Chi naa nibapeɗaaɗa baɗa ẽbẽrarã, Adán Eva omeeba, ũriɗaabasii Dachi Akõre. Jãuɗéburu dachi pekao aseɗapeɗa, supri duanapeɗa mauɗe biubari panua. a Maka ɓumina joma perdewẽa. Jeowaba chi Warr iujãaɗaa bʉiɗa baɗaa dachi kakua biubiyua, ara jãuburu dachi pekao baraa nibaɗaabapeɗa biuɗaabayua. Bibliaba jara ɓuu Jesús biusiiba, dachi aiɗa ɓua. Jesusba paasii ichi biʼia kĩra jipa nibaɗa biusiiba (Mateo 20:28 leas). Jesús kĩra jipa nibasiiɗeeba ũri nibasia Jeowa, jãuɗéburu ichi biuwẽa nibai baɗa nama iujãaɗe nibasiiɗe. Maka ɓumina, ichi nibai baɗa dachirã kakua deaɗa baɗaa mauɗe waya adauɗayua joma dachi perdepeɗaaɗa baɗa Adán mauɗe Evaɗeeba. Mauɗe ichia unubisii Jeowaba dachi kʉ̃ria ua nii mauɗe ara ichia biɗa. Cha nau lesionɗe kawaɗayua ara kiruma a jarabaraaɗai chi Jesús biuɗa baɗaɗeeba.

1. ¿Saka aiɗa ɓua jãabea chi Jesús biuɗa baɗaba?

Dachia pekao ira panuu bẽrã, miadaa ɓee ãrĩã ase nurea Jeowaba bustaka ɓuu. Maka ɓumina dachi amiko bia ãrĩã nureaɗayua Dachi Akõre ome, dachi biawãrabenaɗe arrepentibudaubʉrã dachi pekaoɗebena maabea wiɗiɗayua Jeowamaa, mauɗe Jesusɗeeba dachi perdonábaɗa aɗayua. Dachia berekaɗaibʉrã waya jãu miadaa ɓuuɗe ɓaeɗaamaaba (1 Juan 2:1). Bibliaba jara ɓuu: “Cristo ɓes aɓaburu biusia dachirã pekao kakua, aɓa kĩra jipa niiɗe kĩra jipaswẽe nuree kakua, machi wayaburu Dachi Akõre kaita duanayua” (1 Pedro 3:18).

2. ¿Saka aiɗa ɓubaama ɓoapeɗa Jesús biuɗa baɗaba?

Jeowaba bʉisii chi Warr Jesús ichi kĩra jipa nibaɗa deayua “ichiɗe [Jesusɗe] kerea ɓuu kiniimaaba, bari biuwẽa nibayua” (Juan 3:16). Ara jari Jesús asesiiba, Jeowaba akabayua joma chi miadaa ɓuu ɓuipeɗaaɗa baɗa Adán Eva omeeba ũriɗaabasiiɗeeba. Jãuɗéburu, dachirã fe bara duanuubʉrã Jesús biuɗaɗebena, biʼia nureaɗapeɗa biuɗawẽa nureaɗayua chi iujãa kĩrawãrea ɓeeruuɗe (Isaías 65:21-23).

 AUDE KAWABA

3. Jesús biusiiba dachi pekao baraa nibaɗaabapeɗa biuɗaabayua

1. Adán mukĩra kĩra jipa nibaɗaa mauɗe chi Dachi Akõre ũriibasiiɗeeba, dachi ẽbẽrarã pekao baraa nureapeɗa biuɗayuɗe duaneeɗaa.

2. Jesús mukĩra kĩra jipa nibaɗaa, ichia Dachi Akõre ũri nibasii bẽrã chi o ewaɗa basia jomaurã ẽbẽrarã kĩra jipa nureaɗapeɗa biuɗawẽa nureaɗai baita.

4. Chi Jesús biuɗaba ãrĩã aiɗai ɓua ẽbẽrarã nau iujãaɗebenarã

 5. Jesús biuɗa baɗa jãu rekalo Jeowaba dearuu kĩraka ɓua bichimaa

Dachirãba kʉ̃risia panuu Jesús biuɗa baɗa jãu rekalo deɗekaburuu kĩraka dachirã aɓaaɓaarãmaa. Nau ʉ̃rʉbena kawai baita, Gálatas 2:20 leaɗapeɗa, mambea nau ʉ̃rʉbena beɗeasturu:

• ¿Kãare jaraɗaba apóstol Pabloba chi Jesús biuɗaba rekalo kĩraka ɓoosii ichi baita?

Adán miadaa asesiiɗe, ichi mauɗe ichi warrarã baara biukuaɗayuɗe duaneeɗa baɗaa. Maka ɓumina Jeowaba ichi Warr iujãaɗaa bʉiɗa baɗaa ichi biuyua, jãuɗéburu bichi waaburu nibayua biuwẽa.

Cha naarã versiculorã leaburuuɗe, kauwa ochiaba Jeowa saka sentisii chi Warr biumaa ɓuu unusiiɗe. Juan 19:1-7 mauɗe 16-18 leaɗapeɗa, mambea nau ʉ̃rʉbena beɗeasturu:

• ¿Bichi saka sentibaraa kʉ̃risiaburuuɗe Jeowa mauɗe Jesús omeeba asesiɗau bichi kakua?

 NAU KAWASIƊAA

Jesús dachi kakua biuɗa bẽrã, Jeowaba dachi pekaorã perdona ɓua maabea waaburu nureaɗayua biuɗawẽa.

Waya berreaɗaika

• ¿Sakayua Jesús biusaa?

• ¿Sakayua Jesús ichi kĩra jipa nibasiiba ẽbẽrarã aiɗakuasaa?

• ¿Saka aiɗai ɓua bichi Jesús biuɗaba?