LESION 41
Chi Bibliaba jara ɓuu mukĩra wẽra baara kãibadauɗebena
Ẽbẽra ãrĩãba perabadau jãka mukĩra wẽra baara kãibadauɗebena jaraɗayu. Madu, Bibliaba jãuɗebena beɗeaburuuɗe, respetayu iɗaa jarabarii mauɗe biʼia ãrĩã ũriɗayu baita. Chi Bibliaba nau ʉ̃rʉbena jaraburuuba ãrĩãdu aiɗa ɓua. Nau maka ɓuura chi Biblia Jeowaɗebena nee ɓuuɗeeba, ara ichiaburu dachirã waukaɗa bẽrã mauɗe ichia kuitaa kuɓuu kãare biʼia ɓuu dachirã baita. Ichia jara ɓuu kãare aseɗayu ichi kĩrajʉʉbiɗai baita mauɗe saka kĩrajʉʉ biuɗawẽa nureaɗayua.
1. ¿Saka kʉ̃risiabaraa Jeowaba wẽra mukĩra baara kãibadauɗebena?
Mukĩra wẽra baara kãibadauɗebena jãu rekaloka Jeowaba dachimaa deaɗa. Ichia kʉ̃ria ɓuura mukĩra wẽra baara kimabaraapeɗaaɗa niɗauburu maka kĩrajʉʉ aseɗai panua. Chi kimabaraapeɗaaɗa baɗa warrarã adauɗayua, maabea ara ãchi omeerã kʉ̃ria iɗaa ãbua kĩrajʉʉ duanaɗayua. Mauba Bibliaba jara ɓua: “Kĩrajʉʉbi ɓuu nibayua bichi wẽra kũudrãaɗeeɗa unuɗa baɗa ome” (Proverbios 5:18, 19). Jeowaba kʉ̃ria ɓuu chi kimabaraapeɗaaɗa niɗau aɓa kima omeburu nibai. Jãuɗéburu cristiano kimabaraa niibʉrã junebena ome kãibayua (Hebreos 13:4 leas).
2. ¿Kãareba mau ẽbẽrarã ãchi kakuaba kachirua aseburuu?
Bibliaba a ɓuu “ẽbẽrarã ãchi kakuaba kachirua ase nurea [...] Dachi Akõre Kobiernoɗe duanaɗaabayua” (1 Corintios 6:9, 10). Bibliaɗe ẽbẽrarã ãchi kakuaba kachirua aseburuu ʉ̃rʉbena ɓʉ panasiiɗe chi griego beɗea pornéia ɓʉsiɗau. Jãuba jara kʉ̃ria ɓuu (1) kimabaraa nureerãwẽe kãibadauɗebena, a (2) mukĩra nii araɓau mukĩra ome mauɗe wẽra nii araɓau wẽra ome kãibadau mauɗe (3) ẽbẽra nii ãnimara ome kãibadau. Maka miadaa ɓee aseɗawẽebʉrã, Jeowa kĩrajʉʉbibadaa mauɗe dachi siɗa kĩrajʉʉ nureabadaa (1 Tesalonicenses 4:3).
AUDE KAWABA
Kawayua bichia kãare asei ɓuu kachirua ãrĩã ɓuu bichi kakuaba aseemaaba mauɗe bichi jipa nibapeɗa jayoaswẽa niibʉrã makarã kãare ne bia adauyu.
3. Chi kakuaba kachirua ɓee aserã́ba
Mukĩra kĩra jipa nibaɗa chi trʉ̃ José ichi kakua ome kachirua aseka ɓuu nibaɗaa. Génesis 39:1-12 leaɗapeɗa, mambea nau ʉ̃rʉbena beɗeasturu:
-
¿Sakayua José pira wãɗa baɗaba? (Versículo 9 ochiábaɗa).
-
¿José biʼia ɓuu asesaka? ¿Sakayua jãka kʉ̃risia ɓua?
¿Saka chi kũudrãarã biʼia aseɗai ɓua José aseɗa kĩra maabea aseɗaabayua chi kachirua ɓuu ãchi kakua ome? BIDEO ochiábaɗa.
Jeowaba kʉ̃ria ɓuu jomaurã dachi kakua ome kachirua ɓee aseɗaamaaba. 1 Corintios 6:18 leaɗapeɗa, mambea nau ʉ̃rʉbena beɗeasturu:
-
¿Sakayua chi nuree ẽbẽra kachirua asebadaa ãchi kakua ome?
-
¿Kãare asei ɓua bichi kachirua aseemaaba bichi kakua ome?
4. Bichia miadaa ase kʉ̃ria kuɓuu siɗa, ne biaburu asei ɓua
¿Kãareba idaarabiwẽa ne kachirua ase kʉ̃ria kuɓuu ida ɓuiɗaabayua? BIDEO ochiaɗapeɗa, mambea nau ʉ̃rʉbena beɗeasturu:
-
¿Kãare asesaa chi ãba bideoɗebenaba kawasiiɗe ichia ne kachirua ɓee kʉ̃risiapeɗa aseburuuba mauba junebena wẽra ome kãi noɓooɗe wãbi ɓuu?
Chi cristianorã jipa nuree baita biɗa ãchi berekabaraaɗai ãchi kʉ̃risia jayoaswẽe nureaɗayua. ¿Kãare asei ɓua bichi chi kachirua ɓee kʉ̃risia koɓeemaaba? Filipenses 4:8 leaɗapeɗa, mambea nau ʉ̃rʉbena beɗeasturu:
-
¿Kãareɗe kʉ̃risiaɗai ɓua?
-
¿Bichia kʉ̃risia ɓue Biblia leapeɗa, ãrĩã trajaburuubʉrã Jeowa baita, chi kachirua ɓee aseebai ɓuu? ¿Sakayua?
5. Jeowaba jara ɓuu biʼia ɓua
Jeowaba kuitaa ɓuu kãare biʼia ɓuu dachirã baita. Mauba jara ɓuu saka dachi kʉ̃risiayu jayoaswẽa nibayua mauɗe kãarea mau biʼia ãrĩã ɓuu. Proverbios 7:7-27 leaɗapeɗa mauɗe BIDEO ochiábaɗa. Mambea nau ʉ̃rʉbena beɗeasturu:
-
¿Saka jãu kũudrãa nii kachirua ɓeeɗe ɓaesaa? (Proverbios 7:8, 9 ochiábaɗa).
-
Proverbios 7:23, 26 jara ɓuuɗe, dachi kakua ome kachirua aseburuuɗe biʼiawẽe wãbadau. Dachi kʉ̃risia biʼia niibʉrã, ¿kãare problemarã bara nibaɗaabaiba?
-
¿Dachi jipa nibapeɗa jayoaswẽa niibʉrã mauba saka dachi biuɗawẽa nureabi ɓua?
Chi ɓeeba kʉ̃risiabadaa ariɗe ɓuuwẽe chi Bibliaba jara ɓuu mukĩra nii aɓau mukĩra ome mauɗe wẽra nii aɓau wẽra ome kãi noɓeeyu ʉ̃rʉbena. Madu Jeowaba kʉ̃ria ãrĩã nii mauɗe ichia kʉ̃ria ɓuu jomaurã kĩrajʉʉ biuɗawẽa nureaɗayua. Mauɗe jãka duanaɗai baita, chi ichia jara ɓuu dachia asebaraaɗai. 1 Corintios 6:9-11 leaɗapeɗa, mambea nau ʉ̃rʉbena beɗeasturu:
-
Dachi Akõre kʉ̃risiamaarã, ¿mukĩra nii aɓau mukĩra baara mauɗe wẽra nii aɓau wẽra ome kãi noɓeei kʉ̃risiaburuu ara jãdu biʼiawẽe ɓue?
Dachi Akõre kĩrajʉʉbii kʉ̃ria duanuubʉrã, jomaurã kambiabaraaɗai. ¿Biʼia ɓue dachi ãrĩã berekayu ne miadaa ida ɓui baita? Salmo 19:8, 11 leaɗapeɗa, mambea nau ʉ̃rʉbena beɗeasturu:
-
¿Bichimaa biʼia ɓue Jeowaba jara ɓuu dachi kakua ome ase panuuɗebena? ¿Sakayua?
Jeowaba ãrĩãdu aiɗa ɓuu ẽbẽrarãba ichia jaraburuu aseɗayua, mauɗe bichi siɗa aiɗai ɓua.
CHI NUREE ẼBẼRARÃBA NAKA JARABADAA: “Ẽbẽrarã ãchi chiya ãrĩã kʉ̃ria niɗaubʉrã, ãbua kãi noɓooɗe wãɗai ɓua”.
-
¿Bichia kãare kʉ̃risia ɓua jãuɗebena?
NAU KAWASIƊAA
Mukĩra wẽra baara kãibadauɗebena jãu biʼia ɓuu Jeowaba deaɗa, ichia kʉ̃ria ɓuu jãuba kĩrajʉʉ nibaɗayu mukĩra wẽra ome kimabaraapeɗaaɗa niɗau.
Waya berreaɗaika
-
¿Kãare ne kachirua asebadaa ẽbẽrarãba ãchi kakua ome?
-
¿Kãareba aiɗai ɓua dachi kakua ome kachirua aseɗaamaaba?
-
¿Sakayua biʼia ɓua ũriyu Jeowaba jara ɓuu dachi kakua jipa nibapeɗa jayoaswẽa nibayu ʉ̃rʉbena?
NAU OCHIAS MAUCHABURU KAWAYUA
Kawaba sakayua kʉ̃ria ɓua Jeowaba mukĩra wẽra ome kimabaraayu ãbua niba kʉ̃ria panuubʉrã.
“¿Kãare jara ɓua Bibliaba ãbua nibaɗe wãɗayu kimabaraaɗawẽa niɗauɗebena?” (Artículo jw.org ɗebena)
Kawaba sakayua Bibliaba jarawẽe mukĩra nii aɓau mukĩra ome, wẽra nii aɓau wẽra ome kãi noɓeeyu ʉ̃rʉbena cha naarã ẽbẽrarã kĩramaaɗai baita.
Leas kãarea biʼia ɓua Bibliaba jara ɓuu mukĩra wẽra ome kãibadauɗebena.
¿Kãareba aiɗasaa mukĩra ichi aɓau mukĩra ome kãibachia jãu ida ɓuipeɗa mauɗe Dachi Akõre kĩrajʉʉbiyua? Leas “Mʉ biʼia adaupeɗaaɗa baɗaa”.
“Ãchi nibapeɗaaɗabaɗa kambiasia Bibliaɗeeba” (Chi Kartaba, 1 abrilɗe 2011ɗebena)
a Miadaa ɓee naarã siɗa: mukĩra kakuaɗeeba wẽra kakua bʉeyu (penetración), mukĩra kakua maebʉrã wẽra kakua iɗeeba sõyu (sexo oral), mukĩra kakuaɗeeba ãdaumaa bʉeyu (sexo anal), mauɗe mukĩra kakua maebʉrã wẽra kakua aɓabenaɗe wauyu (estimulación de los genitales de otra persona).
