BEƊEA 8
¿Sakayua Dachi Akõreba ẽbẽra kachirua barau idaribiaɓua mauɗe supriduanuuɗebena?
1. ¿Saka chi ẽbẽra kachiruarã imibaraɓeesaa?
Dachi Akõreba ẽbẽrarãmaa ida kobernabiaɓua unubiyua ãchirãba poyaa kobernaabapeɗa ni solusionaabai ɓuu chi problemarã
Chi kachirua neesii iujãaɗaa chi jʉbawẽniiba naa setaa jarasiiba. Ichira anjel bia basia mauɗe ne kachirua asekaubaɗaa, maamina “chi ariɗe Dachi Akõre ʉ̃rʉbena kawaɗa ũriibasii bari, setaa jarakoɓeesia” (Juan 8:44). Dachi Akõre kʉ̃riaɗapeɗa ũriɗai baɗa ichidu kʉ̃riaɗapeɗa ichi beɗeadu ũribiakʉ̃riaɓoosia. Setaba naabena wẽra, Eva jãu kũruasia Dachi Akõre beɗea ũribiimaba, bari ichi beɗeadu ũribiyua. Adanba ichi wẽra beɗeadu ũrisia mambea Akõre beɗeara ũriibasia, mauɗeeburu ẽbẽrarã ãrea supriɗapeɗa biuduanua. Génesis 3:1-6, 19 leas.
Chi jʉbawẽniiba Evamaa Akõre beɗea ũrirãaba asiiɗe, jãma ãchi chi kĩrubi ãrea niɗau babiasia. Jeowadu derecho baraɓuu kobernai baita mauɗe ichi ʉ̃rʉ ara maũcha ɓookaumina chi jʉbawẽniiba ochiakʉ̃riaabasia, ẽbẽrarã kabanaa chi jʉbawẽnii jʉ̃kaaburu wãurisiɗaa jãuba unubiɓuu ichia kʉ̃riawẽɓua Dachi Akõreba joma kobernai baita, mauɗeeburu dachirãra “Dachi Akõreɗe ijãaɗakaurã chi [jʉbawẽnii] juaɗe duanua”. Juan 14:30; 1 Juan 5:19 leas.
2. ¿Dachi Akõreba aseɗabaɗa biʼia ɓeebasee?
Joma Jeowaba aseɗabaɗa jipa keɗea. Chi naabena ẽbẽrarã mauɗe chi anjelerã baare ãchirãra Akõre beɗea ũriduanasia (Deuteronomio 32:4, 5). Ichia idaribiaɓua ẽbẽrarãmaa chi ne kachirua aseɗapeɗa o chi ne bia aseɗai baita dachi du aɓauɗeeba. Jãuba dachia kʉ̃riaɗeeba ichi beɗea ũribiaɓua. Santiago 1:13-15; 1 Juan 5:3 leas.
3. ¿Sakayua Dachi Akõreba ẽbẽrarã ida supribiaɓua?
Jeowaba idaribiaɓua ẽbẽrarã ara ãchi du aɓa kobernaduanaɗai baita. Maka unubiɓuu Dachi Akõreba ãchi aiɗakauɗeeba ãchia ũkuru aiɗaɗawẽ ẽbẽrarã kirajʉʉduanabiɗai baita (Eclesiastés 7:29; 8:9). Yataɗeeɗa kobierno wãʼãe jipa asei baita iɗiɗaa, ni ẽbẽra kachiruarã siɗa akabaabapeɗa, chĩoduanuu, epermeduanuu akabaɗawẽa panua. Jeremías 10:23; Romanos 9:17 leas.
Maamina, chi Dachi Akõreba ãchi kobernabia kʉ̃riaduanuu, nejoma biakeɗee uaneeburuu adauɗayua (Isaías 48:17, 18). Jeowaba ẽbẽrarã nama iujãaɗe kobernaduanu akabaiɗaa iraɓua. Dachi Akõre Kobierno baare duanaɗakʉ̃riapanudu nau iujãaɗe duaneeɗayua (Isaías 11:9). Daniel 2:44 leas.
4. ¿Kãare unubiɗaiba Dachi Akõreba chi supriduanuu akabaruumisa?
Satanasba jaraɓua chi ẽbẽrarã Dachi Akõre baitaburu trajapanuu ichia kosarã biarã deaɓuuɗeeburu. Maamina dachia kosarã biʼia asepanuuba, unubipanua chi jʉbawẽniiba setaa jaraɓuu, mauɗe dachirã Dachi Akõre Kobierno jʉ̃kaaburu duanakʉ̃riapanuu, mauɗe kobierno iujãaɗebena jʉ̃kaara duanaɗakʉ̃riaɗawẽa, Dachi Akõreba chi kachirua akabaruumisa. Job 1:8-12; Proverbios 27:11 leas.
5. ¿Saka Dachi Akõre jʉ̃kaa duanaɗaiba?
Chi dachia asepanuuba, unubipanua Dachi Akõremaa kobernabiɗai kʉ̃riapanuu o kʉ̃riaɗawẽ
Naa kawabaraɗai, dachia saka ichi ũriɗapeɗa kʉ̃riaɗai mauɗe chi relijion ariɗe jaradeaɓuuba jaraɓuu aseɗai, ichia chi Bibliaɗe jarakuɓuudu jaradeɗekaɓuu bẽrã (Juan 4:23). Mauɗe, dachia Jesusba aseɗa kĩraka asepanuubʉrã politikaɗe eɗa wãɗaabapeɗa mauɗe wabenarã ome chĩoɗapeɗa duanuuwẽbʉrã, makara dachi chi kobierno chi jʉbawẽniiɗe duanaɗaabayua. Juan 17:14 leas.
Chi jʉbawẽniiba ẽbẽrarãmaa nejoma miaɗaa ɓee asebiɓua ãchi kakua ẽpermabiyua mauɗe jari miaɗaa junebena mukĩra ome ichi kimawẽnii baare kãinoɓooɗe wãruu. Dachia naka ɓee aseɗawẽɗe dachi deɗabena maẽbʉrã dachi amikorãba atua jaraɗayua (1 Pedro 4:3, 4). Maka ɓee unuɗarã kawa kʉ̃risiaɗai kãare aseɗayu. Makara, ¿dachirã chi Dachi Akõre kʉ̃rianuree ome meraaɗayue? ¿Dachi akawa ũriɗayue Dachi Akõre lei biarã? Jãka aseɗarã unubiɗayua dachia chi jʉbawẽniiba setaa jaraɗa, ẽbẽraba ũriɗaabai Dachi Akõre beɗea problema taẽɗe. 1 Corintios 6:9, 10; 15:33 leas.
Dachi Akõreba dachi kʉ̃ria uaniiɗeeba ichia waa ẽbẽrarã ida supribiaabayua mauɗe chi ẽbẽra kachiruarã akabakuayua. Chi pe nauɗe baranuree nau iujãaɗe waa duaneebudaa. Juan 3:16 leas.
