¿Bichimaa jara panue chi reunión Jeowa ɗebena Jaranũrẽɗeɗaa wãyua? Bichi reunionɗaa naeɗe ɓes aɓa biɗa wãkau niibʉrã, ¿waweakae aɓa ɓuuɗaa wãburuuɗeeba? Bichia naka kʉ̃risiai ɓua: “¿Kãare ase duanabaraa Jeowa ɗebena Jaranũrẽ ãchi reunionɗe? ¿Sakayua importante ãrĩã ɓua ãchi baita? ¿Mʉ siɗa wãi ɓue?”. Nau lesionɗe kawayua bichi reunionɗaa wãaruuba, saka Dachi Akõre jʉ̃kaa aude nibai mauɗe sakayua biʼia ãrĩã ɓuu.

1. ¿Kãarea reunionɗaa wãbadaa?

Bibliaɗebena ɓʉɗaba jaraɗa basia sakayua importante ãrĩã ɓuu reunionɗaa wãyu, ichia naka asia: “Chi konkrekasionɗe biʼia jarayua Jeowa ʉ̃rubena” (Salmo 26:12). Iɗi biɗa, Jeowa ɗebena Jaranũrẽ ãbua reunibadama maabea kĩrajʉʉ ãrĩã duanabadaa. Joma iujãaɗe, semanacha reuni duanabaria Dachi Akõre ʉ̃rʉbena beɗeaɗayua, kariɗapeɗa maabea ʉtaa ãbua wiɗikuaɗayua. Ɓesesɗe ãbua duanabarii asamblea aseɗai baita añocha.

2. ¿Kãare kawaburua bichia dai reunionɗe?

Reunión diaɗe Dachi Akõre Beɗea ʉ̃rʉbena jaradeabadau, mama aria chi Bibliaba jara ɓuu ariɗe kawabibadaa (Nehemías 8:8 leas). Bichi wãrã, waaburu kawayua saka nibabarii Jeowa. Bichia kawarã ichi kʉ̃ria ãrĩã inii, bichi ichi amiko ba kʉ̃riayua. Mauɗe ichia biɗa ũkuru kawabiyua saka kĩrajʉʉ nibayu (Isaías 48:17, 18).

3. ¿Ẽbẽrarã reunionɗe duanuuba bichi saka aiɗaɗai ɓua?

Jeowaba dachimaa jara ɓuu “jʉrʉɗai panuu saka chiya aiɗaɗai aude kʉ̃riaɗai baita mauɗe chi bia wauɗai baita. Ãbua duanaɗai ida ɓuɗaabai panuu” (Hebreos 10:24, 25). Dai reuniorãɗe unuyua ẽbẽrarã ãchi chiya kʉ̃ria kirureerã mauɗe bichi kĩra Dachi Akõre ʉ̃rʉbena kawaɗa kʉ̃ria panuu. Aria ũriyua beɗea chekerã Bibliaɗebena adaupeɗaaɗa baɗa mauba bichi biʼia sentibii (Romanos 1:11, 12 leas). Mauɗe ẽbẽrarã kima kãipeɗaaɗa mauɗe du nuree ome biɗa beɗeaɗai ɓua, ãchi jãarã bariara problemarã barau adua naa kãribasiɗau. Mauɗeeba Jeowaba kʉ̃ria ɓuu reunionɗaa wãɗayua waaburu.

 AUDE KAWABA

4. Chi reuniorã Jeowa ɗebena Jaranũrẽɗe

Chi nabẽrarã cristianorã ãbua duanabachiɗaa Jeowa ũriɗapeɗa kʉ̃riaɗayua (Romanos 16:3-5). Colosenses 3:16 leaɗapeɗa, mambea nau ʉ̃rʉbena beɗeasturu:

• ¿Kãare asebachiɗaa chi nabẽrarã cristianorãba Jeowa kʉ̃riaɗapeɗa mauɗe ichi ũriɗayua?

1. Dai reunionɗe Bibliaɗebena jaradeaɗapeɗa, kawabibadaa saka jaradeai aɓabenamaa, maabea bideorã unubibadau. Chi reunión ẽpesaburuuɗe ʉtaa wiɗiɗapeɗa, karibadaa ara terminaaduu dauchia biɗa.

2. Chi wãuribudaurã jua ʉtaa ʉaɗapeɗa beɗeaɗai ɓua.

3.   Jomaurã wãɗai ɓua: mukĩrarã, kũudrãarã, wẽrarã, warrarã nureeɗeeɗa...

4. Chi reunión Jeowa ɗebena Jaranũrẽrãɗe baribʉ. Chi nejarra wiɗiɗakaa mauɗe entrai baita biɗa paaɗaabayua.

5. Bariara chaarea ãrĩã ɓumina, chi reunionɗaa wãbaraaɗai

• ¿Sakayua dachi waaburu wãuri duanaɗaiba chi reunionɗaa?

 NAU KAWASIƊAA

Chi reunionɗaa waa wãrã, makarã Jeowa ʉ̃rʉbena ãrĩã kawayua, saka aude ichi kaita duanaɗai mauɗe saka ichi ũriɗapeɗa kʉ̃riaɗai waabenarã ẽbẽrarã ome.

Waya berreaɗaika

• ¿Sakayua Jeowaba jara ɓua dachirã reunionɗaa wãɗai baita?

• ¿Kãare kawaiba chi reunión Jeowa ɗebena Jaranũrerãɗe?

• ¿Sakayua biʼia ɓua reunionɗaa wãyu?