Jesus ẽbẽrarãɗeebiɗa diwara nia, ichi nama iujãaɗe nasei naeɗe ʉtʉ bajãaɗe jauridu nibasia (Juan 8:23). Ichidu naa Jeowaba aseɗabasia, mauɗe joma barau ichia ũkuru aseɗaa. Bibliaba trʉ̃aɓuu chi Warr aɓaburu nii, ichira Jeowa juaburu aseɗa bẽrã (Juan 1:14). Mauɗe “chi Beɗea deabarii” trʉ̃abadau siɗa ichi chi Akõreba joma jaradeaɗa jaraɗe wãɗa bẽrã. Proverbios 8:22, 23, 30; Colosenses 1:15, 16 leas.

Dachi Akõreba ichi Warr nama iujãaɗaa bueɗabasia. Ʉtʉ bajãaɗeeba Maria biteɗa eɗa busia, ichira awẽra, mukĩra ome ara maka kãiwẽanii mauɗe judia basii. Mauɗeeba Jesus akõre nama iujãaɗe wãʼãe nibasii (Lucas 1:30-35). Jesus nau aseɗe neesia: (1) Dachi Akõre ʉ̃rʉbena ariɗe jaraɗeaɗe, (2) dachimaa jaradeɗekaɗe saka aseɗai Dachi Akõreba jaraɓuu problemarã barauɗe, mauɗe (3) ichi kakua pekaoswẽanibas bẽrã biuɗe neesii dachirã “karebayua”. Mateo 20:28 leas.

Dachirãba nesitapanuu dachirã karebaɗai ara jãka jari ẽbẽra jidau oɗoeɗakare mauɗe aɓauba paaɗe neeruu kĩraka (Éxodo 21:29, 30). Dachi Akõreba ẽbẽrarã chõrabaɗapeɗa biuɗai kʉ̃riawẽa ɓoosia. Nau kuitaapanuu Jeowaba Adanmaa jaraɗaba. Ichia jarasia ichi beɗea Adanba ũriibʉrã biuyua. Adan ũriɗabasirã biuubai baɗa (Génesis 2:16, 17; 5:5). Bibliaba jaraɓuu, dachi iɗi kiniduanurã Adanɗeeburu “neesii”. Adanba chi warrarãmaa chi pekao deɗekasiiɗeeba iɗi jomaurã biuduanua. Mauɗeeburu, jomaurãba pekaoɗebena karebaɗai nesitapanua. Romanos 5:12; 6:23 leas.

 Makara, ¿kaiba paai ɓoosaa dachirã pekao karebayua biuduanuuɗebena? Dachi biuburuuba, paapanua dachirãdu chi pekao asebadauɗeeba. Junebenarãba paaɗaabai ɓua chi dachia aseɗa kakua. Salmo 49:7-9 leas.

Jesus dachirãɗeebiɗa diwara nibasia, ichiara pekao aseebaɗaa. Mauɗeeba ichi pekao kakuara biuubasia, bari wabenarã pekao kakuaburu biuɗabasia. Dachi Akõreba ichi Warr buesia dachirã pekao kakua biui baita, ichia dachi ãrea kʉ̃ria uaɓuuɗeeba nau asesii. Jesusbiɗa dachi kʉ̃riaɗeeba, ichi Akõre beɗea ũripeɗa dachirã kakua biusii, jãkaburu dachirã pekaowẽ mauɗe biuɗawẽa duanaɗayua. Juan 3:16; Romanos 5:18, 19 leas.

Bideo ochias ¿Sakayua biusá Jesus?

Jesus iujãaɗe nibasiiɗe, ichia ẽpermorã alentakuapeɗa, biupeɗaaɗarã waya piradrubiapeɗa, mauɗe chi suprikeɗee aiɗakuaɗabasia. Nauba unubiɓuu chi Dachi Akõre baita trajanuree ne bia uneeɗayu (Mateo 15:30, 31; Juan 5:28). Jesus biusiiɗe, ichi Akõreba jauri kĩraka piradrubisia ʉtʉ bajãaɗe (1 Pedro 3:18). Mambea ichia esperasia ichi Akõre jʉ̃kaa juabiare rei babiruuɗaa nau iujãa kobernai baita (Hebreos 10:12, 13). Iɗibea, Jesusba ʉtʉ bajãaɗe kobernaɓua, mauɗe ichi kaaɗe ãdanureabariiba nau beɗea kĩrawãrea jaradeaduanua joma nau iujãaɗe. Daniel 7:13, 14; Mateo 24:14 leas.

Dachi Akõreba Jesus rei babisii bẽrã mauɗe ãrea poder baranii bẽrã chi nau Reiba ẽbẽrarã kachiruarã akabaiɗaa iraɓua, mauɗe joma chi ãchia kachirua aseduanuu wabenarã supribiaɗayua. Joma ẽbẽrarã Jesus beɗeaɗe ijãaɗapeɗa ũriduanuu kĩrajʉʉduanaɗayua nau iujãaɗe kĩrawãrea baruuɗe. Salmo 37:9-11 leas.