaɗai baita. Patrona biɗa bustabadaa ẽbẽrarã jari orroaɗapeɗa, setaa jaraɗakaurã ome trajaduanaɗai mauɗe responsablenuree baare (Proverbios 10:4, 26; Hebreos 13:18). Mauɗe Biblia biɗa dachimaa jaradeaɓuura kĩrajʉʉnureaɗai de baranii, paru uniibʉ̃ra mauɗe kãare koɓuu irakiruubʉrã. Maamina Dachi Akõre amiko nibai aude biʼia ɓua. Mateo 6:24, 25, 33; 1 Timoteo 6:8-10 leas.

Dachi Akõreba kʉ̃risiaɓuuba ũkuru dachi kakua biʼia unibai baita jaradeaɓua (Proverbios 14:30; 22:24, 25). Dachi Akõre leiba jaraɓuu itua biubariibʉrã dachi ẽpermabipeɗa o puʼuabiɓuu biɗa (Proverbios 23:20). Jeowaba dachimaa ituara ida dobinia maamina, aude aribia doɓeebai (Salmo 104:15; 1 Corintios 6:10). Jeowaba kʉ̃risiaɓuuba dachimaa ida chi ne kachirua waubikaa mauɗe kʉ̃risiai baɗa siɗa idaribiwẽa (Salmo 119:97-100). Maamina dachirãba Jesusɗe ijãanurerã dachirã biʼia wãɗai baitaburu Jeowa kĩra kʉ̃risiaɗakaa; bari, Dachi Akõre ʉtarebena, Jeowa respetoɗeeburu ichi kĩra kʉ̃risiabadaa. Mateo 5:14-16 leas.