LESION 16
¿Kãare asesaa Jesús nama iujãaɗe ɓoosiiɗe?
Ẽbẽrarã aribiaurãba Jesús ʉ̃rʉbena kʉ̃risiabadau ichi kĩrabara wãwa kĩra, makawẽebʉrã mukĩra biumaa ɓuu kĩra mauɗe chi nureerãba kʉ̃risiabadau ichira ẽbẽra biadu nibasii aɗapeɗa. Dachia Jesús nama iujãaɗe kãare asesii ʉ̃rʉbena kawaɗarã, aude ichi ʉ̃rʉbena kuitaaɗai ɓua. Nau lesionɗe, kauwa ochiabudaa Jesusba kãare biʼia ɓee aseɗa baɗa ʉ̃rʉbena mauɗe sakayua biʼia ɓua jãu kawaɗayu.
1. ¿Kãare trajodu Jesusba aude asebachaa?
Jesús neesii “chi beɗea biarã Dachi Akõre Kobiernoɗebena jaradeayua” ẽbẽrarãmaa (Lucas 4:43 leas). Ichia jaradeɗekabachia Dachi Akõreba kobierno kuɓuiɗebena, jãuba chi problemarã barau ẽbẽrarãɗe akababurua. a Tres año y medioɗe, Jesusba akawara jaradeɗekasia chi nau beɗea biʼia kiruuɗebena (Mateo 9:35).
2. ¿Kãare unubisaa Jesusba chi milagro asesiiɗe?
Bibliaba nebʉrʉ ɓuu “Dachi Akõreba milagrorã ãrĩãdu aseɗa baɗa jãuɗeeba [Jesús]” (Hechos 2:22). Dachi Akõre poderɗeeba, Jesusba kue mechibena che koɓooɗa apiibisia, ichia ẽbẽrarã aribiaurãmaa chiko kobikuasia, ẽpermo keɗearãɗa siɗa aribiabisia mauɗe chi nuree kinipeɗaaɗa baɗa waya piradrubiasia (Mateo 8:23-27; 14:15-21; Marcos 6:56; Lucas 7:11-17). Chi milagrorã Jesusba aseɗaba unubisia ichi Dachi Akõreba bʉeɗa baɗa. Maubapeɗa, Jeowa poder ãrĩãdu baraa ɓuu dachi problemarã akababii baita.
3. ¿Kãare kawaɗai ɓua Jesús nibaɗa ʉ̃rʉbena?
Jesusba Jeowa beɗea aɓa ũriɗadu kerasia (Juan 8:29 leas). Asta biusiiɗaa jipa ɓoosia mauɗe asesii chi Akõreba jaradeaɗa baɗa, bariara aribiaurãba idaarabiɗaamaa panasmina. Ichia unubisia ẽbẽrarã Dachi Akõre baita trajaɗai panuu bariara problemarã chaarea ɓee ira duanuu adua. Mauba, Jesusba “unubiasii” jomaurãmaa dachirã “ichi kĩra nureaɗai” (1 Pedro 2:21).
AUDE KAWABA
Ochiaɗaika saka Jesusba beɗea biarã jaradeɗekaɗa mauɗe milagrorã saka aseɗa baɗa.
4. Jesusba beɗea biarã jarakuasia
Jesús o põesãa koɓeeɗe tʉasia ichia jaradeɗekayua beɗea biarãɗebena ẽbẽrarã joma unuburuurãmaa. Lucas 8:1 leaɗapeɗa, mambea nau ʉ̃rʉbena beɗeasturu:
-
¿Jesusba jaradeɗekasee ichimaaburu wãurisiɗau ichi beɗea ũriɗayua?
-
¿Kãare asei basaa Jesusba ẽbẽrarã unukuayua?
Dachi Akõreba jarasia chi Mesiasba jarayu chi beɗea biarãɗebena. Isaías 61:1, 2 leaɗapeɗa, mambea nau ʉ̃rʉbena beɗeasturu:
-
¿Jesusba saka kumplisaa nau profecía?
-
¿Bichimaa ẽbẽrarãba iɗibea biɗa nesita panabaaka jãu beɗea biarã ũriɗai?
5. Jesusba jaradeɗekasia chi biʼia ɓuuɗebena
Maubapeɗa, Jesusba beɗea biarã Dachi Akõre Kobierno ʉ̃rʉbena jaradeasii juare, ichia konsejo biarã siɗa deɗekasia. Ochiaɗaika chi ɓee konsejorã Jaradeaɗa baɗa Ea ɓuuɗe. Mateo 6:14, 34 mauɗe 7:12 leaɗapeɗa, mambea nau ʉ̃rʉbena beɗeasturu:
-
¿Kãare konsejorã biarã deasaa Jesusba naarã versiculorãɗe?
-
¿Bichia kʉ̃risia ɓue naarã konsejorã biarã iɗibena ẽbẽrarã baita biʼia aiɗai ɓuu?
6. Jesusba milagrorã asesia
Jeowaba Jesusmaa poder deasia ichia milagrorã aribia aseyua. Aɓa ochiayua, Marcos 5:25-34 leábaɗa o BIDEO ochiábaɗa. Mambea nau ʉ̃rʉbena beɗeasturu:
-
Chi bideoɗe, ¿kãareɗebena akawa kuitaa ɓoosaa chi wẽra ẽperma ɓooɗaba?
-
¿Kãare ãrĩã busta ɓua chi jãu milagroɗebena?
Juan 5:36 leaɗapeɗa, mambea nau ʉ̃rʉbena beɗeasturu:
-
¿Kãare “unubi ɓua” chi milagrorã Jesusba aseɗaba?
¿Bichia kuitaa ɓoosee?
Joma dachia Jesusɗebena kuitaa duanuu ɓʉ kuɓua Bibliaɗe chi kimare librorã Evangelio a ɓeeɗe. Chi Evangelio kimare ɓʉpeɗaaɗa baɗarãba (Mateo, Marcos, Lucas mauɗe Juanba) Jesús ʉ̃rʉbena ãrĩã jarasiɗaa. Chi joma ãchia jarapeɗaaɗa baɗa ara aɓa ɓuuɗe deasiɗaa mauɗe ũkuru kawabi panua Jesús kãare asesii mauɗe saka nibasiiɗebena.
-
MATEO
mauba naa chi Evangelio ɓʉɗa basia. Ichi libroba jara ɓua Jesusba jaradeɗekaɗa baɗa ʉ̃rʉbena mauɗe chi Kobierno Dachi Akõreɗebenaɗe jaraɗa.
-
MARCOS
ichia chi Evangelio kakatua ɓuu ɓʉɗa basia. Chi ichia jara ɓuu biʼia ãrĩã ɓua maabea ãrĩãdu kĩrajʉʉbi ɓua.
-
LUCAS
mauba unubi ɓua sakayua biʼia ãrĩã ɓuu ʉtaa wiɗiɗayu mauɗe saka Jesusba wẽrarã biʼia ãrĩãdu ua nibasii.
-
JUAN
ichia ãrĩãdu jarabarii Jesús saka nibaɗa ʉ̃rʉbena, mama eɗa ãrĩãdu ɓʉ koɓee Jesús beɗeaɗa baɗa ichi amikorã ãrĩã kaita keɗeerã ome mauɗe waabenarã ẽbẽra baare biɗa.
CHI NUREE ẼBẼRARÃBA NAKA JARABADAA: “Jesús Dachi Akõre baare ara aɓa nii”.
-
¿Kãare kʉ̃risia ɓua bichia?
NAU KAWASIƊAA
Jesusba Dachi Akõre Kobierno ʉ̃rʉbena jaradeɗekasia, milagrorã asesii mauɗe jomaurãɗe Jeowa beɗeadu ũrisia.
Waya berreaɗaika
-
¿Kãare trajodu Jesusba aude asebachaa nau iujãaɗe?
-
¿Kãare unubisaa Jesusba chi milagro asesiiɗe?
-
¿Jesusba dachirãmaa kãare biʼia ɓee jaradeɗekasaa?
NAU OCHIAS MAUCHABURU KAWAYUA
¿Kãaredu Jesusba jaradea ɓoosaa?
“¿Sakayua biʼia ɓua chi Kobierno Dachi Akõreɗe Jesús baita?” (Chi Kartaba, 1 octubreɗe 2014ɗebena)
Ochias sakayua dachirãba kuitaa panuu chi Jesús milagro arikʉɗe aseɗa baɗa.
“Milagro Jesusɗe: ¿kãare kawai ɓua mauɗebena?” (Chi Kartaba, 15 julioɗe 2004ɗebena)
Leas saka mukĩra nii kambiaɗa baɗa ichia Jesús ʉ̃rʉbena kawasiiɗe ichiɗeburu kʉ̃risiaka basii ʉ̃rʉbena.
“Mʉʉɗeburu ãrĩãdu kʉ̃risia ɓoosia” (Chi Kartaba, 1 octubreɗe 2014ɗebena)
Ochias aɓaaɓaa Jesusba aseɗa baɗa iujãaɗe.
“Jesús nibaɗa iujãaɗe” (La Biblia. Traducción del Nuevo Mundo, apéndice A7)
a Chi lesiona 31ɗebena waa 33ɗaa biʼia jara ɓua chi Kobierno Dachi Akõreɗebena.
