Dachi Akõreba ẽbẽrarã joma drua aĩbenarãba ichi baare ambua duanaɗai ʉtaa wiɗibudauba kʉ̃riaɓua (Salmo 65:2). Maamina ichia ũrikaa jomaurãba ichimaa wiɗibudauɗe. Bibliaɗe jaraɓuu mukĩraba ichi wẽra biʼia ochiakauɓuubʉrã Dachi Akõreba ichia ʉtaa wiɗiruuɗe ũriibai (1 Pedro 3:7). Israelitarãba chi ne kachirua asepanasiiɗe ara kapichia, Dachi Akõreba ũrikuaabasia. Maamina, ichia ũribaria chi ẽbẽrarã ne kachirua asepeɗaaɗabaɗa waya kʉ̃risiaɗapeɗa aseɗaabai aruu ũribaria. Isaías 1:15; 55:7 leas.

Dachi Akõremaa ʉtaa wiɗibudauɗe, dachia unubipanuu ichi kʉ̃riaɗapeɗa mauɗe ichi ũribadau, mauɗeeburu dachia Jeowamaaburu ʉtaa wiɗiɗayua (Mateo 4:10; 6:9). Maubapeɗa, dachirã ne kachirua waubadaunuree bẽrã, Jesus trʉ̃ɗeeba ʉtaa wiɗiɗayua, ichi dachirã pekao kakua biuɗa bẽrã (Juan 14:6). Jeowaba dachia ʉrsaduura kʉ̃riawẽa, bari ʉtaa wiɗiɗai korasonɗeeba. Mateo 6:7; Filipenses 4:6, 7 leas.

Chi dachi Wauɗabaɗaba ũribarii dachia ʉtaa wiɗibudau chõpea akupanuuɗe biɗa (1 Samuel 1:12, 13). Ichia kʉ̃riaɓuu ʉtaa wiɗiɗai ewariruuɗe, ẽsebuɗaa, chiko koi naeɗe mauɗe problemarã taẽɗe. Salmo 55:22; Mateo 15:36 leas.

Besesɗe chaareaɓua Dachi Akõre ambuaduanaɗai dachi jʉ̃kaa ẽbẽrarã ijãaɗakau barauɗeeba. Mambea Dachi Akõreba nau iujãaɗe pas deai aɗabaɗa ʉ̃rʉbena atua jarabadau (2 Timoteo 3:1, 4; 2 Pedro 3:3, 13). Mauɗeeba dachi wabenarã  Jesusɗe ijãanuree jʉ̃kaa duanaɗai ãchia dachimaa beɗea kĩrawãrea jaraduu baare duanaɗai baita. Mauɗe ãchia biɗa nesitapanua dachia biɗa mipitaa beɗea jaradeɗekabudau. Hebreos 10:24, 25 leas.

Ẽbẽrarãba Dachi Akõre kʉ̃riabadau nuree ome meraabudauɗe dachirã ara ichi kaita duaneeɗayua. Chi reunion Jeowa ɗebena jaranũrẽɗe wabenarã pe baranuree kĩraka kawaɗai panuu. Romanos 1:11, 12 leas.

Dachi Akõre kaita ɓooyua ãreadu kʉ̃risiabaraɗai chi Bibliaɗe jarakuɓuu ʉ̃rʉbena. Kawa kʉ̃risias ichia kãare kʉ̃risiaɓuu, kãare asei mauɗe kãare jaraɓuuɗebena. Bichia Dachi Akõremaa ʉtaa wiɗiɓuubʉrã chi jãuɗebena kawa kʉ̃risiaɓuubʉrã, bichia kawai ichia dachi chi kʉ̃ria mauɗe ichi chi kuitaanii ʉ̃rʉbena. Josué 1:8; Salmo 1:1-3 leas.

Dachi Akõre jʉ̃kaa ɓoi ichiɗeburu pe baraɓuubʉrã. Chi pe ẽbẽra kĩraka nia ichi siɗa nedeaɗayu nesitaɓua, maara asepanuu dachia biʼia kʉ̃risiapanuuɗe chi dachia ijãapanuuɗebena. Mateo 4:4; Hebreos 11:1, 6 leas.

Jeowaba kʉ̃riaɓua ichi kʉ̃riabadaurã, ichia ũkuru aiɗabaria dachia ichiɗe ijãapanuu ɓuiɗaamaba mauɗe waa biuɗawẽa nureaɗaiɗe ijãaɗai baita karebaɓua (Salmo 91:1, 2, 7-10). Ichia jarabarii kãareba dachi kakua ẽpermai ɓuu mauɗe kãareba dachi nomaa akuɓuuyu, mauɗe saka biʼia nibai ʉ̃rʉbena jaradeɗekaɓua. Salmo 73:27, 28; Santiago 4:4, 8 leas.