BEƊEA 2
¿Kãare baita Dachi Akõre ʉ̃rʉbena kawaɗaiba?
1. ¿Sakayua dachia kʉ̃riaɗapeɗa ũriɗaiba Dachi Akõre?
Dachi Akõreba joma wauɗabasia. Ichira yataɗeeɗa nia mauɗe biuubai ɓua (Salmo 90:2). Bibliaɗe eɗa ichiɗebena beɗearã kĩrawãrea duanua (1 Timoteo 1:11). Ichia dachi ʉñaba deɗekasii bẽrã, ichidu kʉ̃riaɗapeɗa ũribaraɗai mauɗe ichi baitaburu trajaɗayua. Apocalipsis 4:11 leas.
2. ¿Saka nia Dachi Akõre?
Ẽbẽrarãba Dachi Akõre kiãdar unuɗakaa ichira jauri bẽrã, ichira dachirã aude nia, dachirãra kiuruɗe nureaɗapeɗa ɓʉʉrʉ baare nureeɗeeba (Juan 1:18; 4:24). Jambea, dachia kuitaapanua Dachi Akõre saka nii dachia joma ichia aseɗabaɗa unubudauba. Ichia didiwarau neponorã mauɗe jõrã waukaɗaba unubiɓua ichia dachirã chi kʉ̃ria mauɗe ãrea kuitaania. Dachia ʉtʉ bajãa ochiabudauba kuitaapanua ichira poder aribia baranii. Romanos 1:20 leas.
Mauɗe Dachi Akõreɗebena aude kawaɗai ɓua dachia chi ichi beɗeaɗe ɓʉkuɓuu leabudauɗe. Nauba jaraɓua saka ichia ẽbẽrarã biʼia ochia uaɓuu, kãare saka bustabarii mauɗe kãare bustakau, mauɗe jaraɓua ichia saka sentibarii dachia ne bia asepanuuɗe maẽbʉrã ne kachirua asebudauɗe. Salmo 103:7-10 leas.
3. ¿Dachi Akõre trʉ̃ baraɓue?
Jesusba nakaasia: “Dachi Akõre ʉtʉ bajãaɗe ɓuu, bichi trʉ̃ ʉ̃rʉbena atua jaraɗai idaribirãaba” (Mateo 6:9). Dachi Akõremaa naka trʉ̃jarabadau: Ʉtarebena, Dios o Señor, maamina ichira trʉ̃ propio barania. Jãu trʉ̃ ẽbẽrarãba ãrea beɗearãɗe diwarau jarapanua. Kapunia beɗeaɗe Jehová maẽbʉrã Yavé abadau mauɗe ẽbẽra beɗeaɗe Jeowa abadau. Salmo 83:18 leas (82:19 Chi ɓee Bibliarãɗe).
Bibliarã aribiauɗe, Dachi Akõre trʉ̃ Jeowa kambiaɗapeɗa Señor ome maẽbʉrã Dachi Akõre ome a jarabadaa. Maamina Biblia naberãeɗebenaɗe Dachi Akõre trʉ̃ 7 mil wañaa eɗa ɓʉkoɓoaɗa. Jesusba ẽbẽrarãmaa kawabiabachiiɗe Dachi Akõre ʉ̃rʉbena ichia jãu trʉ̃ ãrea jaraɗabasii. Juan 17:26 leas.
4. ¿Dachi Akõreba dachi ariɗe kʉ̃ria uakiɗika?
Cha nii akõre bianiiba chi warr kʉ̃riakiɗii kĩraka, Dachi Akõre biɗa kʉ̃riaɓua dachi biʼia duanaɗai baita
Jeowaba dachi kʉ̃ria uaniibʉrã, ¿sakayua dachi ida supribiaɓua? Chi nureeba kʉ̃risiabadau Dachi Akõreba supribiaɓuu dachi komprobayua. Maamina mau makawẽma. Santiago 1:13 leas.
Jeowaba dachi kʉ̃riaɓuuɗeeba dachimaa ida jʉrʉbiɓua chi o biaɗe wãɗai maẽbʉrã o kachirua jʉrʉɗai. ¡Chi ariɗeɓuura dachia aseɗai chi ichia jararuudu! (Josué 24:15). Maamina, ẽbẽrarã ãreaba chi kachiruadu aseɗai kʉ̃risiapanuu, mauburu ẽbẽrarã supriduanua. Jeowa nomaa akuɓeebaria dachirãba ariɗe aseɗawẽ unuruuba. Génesis 6:5, 6 leas.
Dachi Akõre Jeowaba dachi ariɗe kʉ̃ria uakiɗii mauɗe ichia dachirã kĩrajʉunuree unukʉ̃riaɓua. Mauɗeeba cha kachiruarã ãrea barau akabaiɗaa iraɓua ichia, mauɗe ẽbẽrarãba maũcha puʼua sentibiaamaba. Maumisa, ichia idaribiaɓua dachi supriduanaɗai baita. Chi beɗea 8ɗe bichia kawarua sakayua. 2 Pedro 2:9; 3:7, 13 leas.
5. ¿Saka Dachi Akõre kaita duanaɗai ɓua?
Jeowaba ida ʉtaa wiɗibiɓua ichi kaita duanaɗai baita. Ichia dachirã aɓa aɓaa kʉ̃ria uania (Salmo 65:2; 145:18). Mauɗe dachia miaɗaa asebudauɗe ichia perdonaɓua. Ichia kuitaaɓua dachirãba berekaduanuu chi bia aseɗai baita, besesɗe aseɗakaamina. Dachi jipa nureewẽmina, ichi ome amikorã baɗai ɓua. Salmo 103:12-14; Santiago 4:8 leas.
Jeowaba dachi ʉñaba deɗekasii bẽrã, dachia ãrea kʉ̃riaɗai ichidu (Marcos 12:30). Bichia mau unubiɓua, ichi ʉ̃rʉbena kawapeɗa mauɗe ichi beɗea ũriɓuuɗe. Naka asebʉrã, Dachi Akõreɗebena bikãa bikãa aude ara kaitaɓeei ɓua. 1 Timoteo 2:4; 1 Juan 5:3 leas.
