Jeowamaa jipa duanaɗaidu bustabaria (1 Corintios 14:33). Ichia bustabarii jipa ua koɓooyu ichi puuru. ¿Jeowaba Jesusɗeeba saka ua kuɓua chi konkrekasion? ¿Kãare aseɗai ɓua chi joma biʼia koɓooyua chi konkrekasionɗe?

1. ¿Kaiba jaradeɗeka ua kuɓuu chi konkrekasion cristianorãɗe?

“Cristo chibari konkrekasionɗebenabʉ” (Efesios 5:23). Jesusba ochia ua kuɓuu bajãaɗeeba chi puuru Jeowaɗe ase bara ɓuu joma nau iujãaɗe. Jesusba kuɓuɗa baɗa chi “esclavo jipa nibapeɗa biʼia kʉ̃risia ɓuu”: jãarã chi ara ɓaʼãra kuɓuu chi dawaraurã ãrĩã kuitaa nureerã, Chi Junta trʉ̃ jarabadau (Mateo 24:​45-47 leas). Ara jãka chi dawaraurã nureerã mauɗe chi apostolerã nabẽraeɗeeɗa Jerusalenɗe, Chi Juntaba ua kuɓuu konkrekasion joma nau iujãaɗe (Hechos 15:2). Cha naarã mukĩrarã chi liderwẽe konkrekasionɗebena. Ãchia kãare aseɗayu kuitaaɗayua, Jeowamaa ʉtaa wiɗiɗapeɗa maabea jʉrʉbadau chi Bibliaɗe, mauɗe ũribadau chi Jesusba jaraburuu.

2. ¿Chi dawaraurã kãare ase nurea?

Chi dawaraurã cristianorã, mau jãarã kuitaa ɓuuradu nureerã, jãarãba Bibliaɗebena jaradeɗekaɗapeɗa mauɗe chi konkrekasion kuida nuree maabea aiɗabadau kĩrajʉʉbiɗai baita. Jãarãba chi nejarra wiɗiɗakaa. Bari ãchirãba aiɗabadau “kʉ̃ria ãrĩãdu Dachi Akõre daaɗe”; mauɗe aseɗakau “chi nejarraɗeeba mauɗe biʼia ãrĩãdu koʼoaswẽa asebadau” (1 Pedro 5:​1, 2). Chi siervo ministerialnaba aiɗabadaa chi dawaraurã, mauɗe ãchia Bibliaɗe jara ɓuu kĩra asebudauɗe, ãchirã siɗa dawaraurã bakuaɗai ɓua.

Chi Juntaba jʉrʉbarii dawaraurã ãchirã superintendente circuitoɗebena baɗayua. Naarã mukĩrarã ochiaɗe wãbadaa konkrekasion ãrĩãrã mauɗe ãchia ãbarãmaa jaradeɗekaɗapeɗa kĩrajʉʉbibadau. Ãchia trʉ̃ jarabadau dawaraurã mauɗe siervo ministerialna, ãchia ase panuubʉrã Bibliaɗe jara ɓuuka (1 Timoteo 3:​1-10, 12; Tito 1:​5-9).

3. ¿Kãare aseɗaiba chi aɓaaɓaa Jeowa ɗebena Jaranũrẽrã?

Jomaurãba konkrekasionɗe biʼia ãrĩã jarabadaa “Jeowa trʉ̃ɗebena”. Chi reunionɗe jua ʉtʉ ʉaɗapeɗa beɗeabadaa, discursorã siɗa unubibadaa, karibadau mauɗe jaradeɗekabadau ãchi juaɗeeba (Salmo 148: 12, 13 leas).

 AUDE KAWABA

4. Jesús chi líder biʼia nii bẽrã, dachi biʼia sentibibarii

Jesusba kʉ̃ria ãrĩãdu dachimaa naka jarabaria. Mateo 11:28-30 leaɗapeɗa, mambea nau ʉ̃rʉbena beɗeasturu:

• ¿Saka nii chi líder Jesús? ¿Mauɗe Jesusba saka sentibi kʉ̃ria nii?

5. Dawaraurãba biʼia ãrĩãdu unubi nurea

1. Chi dawaraurãba Biblia leaɗapeɗa, ʉtaa wiɗibadau Jeowa kaita nureaɗayua maabea aiɗabadaa chi deɗabenarã siɗa ara jãka nureaɗayua.

2. Chi dawaraurã ãrĩã preokupa nuree jomaurã chi konkrekasionɗebenarãɗe.

3.   Chi dawaraurãba jaradeɗeka nuree ara kapichia.

4. Chi dawaraurãba jaradeɗekabadaa chi konkrekasionɗebenarãmaa. Mauɗe chi Jeowa ɗebena Jaranũrẽ De barreɗapeɗa mauɗe junebena trajo siɗa asebadaa.

6. Ũriɗaika chi dawaraurãba jarabudau

Chi Bibliaba jara ɓuu biʼia ãrĩã ɓuu ũriɗayu chi dawaraurãba jarabudau. Hebreos 13:17 leaɗapeɗa, mambea nau ʉ̃rʉbena beɗeasturu:

• ¿Sakayua jara ɓua chi Bibliaba ũriɗayu  chi dawaraurãba jarabudau? ¿Jãu bichimaa  biʼia ɓue? ¿Sakayua?

Lucas 16:10 leaɗapeɗa, mambea nau ʉ̃rʉbena beɗeasturu:

• ¿Sakayua biʼia ãrĩã ɓua ũriɗayu chi dawaraurãba jarabudau, bariara ɓiɗĩika ɓuu siɗa?

 NAU KAWASIƊAA

Jesusba jaradeɗeka ua kuɓuu chi konkrekasion cristianorãɗe. Chi dawaraurã ichia jaraburuuɗeburu kuɓua, dachirãba ũribadaa ãchirãba jarabudau, ãchirãba dachi kuidaɗapeɗa mauɗe kawabi kopanuuɗeeba maabea ãchia dachimaa biʼia unubi kopanuu.

Waya berreaɗaika

• ¿Kaiba jaradeɗeka ua kuɓua chi konkrekasion cristianorãɗe?

• ¿Saka aiɗabadaa chi dawaraurãba chi konkrekasionɗebenarã?

• ¿Kãare asebadaa aɓaaɓaa Jeowa ɗebena Jaranũrẽrãba?