Dachi Akõreba puuru orkanisaɓuu asesii lider Abrahan warrarã ome mambea leirã deɗekasii. Cha nau puuru Israel trʉ̃jaraɗabasia mauɗe ãchia Dachi Akõre beɗea jaradeɗeakai basia mauɗe ẽbẽrarãba Dachi Akõre kʉ̃riaɗapeɗa beɗea ũribiaɗai (Salmo 147:19, 20). Jãuɗeeba, ẽbẽrarã drua aĩbenarãba Dachi Akõreɗebena kosa biarã adaui panasia. Génesis 22:18 leas.

Dachi Akõreba kawa jʉrʉsia chi israelitarã ichiɗebena jaradeabiyua. Ãchi chi lei Dachi Akõreɗe ũribabaɗarã biʼia wãɗai panasia (Deuteronomio 4:6). Maarãɗeeba, wabenarãba kawaɗai basia Dachi Akõre aɓaburunii ʉ̃rʉbena. Isaías 43:10, 12 leas.

Chi israelitarãba Jeowaɗe ijãaɗawẽa duaneesiiɗe, ichia june jʉrʉsii Jesus kaaɗe nureabarirã ichi puuru babii baita (Mateo 21:43; 23:37, 38). Mauɗeeba, iɗibea Jeowa baita trajaduanuu mauɗe ichi ʉ̃rʉbena jaradeaduanuu maarã Jesusɗe ariɗe ijãanuree, chi israelitarãra baɗawẽa. Hechos 15:14, 17 leas.

Jesusba ara ambua buekasia ichi kaaɗe nureabarii wabenarãmaa jaradeabiapeɗa bautisabiayua joma nau iujãaɗe (Mateo 10:7, 11; 24:14; 28:19, 20). Mauɗeeburu iɗi, kaaɗebena diarãɗe, aude ẽbẽrarãmaa jaradeɗekamaapanua naeɗe aseɗaabaɗa kĩra. Jeowaba puuru ãibenarã jomaurã chibʉrʉbiamaaɓua chi relijion ariɗe jaradeaɓuuɗaa wãuriɗai baita (Apocalipsis 7:9, 10). Chi bia orkanisapanuu bẽrã, chi Jesusɗe ijãanureerã ãchi chiya beɗea kĩrawãrea jaraɗapeɗa, ũkuru aiɗaɗapeɗa mauɗe ãchi reunionɗe biɗa jomaurãba ara aɓaɓuu chi Bibliaɗebena kawaduanua. Hebreos 10:24, 25 leas.

1870 mau año kaita, chi orkanisasion Bibliaɗebena estudiaduanuu ara biɗĩkaburupanuuba unukopaneesiɗaa chi ariɗe jaraɓuu Bibliaɗebena eɗa meraɓeaɗabaɗa yataɗeeɗa. Ãchia kuitaapanasii Jesusba ichiɗe ijãanuree buekaɗabasii wabenarãmaa jaradeɗekaɗe wãɗai baita. Mauɗeeburu iujãa jomauɗe Dachi Akõre Kobiernoɗebena jaradeɗekaɗe wãuchiɗau. 1931ɗe ãchi Jeowa ɗebena jaranũrẽ trʉ̃asiɗaa. Hechos 1:8; 2:1, 4, 11; 5:42 leas.

Jesus biuɗakaaɗe, apostolerã diaɗe chi konkrekasiona Jesusɗe ijãanureeɗe iujãa jomauɗe ãchirã juntarãɗe dawaraurãɗe uaduanasia. Jãu juntaba kawapanasii Jesusba ũkuru aiɗaɓuu chi konkrekasiona (Hechos 16:4, 5). Ara maka, chi Jeowa ɗebena jaranũrẽ Junta mukĩrarãba chi kawa ãrea nurerãɗe irapanua ãchia ochiakopaneebarii chi Betelna joma nau iujãaɗebena. Maarã deɗe tradusiɗapeɗa, imprimiɗapeɗa mauɗe kartarã Bibliaɗebena deɗekapanua 800 beɗearã aude. Chi dawarãuba juntaɗebena Biblia barauba beɗea kĩrawãrea wabenarãmaa jaradeɗekapanua mauɗe orientasion siɗa deapanuu 120 mil aude ɓee konkrekasionɗebenamaa. Jãu konkrekasionɗe biɗa mukĩrarã chi kawa ãrea nuree ãchia kʉ̃ria ãrea ochia uanuree ẽbẽrarã Dachi Akõre beɗeaɗe ijãanuree. 1 Pedro 5:2, 3 leas.

Chi Jeowa ɗebena jaranũrẽ orkanisaduanua beɗea kĩrawãrea jaradeɗekaɗayua chi Bibliaɗe eɗa koɓee mauɗe bautisakuaɗayua ẽbẽrarã. Ãchia decha jaradeɗekaɗe wãpanua Dachi Akõre beɗea, aramaka apostolerãba asepeɗaaɗa kĩra (Hechos 20:20). Mauɗe semanacha Bibliaɗebena jaradeapanua Dachi Akõre beɗea ũrikʉ̃riapanuumaa. Chi orkanisasionɗe duanuumina, ãchirã deɗabenarã kĩra duanua akõreba biʼia ochia uaɓuu mauɗe ãchirã ãbachekerã nawekaurã baare chi kʉ̃ria ãrea duanua (2 Tesalonicenses 1:3). Dachi Akõre baita trajanuree biʼia orkanisaduanuu bẽrã chaarea trajaduanua ichi kĩrajʉʉbiɗapeɗa mauɗe wabenarã aiɗaɗayua, ãchira deɗabenarã kĩra duanua aude kĩrajʉʉ duanuu nau iujãaɗe. Salmo 33:12; Hechos 20:35 leas.