BEƊEA 7
¿Kãareba Dachi Akõre Kobierno?
1. ¿Kãareba Dachi Akõre Kobierno?
¿Sakayua Jesus chi Rei aude biʼia ɓua? (MARCOS 1:40-42).
Naara kobierno ʉtʉ bajãaɗebena, nau kobiernoba Dachi Akõreba asekʉ̃riaɓuu ʉtʉ bajãaɗe mauɗe iujãaɗe asebiyua. Jãu kobiernodu ẽbẽrarãba nesitapanua. Chi kobiernorã nama iujãaɗebena akabaiɗaa iraɓuu mambea ichiɗedu kuɓuyua mauɗe ichia ẽbẽrarã joma iujãaɗebena ambua duanabiai. ¿Bʉmaa nau beɗearã chi kĩrawãrea ãrea ɓuume? Daniel 2:44; Mateo 6:9, 10; 24:14 leas.
Kobierno jomaurãba kobernador aɓa nesitapanua. Mauɗeeba Dachi Akõre Jeowaba ichi Warr Jesucristo, trʉ̃asia chi Rei ichi Kobiernoɗebena baita. Apocalipsis 11:15 leas.
2. ¿Sakayua Jesus chi Rei aude biʼia ɓua?
Dachi Akõre Warr chi Rei aude ariɗe nia ẽbẽra biaɓuu bẽrã mauɗe ichiara joma jipa aseɓuuɗeeba (Mateo 11:28-30). Ichira poder ãrea baraɓua ẽbẽrarã aiɗai baita, mau aseruu ichia ʉtʉ bajãareba nama iujãaɗaa kobernaburuuɗe. Jesus ʉtʉ bajãaɗaa wãɗabasia ichi waya piradrubisiiɗe, aria Akõre jua biare akunuɓua. Mamaria esperaɓoosia Dachi Akõreba kobernabiruuɗaa (Hebreos 10:12, 13). Bikãa Dachi Akõreba kobernabisia. Daniel 7:13, 14 leas.
3. ¿Kairã baare kobernarua Jesusba?
Bibliaɗe jaraɓuu ichira kobernaruu ẽbẽrarã Dachi Akõre baita trajaduanurã ome. Daniel 7:27ɗe jaraɓuu Dachi Akõreba ãchira jʉrʉkuaɗabaɗa. Chi naa jʉrʉkuapeɗaaɗabaɗa Jesus apostolerã basiɗau. Jeowaba waa jʉrʉ uaɓua wẽrarã, mukĩrarã baare ãchirã pe baraduanurã. Ara jãka Jesus kĩra, naarã ẽbẽrarã biupeɗaaɗakare waya piradruɗai jauriɗe ʉtʉ bajãaɗaa. Juan 14:1-3; 1 Corintios 15:42-44 leas.
¿Sãabe ʉtʉ bajãaɗaa wãuriɗaiba? Bibliaba jaraɓuu ẽbẽrarã ara ɓãarãburu duanuu. Jesusba trʉ̃asii maarã “obejarã ara biɗĩkaburu duanuu” (Lucas 12:32). Jesus baare chi iujãa kobernabudaurã 144 mil baɗai. Apocalipsis 14:1 leas.
4. ¿Kãare sakasaa Jesus ʉ̃raburu empesakobernaɓeesiiɗe?
1914ɗe * Jesus kobernakoɓeesiɗe, aramama waa chi jʉbawẽnii ichi demoniorã baare ʉtʉ bajãaɗebena juretasia nama iujãaɗaa. Chi jʉbawẽnii ãreadu kĩrupeɗa mambea ichia nama iujãaɗe nejoma asekoɓeesia (Apocalipsis 12:7-10, 12). Mamareeɗabena ẽbẽrarã aude supriduaneesiɗaa. Bibliaɗe jaraɓuu ẽbẽrarã ãchi chiya chĩoɗapeɗa, iujãa uripeɗa, epermakuaɗapeɗa, jarbisia siɗa unubaraɓeebudauɗe mama unuɗai ara ɓãarã ɗiɗiburuu Dachi Akõre Kobierno nama iujãaɗe kobernayua. Iɗibea mau joma chi kachiruaɗebena unuduanua. Lucas 21:7, 10, 11, 31 leas.
5. ¿Kãare asemaaɓua Dachi Akõre Kobiernoba mauɗe kãare aseiba?
Iujãaɗe aribia jaradeamaaduanuuɗeeba, chi Dachi Akõre Kobiernoba jomaurã iujãaɗe chibʉrʉbiamaaɓua “ẽbẽrarã kabanaa”. Mukĩrarã wẽrarã baare sõbiakiruree ida Jesusmaa kobernabiɗapeɗa mauɗe ichi beɗea ũriduanua. Dachi Akõreba ãchi salbakuayua cha nau iujãa miaɗaa unukuɓuu akabaɗakare. Dachia biɗa chi joma biʼia kiruu Dachi Akõre Kobiernoba dearuu adauɗakʉ̃riapanuubʉrã Jesusba jaraɓuuɗe ũriɗayua. Apocalipsis 7:9, 14, 16, 17 leas.
Mil añoɗe Dachi Akõreba ichia kʉ̃risiaɓoaɗabaɗa asei baita mau aseburua. Nau iujãa kĩrawarẽa ãrea ɓeeyua. Mau kaaɗe, Jesusba chi Kobierno ichi Akõre juamaa waya deayua (1 Corintios 15:24-26). ¿Bichia kaimaa Dachi Akõre Kobierno ʉ̃rʉbena beɗeai kʉ̃riaɓua? Salmo 37:10, 11, 29 leas.
^ par. 6 Jeowaba jaraɗabaɗa 1914 ʉ̃rʉbena bichia aude kawakʉ̃rianiibʉrã, jʉrʉs chi libro akarrareɓuu chi 22 pakina 217-220 chi libroɗebena ¿Qué nos enseña la Biblia?
