Jeowaba nau iujãa asesia ẽbẽrarã mama eɗa duanaɗayua. Naabena wẽra Eva chi mukĩra Adan baare, ʉtʉ bajãaɗe duanaɗai baita Jeowaba aseebasia, bari chi anjelerã aria duanaɗai baita asesia (Job 38:4, 7). Jeowaba Adan iujãa kĩrawãreaɓuuɗe busia mau trʉ̃ra Eden basii (Génesis 2:15-17). Maubapeɗa, ichia Adan asesia mauɗe ichi warrarã baare kĩrajʉʉ biuɗawẽa duanaɗayua nama iujãaɗe. Salmo 37:29; 115:16 leas.

Chi iujãa joma kĩrawãrea ɓoobasia, ɓãarãburu eɗaɓuudu kĩrawãrea ɓoosia. Mauɗeeba Adan Eva ome warrarã ãrea kiriabadauba chi iujãa kĩrawãreaɓuu waa waribiɗayua ãchiaburu chi iujãa biʼia irapanaɗai basia (Génesis 1:28). Chi iujãaɗe ẽbẽrarã duanaɗayua jãara poyaa akabaɗawẽa. Salmo 104:5 leas.

Adan Eva omeba Jeowa beɗea ũriɗaabasiiba chi iujãa kĩrawãreaɓuuɗebena awara buekasma. Mauɗeeba chi mau iujãa wãʼãe ɓuu, mauɗe ẽbẽra waya maka asei baita wãʼãe ɓuu. Bibliaɗe jaraɓuu “nau Iujãa chi miaɗaanii juamaaburu deaɗabaɗa” (Job 9:24). Génesis 3:23, 24 leas.

Makara, ¿Jeowaba ichia kʉ̃risiaɓooɗa chi iujãa ome aseyu asewẽbaka? Makawẽma. Ichia asei kʉ̃risiaɗabaɗa mau aseyua. Ichira aude poder baraɓuu bẽrã (Isaías 45:18). Dachi Akõreba ẽbẽrarã ichia naeɗe nureabikʉ̃riaɓoosii kĩra asebiirua. Salmo 37:11, 34 leas.

Jesus Rei Dachi Akõre Kobiernoɗebenaba, nau iujãa aude kĩrawãreakiruuɗe babiyua. Jeowa chĩoburuu diaɗe Armagedón abadauɗe ichia anjelerã baare ẽbẽrarã Dachi Akõre kĩramaanuree kenaɗayua. Mambea ichia jũanuɓurua mil año chi jʉbawẽnii, chi anjel kachiruaba Adan Eva omerãmaa Dachi Akõre beɗea ũribiibaɗa. Jesusba chi ẽbẽrarã kachirua kenaruuɗe ichia  karebayua chi ẽbẽra biarã kinibiaamaba, mambea chi Dachi Akõre baita trajanureerã maũcha biuɗawẽa nurepaaɗe wãɗayua iujãa mipitaakiruuɗe. Apocalipsis 20:1-3; 21:3, 4 leas.

¿Sakaya Dachi Akõreba ẽbẽrarã waa ida supribiaabaiba? Jesusba jaraɗabasia “kãare unubaraɓeeɗai” nau pasai naeɗe. Ẽbẽrarã iɗibea ãrea supriduanua, nauba unubiɓuu dachirã “ara kaita koɓeesia chi ne kachirua barau akabai baita”. Mateo 24:3, 7-14, 21, 22 leas.

Chi mil año Jesusba ʉtʉ bajãareba nama iujãaɗe kobernaruuɗe ichia bikãa chi supriduanaɗabaɗa buekakãribaɗe wãyua (Isaías 9:6, 7; 11:9). Mauɗe chi Dachi Akõre kʉ̃rianurerã pekao jarekuaburua. Dachi Akõreba Jesusɗeeba ẽbẽrarã waa ẽpermaɗapeɗa, chõrabaɗapeɗa biubiawẽa. Isaías 25:8; 33:24 leas.

Ẽbẽrarã Dachi Akõre beɗea ũribudaurã chi iujãa kĩrawãrea kiruuɗe duanaɗayua (1 Juan 2:17). Jesusba ichi kaaɗe ãdanureabarirãmaa buekasia ẽbẽrarã sõbiakiruree jʉrʉkuaɗayua, mauɗe jaradeɗekaɗai baita Dachi Akõreba kʉ̃riaɓuu aseɗayua. Iɗibea, Jeowaba jaradeamaaɓuu ẽbẽrarã ãreadu iujãa kĩrawãreaɗe duanabii baita (Sofonías 2:3). Chi Jeowa ɗebena jaranũrẽba Dachi Akõre Kobierno ʉ̃rʉbena beɗeabadau deɗaa reunibudaurã, aria chi deɗabenarã ambuarã Dachi Akõre beɗea ũriɗe wãpanua. Aria saka kima bia nibai, akõre bia nibai kawaɗe wãpanua, mauɗe beɗea kĩrawãrea Bibliaɗe eɗa ɓee siɗa ũripanuu. Miqueas 4:1-4 leas.