Ẽbẽra aɓa biubariburuuɗe dachi baita puʼua ãrĩã ɓoobaria mauɗe nomaa duaneebadaa. Mauɗeeba Bibliaba jara ɓuu dachia chi iadaa nuree biubibarii (1 Corintios 15:26). Lesion 27ɗe, bichia kawasia Jeowaba jãu akabayu ʉ̃rʉbena. ¿Maamina chi ẽbẽrarã kinipeɗaaɗa waya piradruɗabaaka? Nau lesionɗe, kawayua bichia Jeowaba asei aɗa baɗa ʉ̃rʉbena: jãuba ẽbẽrarã aribiadu waya chokaebiayua kĩrajʉʉ biuɗawẽa nureaɗayua. ¡Waya piradruɗayua! ¿Mau makabaaka? ¿Mauɗe jãarã piradruɗayue ʉtʉ bajãaɗe, maebʉrã iujãaɗe?

1. ¿Kãare ase kʉ̃ria ɓua Jeowaba chi kinipeɗaaɗarã ome?

Jeowaba waya chokae nureabi kʉ̃ria ɓua ẽbẽrarã kinipeɗaaɗarã baɗa. Job, ẽbẽra fe ãrĩãdu bara nibaɗa basia, ichia kauwa kuitaa ɓoosia Jeowaba ichi ara jãka ɓuebayu biuɗakare mauɗe ichi “Ʉa ɓeeɗakare”. Ichia Dachi Akõremaa naka asia: “Bichia iuburuuɗe mʉa panauyua” (Job 14:13-15 leas).

2. ¿Saka kuitaa panaa ẽbẽrarã biupeɗaaɗa waya chokae duanaɗai?

Jesús iujãaɗe nibasiiɗe Jeowaba poder deasia ichimaa ẽbẽrarã biupeɗaaɗa chokaebiayua. Mauba Jesusba kau cheke 12 año nii waya chokaebisia mauɗe pẽdrãa wau cheke siɗa (Marcos 5:41, 42; Lucas 7:​12-15). Mau kaaɗe ichi amiko Lázaro biusia. Kimare día pasa ɓoosia ichi biupeɗa ʉa ɓupeɗaaɗa baɗa, maamina Jesusba waya chokaebisia. Jeowamaa ʉtaa wiɗiɗakare, bari mechia ɓiaɗa basia chi Lázaro ʉa ɓuumare: “¡Lázaro, uche!”. Maabea “chi biu ɓooɗa baɗa awara urusia”, ¡maabea chokae ɓoosia! (Juan 11:43, 44). ¿Ãrĩã kĩrajʉʉ duanasee chi amikorã mauɗe Lázaro deɗabenarã baara?

3. ¿Waya chokae duaneeɗayue deɗabenarã kinipeɗaaɗa baɗa?

Bibliaba jara ɓuu chi kinipeɗaaɗa “waya piradrukuayua” (Hechos 24:15). Chi ẽbẽrarã Jesusba waya piradrubiaɗa baɗa ʉtʉ bajãaɗaa wãɗawẽa panasia (Juan 3:13). Jomaurã kĩrajʉʉ ãrĩã duanasia waya iujãaɗaa neesiɗau kakua. Ara jãma pasaɗa kĩra, Jesusba waya chokaebiaeɗe ua ɓua aribiaurã ẽbẽrarã ãchi waya kĩrajʉʉ duanaɗayua chi iujãa kĩrawãrea ãrĩã kiruu baburuuɗe. Ichia jarasii “joma ʉaɗe duanuu akordaɗayua” maebʉrã, joma Dachi Akõre kʉ̃risiaɗe duanuurã waya piradruɗayua, mauɗe ẽbẽrarã jari waarãba waya kʉ̃risiaɗakaurã siɗa (Juan 5:28, 29, nota).

 AUDE KAWABA

4. Jesusba unubisia ichia biupeɗaaɗa baɗa waya piradrubiayu

Mauchaburu unus kãare asesii Jesusba ichi amiko Lázaro kakua. Juan 11:14 mauɗe 38-44 leaɗapeɗa, mambea nau ʉ̃rʉbena beɗeasturu:

• ¿Saka kuitaa panua Lázaro biu ɓooɗa baɗa? (Versículo 39 ochiábaɗa).

• Lázaro ʉtʉ bajãaɗaa wãɗa basirã, ¿Jesusba ichi waya iujãaɗaa uneei basee?

BIDEO ochiábaɗa.

5. ¡Aribiaurã waya chokae duaneeɗayua!

Salmo 37:29 leaɗapeɗa, mambea nau ʉ̃rʉbena beɗeasturu:

• ¿Sama duaneeɗaiba ẽbẽrarã aribiadu piradrubudaurã?

Jesusba waya piradrubiaburuu chi Jeowa kʉ̃riaɗapeɗa ũri duanaɗa baɗa maabea waabenarã ẽbẽrarã siɗa waya chokaebiayua. Hechos 24:15 leaɗapeɗa, mambea nau ʉ̃rʉbena beɗeasturu:

• Ẽbẽrarã waya piradrubudauɗe, ¿kai unu kʉ̃ria ɓua bichia?

• ¿Saka biʼia sentibi ɓua Phelicity akõrerã biupeɗaaɗa baɗa waya piradrubudau ʉ̃rʉbena kawaaduuba?

 NAU KAWASIƊAA

Bibliaba jara ɓuu ẽbẽrarã aribiaurãdu waya piradruɗai. Jeowaba kʉ̃ria ɓua waya duanaɗayua mauɗeeba Jesusmaa poder dea ɓua waya piradrubiayua.

Waya berreaɗaika

• ¿Kãare ase kʉ̃ria ɓua Jeowa Jesús omeeba ẽbẽrarã chi biupeɗaaɗarã kakua?

• ¿Sama duanaɗaiba ẽbẽrarã aribiaurã waya piradrubudaurã: ʉtʉ bajãaɗe, maebʉrã iujãaɗe? ¿Sakayua jãka kʉ̃risia ɓua?

• ¿Kãareba bichia jãuɗe kerea ɓua bichi amikorã deɗabena baare waya chokae duanaɗai?