LESION 38
Ara kiruma aɗayubʉ dachi chokae nureeɗebena jãu kĩrawãrea ãrĩã ɓuu bẽrã
Dachi chokae nuree bẽrã mipitaa ãrĩã ɓuu. Bariara problema bara nuree adua, dachi chokae nureeɗeeba ãrĩã ase duanabaria dachi kĩrajʉʉ ãrĩã. ¿Saka ara kiruma aɗaiba Jeowamaa dachi chokae nureeɗeeba jãu kĩrawãrea ãrĩã ɓuu bẽrã? ¿Sakayua biʼia ãrĩã ɓua jãu aseeruu baita?
1. ¿Sakayua dachi chokae nuree jãu aude biʼia ɓua?
Dachi chokae nuree jãu biʼia ãrĩã ɓuu deabariiɗeeba Dachi Akõre kʉ̃ria ãrĩã nii, Jeowaba. Ichia “chokae nibabi ɓua”, joma cha barau waukaɗa baɗaɗeeba (Salmo 36:9). “Ara ichiaburu jomaurã ẽbẽrarãmaa chokaebipeɗa, ʉ̃yababi ɓua mauɗe joma dea nia” (Hechos 17:25, 28). Mauɗéburu, Jeowaba dachimaa deabarii dachia nesita panuu chokae nureaɗayua. Maka ɓumina jãuba aude ase nia, ichiaburu dachi kĩrajʉʉ nibabi ɓua (Hechos 14:17 leas).
2. ¿Saka unubi panua Jeowamaa ara kiruma abadau dachi chokae nureeɗeeba?
Bichi, nawe ɓiɗe eɗa ɓoosiiɗe, Jeowaba bichi ãrĩã kʉ̃riaɗa basia. Jeowa baita traja nii ichi trʉ̃ David baɗa, ichia naka ʉtaa wiɗisii Jeowamaa: “Bichi dauba unuɗa baɗa mʉ ʉ̃rãburu ɓitaɗe eɗa kiruu” (Salmo 139:16). Jeowaba ãrĩã bustabarii bichi chokae niiɗeeba (Mateo 10:29-31 leas). Ichimaa chi puʼua ãrĩã ɓoobaria aɓabenaba junebena beataburuu kakua, makawẽebʉrã ara ichi du aɓa biuburuuɗe (Éxodo 20:13). a Dachia kauwa ochiaɗawẽebʉrã dachi kakua mauɗe waabenarãɗe biɗa, Jeowa ãrĩã nomaa sentii ɓua. Dachi du aɓauba biʼia kuida ɓuubʉrã mauɗe waabenarã biɗa respeta niibʉrã, unubi panuu dachia respeta panuu dachi chokae nuree.
AUDE KAWABA
Kawaɗayua saka ara kiruma aɗayubʉ dachi chokae nureeɗebena jãu kĩrawãrea ãrĩã ɓuu bẽrã.
3. Bichi kakua ochia ua nibaba ẽpermawẽa nibai baita
Chi cristianorãba compromete panuu Jeowa ome ichi baita traja nibaɗayua ichia busta ɓuudu asebadau. Dachia Dachi Akõremaa ara dachi kakua jayoaswẽa deabadau, kĩrabara ichimaa ãnimara baa deabadau kĩra, mauɗéburu dachi kakua ochia ua nibayua. Romanos 12:1, 2 leaɗapeɗa, mambea nau ʉ̃rʉbena beɗeasturu:
-
¿Sakayua ara bichia ochia ua ɓooyua bichi kakua ẽpermo ɓeemaaba?
-
¿Saka aseiba mau?
4. Kauwa ochiaba bichi mauɗe waabenarã puʼua niimaaba
Bibliaba jara ɓuu dachi poyaa aseɗaabayu ne miadaa ɓee dachirã baita. BIDEO ochiaɗapeɗa, mambea kauwa kʉ̃risiábaɗa saka aseiba deeɗaa miadaa pasabiimaaba.
Proverbios 22:3 leaɗapeɗa, mambea beɗeasturu saka kauwa ochiaɗai chi miadaa pasaamaaba...
-
... bichi deɗe.
-
... bichi trajoɗe.
-
... jemenebudauɗe.
-
... carroɗe maebʉrã motoɗe wãburuuɗe.
5. Respetaba wãwa abiɗa nacewẽa ɓuu
David ichia mipitaa ãrĩã beɗeaɗa baɗa, chi wãwa nawe ɓiɗe eɗa ɓuuɗe. Salmo 139:13-17 leaɗapeɗa, mambea nau ʉ̃rʉbena beɗeasturu:
-
¿Kãare kʉ̃risiabaraa Jeowaba, wãwa ichi nawe ɓitaɗe eaburu ẽpesa koɓeeburuuɗe makawẽebʉrã awara neeɗakare?
Yataɗeeɗa chi leyrã israelitarãmaa Jeowaba deaɗa baɗaɗe jara ɓuu wẽrarã wãwa baraa niiɗe, ãchi ãrĩãdu ochia ua nibayu mauɗe chi wãwa ɓitaɗe eɗa ɓoaɗa siɗa. Éxodo 21:22, 23 leaɗapeɗa, mambea nau ʉ̃rʉbena beɗeasturu:
-
¿Kãare kʉ̃risiaɗa baɗa Jeowaba ẽbẽra aɓa niiba beatasirã kʉ̃riawẽe baɗa wãwa chi nawe ɓitaɗe eɗa ɓoaɗa?
-
Makarã, ¿kãare sentibarama aɓa nii ẽbẽraba wãwa ɓitaɗe ɓuu bea kʉ̃riaburuuɗe? b
-
Bichiara, ¿saka ai ɓua Dachi Akõreba kʉ̃risia ɓuuɗebena?
Wẽra ichi baita chokae nii biʼia ãrĩã ɓuuba kʉ̃risiai ɓuu wãwa awara neei naeɗe beayu jãdu asei ɓuuɗeeba. Isaías 41:10 leaɗapeɗa, mambea nau ʉ̃rʉbena beɗeasturu:
-
Chi ẽbẽra niiba wẽramaa wãwa beayu ɓuaɗe a jaraburuuɗe, ¿kaimaa aiɗayu wiɗiiba? ¿Sakayua?
CHI NUREE ẼBẼRARÃBA NAKA JARABADAA: “Wẽrarã aɓaaɓaarãba kʉ̃risiaɗayua chi wãwa awara neei naeɗe beayu ɓuu makawẽebʉrã beawẽe bai ɓuu. Ara ichiaburu jara nii ichi kakua ome kãare aseyu”.
-
¿Bichia sakayua ijãa ɓua Jeowaba chi kʉ̃ria ãrĩã nii wẽra wãwa baraa niiɗe mauɗe chi wãwa ɓitaɗe eɗa ɓuuɗe?
NAU KAWASIƊAA
Dachi chokae nuree jãu biʼia ãrĩã ɓuu Jeowaba deabariiɗeeba. Bibliaba jaradea ɓuu dachi chokae nuree, ochia ua nibayu, respetayu mauɗe kʉ̃riayu dachi kakua mauɗe junebenarãɗe siɗa.
Waya berreaɗaika
-
¿Sakayua kawa panua Jeowaba dachi chokae nuree kʉ̃ria ɓuu?
-
¿Saka sentibaraa Jeowa ẽbẽra nii ara ichidu aɓa biuburuuɗe makawẽebʉrã junebena ẽbẽra beataburuuɗe?
-
¿Kãaredu aude busta nia rekalo kĩra dachi chokae nureeɗebena?
NAU OCHIAS MAUCHABURU KAWAYUA
¿Saka ara kiruma aɗai ɓua Jeowamaa dachi chokae nureeɗeeba?
Dachi chokae nuree jãu kĩrawãrea ãrĩã ɓuu (canción 141) (2:41)
¿Dachi Akõreba perdonai ɓue naeɗeeɗa wẽra niiba ichi wãwa awara neei naeɗe beaɗa baɗa?
“¿Kãare jara ɓua chi Bibliaba wãwa awara neei naeɗe beaburuu ʉ̃rʉbena?” (Artículo jw.org ɗebena)
Kawaba kãare kʉ̃risiabarii Dachi Akõreba dachi chokae nureeɗebena, mauɗe sakayua ichichaa kʉ̃risiaɗai deporte aseɗe wãbudauɗe.
“¿Biʼia ɓubaaka chi deporte aseburuuɗe dachi biuɗai ɓua?” (¡Despertad!, 8 octubreɗe 2000ɗebena)
¿Chi ẽbẽra aɓa biu kʉ̃ria niibʉrã? Kawaba chi Bibliaba jaradea ɓuu nau ʉ̃rʉbena.
“¿Chi Bibliaba aiɗa ɓubaaka mʉ du aɓa biui kʉ̃ria ɓuuɗe?” (Artículo jw.org ɗebena)
a Jeowaba kauwa ochia ua kuɓua chi corazón nomaa nureerãɗeeba (Salmo 34:18). Ichia kawa nia dachi nomaa nuree dachi corazonɗe kʉ̃risiaduuɗe ara dachi du aɓa beabii kʉ̃risiabadaa, jãuɗéburu dachi ichia aiɗa kʉ̃ria ɓua. Kawase chi ichia jaradea ɓuu biʼia ãrĩã ɓuu chi articuloɗe “¿Chi Bibliaba aiɗa ɓubaaka mʉ du aɓa biui kʉ̃ria ɓuuɗe?”, leai ɓua “Nau ochias mauchaburu kawayua” nau lesionɗe.
b Chi ẽbẽra niiba wãwa awara neei naeɗe beaɗa baɗa nii Jeowa ʉ̃rʉbena kawai naeɗe, mau ichidu culpa baraa ɓooɗa baɗa apeɗa kʉ̃risiawẽe bayu; Jeowaba perdonai ɓua. Aribia leai ɓua nauɗebena chi articuloɗe “¿Kãare jara ɓua chi Bibliaba wãwa awara neei naeɗe beaburuu ʉ̃rʉbena?”, “Nau ochias mauchaburu kawayua” a ɓuuɗe nau lesionɗebenaɗe.
