LESION 17
¿Saka nia Jesús?
Dachia Jesusɗebena kawabudauɗe nama iujãaɗe ichia aseɗa mauɗe jaraɗaɗebena, maabea dachia ichi bia niiɗebena kawabudauba, ichi mauɗe ichi Akõre Jeowa kaita nibabi ɓua. ¿Jesús saka ẽbẽra biʼia kiɗibasaa? ¿Kãare aseɗai ɓua dachirãba Jesús kĩra nureaɗayua?
1. ¿Kãareɗe Jesús ichi Akõre kĩra nia?
Jesús yataɗeeɗa ʉtʉ bajãaɗe nia, ichia ochia ɓuu ichi Akõre kʉ̃ria ãrĩãdu mauɗe kawaaruu ichiɗebena. Mau kakua, ichia kʉ̃risiapeɗa, sentipeɗa mauɗe ase ɓua ichi kĩra (Juan 5:19 leas). Mauɗeeba, Jesusba biʼia ãrĩãdu unubi ɓuu chi Akõre kĩra ara ichiɗebena, mauɗeeba ichia jarasii: “Chi mʉ unuɗaba, unusia mʉ Akõre siɗa” (Juan 14:9). Bichia Jesús ʉ̃rʉbena biʼia ãrĩã kawa niibʉrã, aude biʼia kawayua Jeowa ʉ̃rʉbena. Jesusba chi chuburia ãrĩãdu unubisii ẽbẽrarãmaa, jãuba unubi ɓuu Jeowa biɗa jãka senti ɓuu bichi kakua.
2. ¿Jesusba saka unubisaa ichia ichi Akõre kʉ̃ria nii?
Jesusba naka asia: “Chi joma iujãaɗe kawaɗai baita mʉa Akõre kʉ̃ria inii, mʉa ase ɓua joma ara ichia jaraɗa kĩra” (Juan 14:31). Ichi iujãaɗe nibasiiɗe, Jesusba unubisia ichia ichi Akõre ãrĩã kʉ̃ria ɓuu ichi beɗea ũrisiiba, bariara ichi baita ɓesesɗe chaarea ɓosmina. Maubapeɗa, Jesusba ãrĩãdu bustabachia ichi Akõre ʉ̃rʉbena beɗeayu mauɗe waabenarã aiɗayu chi maarã Dachi Akõre ome amiko kĩra duanaɗayua (Juan 14:23).
3. ¿Jesusba saka unubi ɓua ichia ẽbẽrarã chi kʉ̃ria?
Bibliaba jara ɓua Jesusba “ẽbẽrarã ãrĩãdu kʉ̃ria inia” (Proverbios 8:31). Ichia nomaa aka ɓeaɗa siɗa kĩrajʉʉbiaɗa baɗaa mauɗe aiɗakuasia ẽbẽrarã junebenaba waya deaɗayu kʉ̃risiawẽe, bari kʉ̃riaɗeeba. Jesusba milagro asesii ichi poder unubiyua mauɗe ichia unubisia ẽbẽra chuburiakuabarii (Marcos 1:40-42). Ichira ẽbẽra bia nibasia mauɗe jomaurã araɓau dauchia kʉ̃ria ua nibasii. Ichi beɗearãba waabenarãmaa biʼia sentibiabachia mauɗe ichia biʼia ãrĩã jarabachia ẽbẽrarã sõbia kirureerã ichi ũribudaurãmaa. Maubapeɗa, ichia ẽbẽrarã kʉ̃ria ɓuuɗeeba supripeɗa mauɗe biu ɓoosia jomaurã kakua, maka ɓumina ichia ãrĩãdu kʉ̃ria inia chi ũri kirureerã ichia jara ɓuuɗebena (Juan 15:13, 14 leas).
AUDE KAWABA
Biʼia ãrĩãdu kawaɗaika Jesús saka nibasii ʉ̃rʉbena maabea ochiaɗaika saka ichi kĩra ẽbẽrarã kʉ̃riaɗapeɗa mauɗe waabenarãmaa kosa deɗekaɗai baita dachi jua keɗee sua nureaɗai.
4. Jesusba ichi Akõre ãrĩã kʉ̃ria nia
Jesusba asesiiba jaradeɗekasii saka unubiɗai Dachi Akõremaa dachia ichi kʉ̃ria ɓuuɗebena. Lucas 6:12; Juan 15:10 mauɗe 17:26 leábaɗa. Textorã aɓaaɓaa leaɗakaɗe, nau ʉ̃rʉbena beɗeasturu:
-
Dachia Jesusɗebena kawabudauɗe, ¿saka unubiɗai ɓua Jeowamaa dachia ichi kʉ̃ria nuree?
Jesusba kʉ̃ria ɓoosia ichi Akõre bajãaɗebena mauɗe ʉtaa wiɗi ɓoobachia kapichia.
5. Jesús ãrĩãdu preokupabarii chi nesita keɗeerã kakua
Jesús ãrĩãdu preokupabachii waabenarã kakua ara ichi du aɓau kakua kʉ̃risiai baɗabaarã. Mauɗe bariara ichi kãsa aka ɓuu siɗa, ichi tiempo ãrĩãdu aubachii ichi asei baɗaɗeeɗa waabenarã aiɗayua. Marcos 6:30-44 leaɗapeɗa, mambea nau ʉ̃rʉbena beɗeasturu:
-
Chi nauba jara ɓuuɗeebara, ¿saka unubisaa Jesusba waabenarã kʉ̃riayua? (Versiculorã 31, 34, 41 mauɗe 42 ochiábaɗa).
-
¿Sakayua Jesusba aiɗakuasaa maarã ẽbẽrarã? (Versículo 34 ochiábaɗa).
-
Dachia ochiaruubara Jesusba chi Akõre ase nii kĩra ase ɓuu bẽrã, ¿kãare jaradeɗeka ɓua nau jomaurãba Jeowa ʉ̃rʉbena?
-
¿Saka dachirãba ãrĩãdu kʉ̃risiaɗai ɓua waabenarã ʉ̃rʉbena Jesusba ase ɓoosii kĩra?
6. Jesús jua keɗee sua ãrĩã nibasia ẽbẽrarãmaa deɗekai baita
Jesús jua keɗee sua ãrĩã nibasia ẽbẽrarãmaa deɗekai baita bariara kosarã ãrĩã wãʼãe nibasmina, mauɗéburu dachirã siɗa jãka nureaɗai ɓua. Hechos 20:35 leaɗapeɗa, mambea nau ʉ̃rʉbena beɗeasturu:
-
Jesusba jarasiiɗeebara, ¿kãareba dachi kĩrajʉʉ ãrĩã sentibi ɓua?
BIDEO ochiaɗapeɗa, mambea nau ʉ̃rʉbena beɗeasturu:
-
¿Saka dachirãba deaɗai ɓua waarãmaa bariara kosa ãrĩã wãʼãe duanumina?
¿Bichia kuitaa ɓoosee?
Chi Bibliaba jaradea ɓua dachirãba Jeowamaa ʉtaa wiɗiɗayu Jesús trʉ̃ɗe (Juan 16:23, 24 leábaɗa). Jãka dachia unubiɗayua ãrĩãdu kʉ̃ria panuu Jesusba aseɗa baɗa dachirã aiɗayua chi Jeowa ome amiko nureaɗai baita.
CHI NUREE ẼBẼRARÃBA NAKA JARABADAA: “Ẽbẽrarã supribadau Dachi Akõreba prueba dee bʉebariiɗeeba”.
-
Jesús chi Akõre kĩra ẽbẽra biʼia kiɗii bẽrã, ¿mauba saka unubi ɓua Jeowaba dachirã kʉ̃ria inii?
NAU KAWASIƊAA
Jesusba Jeowa ãrĩã kʉ̃ria nia mauɗe ẽbẽrarã siɗa. Jesús ichi Akõreka nii bẽrã, dachia waaburu Jesús ʉ̃rʉbena kawabudauɗe, aude biʼia kawaɗayua Jeowa ʉ̃rʉbena.
Waya berreaɗaika
-
Dachia kʉ̃risɗe ua duanuu bẽrã Jesusɗebena, ¿dachia saka unubiɗai ɓua Jeowa kʉ̃ria iniɗau?
-
Dachia kʉ̃risɗe ua duanuu bẽrã Jesusɗebena, ¿saka unubiɗai ɓua waabenarã ẽbẽrarã kʉ̃ria ira nuree?
-
¿Kãare aude bichimaa busta ɓua Jesús ʉ̃rʉbena?
NAU OCHIAS MAUCHABURU KAWAYUA
Kawas saka dachirã ẽbẽra biarã nureaɗai ɓuu Jesús kĩraka.
“Jesús kĩra nureaɗaika” (Jesús: el camino, la verdad y la vida, página 317)
Kawas sakayua biʼia ãrĩã ɓuu Jesús trʉ̃ɗe ʉtaa wiɗiɗayu.
“¿Sakayua dachia ʉtaa wiɗiɗayua Jesús trʉ̃ɗeburu?” (Chi Kartaba, 1 febreroɗe 2008ɗebena)
¿Bibliaba jara ɓue Jesús kĩadarr mauɗe kakua saka nibaɗa?
“¿Jesús kĩadarr mauɗe kakua saka nibaɗa?” (Artículo jw.org ɗebena)
¿Kãare kawa duanaa Jesusba saka ua nibasii wẽrarã?
“Dachi Akõreba respetapeɗa mauɗe chi kʉ̃ria ɓuu wẽrarã” (Chi Kartaba, 1 septiembreɗe 2012ɗebena)
