LESION 50
Saka kĩrajʉʉ duanaɗai ɓua chi deɗabenarã baare (parte 2)
Chi warrarã rekalo kĩraka ɓua Jeowaɗe. Ichia kʉ̃ria ɓuu chi akõrerãba biʼia kuidaɗapeɗa adauyua jãu rekalo. Jãuɗéburu ariɗe jara ɓuu kãare aseɗayu. Mauɗe chi warrarãmaa biɗa jara ɓuu kãare aseɗai ɓuu chi deɗabenarã ome biʼia duanaɗayua.
1. ¿Kãare konsejo Jeowaba dea ɓua chi akõrerãmaa?
Jeowaba kʉ̃ria ɓuu chi akõre nawe omeeba ãrĩã kʉ̃riaɗayua chi warrarã maabea ara ãchi baareburu nureaɗayua. Maubapeɗa, kauwa ochia kʉ̃riayua ne kachirua pasabiimaaba mauɗe kawabiaɗayua Bibliaɗebena (Proverbios 1:8). Dachi Akõreba jara ɓua akõrerãmaa warrarã ʉ̃rʉbena: “Waaburu biʼia waribiásturu [...] Jeowaba jara ɓuu kĩrachaa” (Efesios 6:4 leas). Jeowaba ãrĩã bustabarii akõrerãba biʼia waribiaɗayua chi warrarã ichia kʉ̃ria ɓuu kĩra mauɗe junebena juaɗe ɓuiɗaabayua jãu aseɗayua.
2. ¿Kãare konsejo Jeowaba dea ɓua chi warrarãmaa?
Jeowaba naka jara ɓua chi warrarãmaa: “Machi akõrerã beɗea kauwa ũri nureábaɗa” (Colosenses 3:20 leas). Warrba respetapeɗa akõre kauwa ũri niibʉrã, biʼia kĩrajʉʉ nibabii chi akõrerã mauɗe Jeowa siɗa (Proverbios 23:22-25). Jesús warr cheke nibasiiɗe chi akõrerã kauwa ũri nibaɗa; ichi jipa nibasmina, chi akõrerã respetapeɗa kauwa ũri nibaɗaa, ãchi jipa nureaɗawẽe adua (Lucas 2:51, 52).
3. ¿Kãare aseɗai ɓua joma deɗabena Jeowa kaita duanaɗayua?
Warrarã bara niibʉrã, Jeowa kʉ̃ria nibabii kʉ̃ria ɓua jari bichia ichi kʉ̃ria nii kĩra. ¿Kãare asei ɓua? Ara jari chi Bibliaba jara ɓuu kĩra: “Machi warrarãmaa jaradeapeɗa [Jeowa beɗea ʉ̃rʉbena] mauɗe jãu ʉ̃rʉbena beɗea duanaɗai aka ɓeeburuuɗe bichi deɗe, mauɗe oɗe ãda kãriiɗe” (Deuteronomio 6:7). Jaradeaburuuɗe waaburu jara ɓeeburuu warrarãmaa ãchi boroɗe biʼia kawa paneeyua. Jãu textoba jaradea ɓuu chi diaɗe tiempo jʉrʉ nibai beɗeaɗai baita warrarãmaa Jeowa ʉ̃rʉbena. Maubapeɗa, biʼia ɓua deɗabenarã tiempo jʉrʉɗayua ãbua nureaɗayua Jeowa ũripeɗa kʉ̃riaɗayua Bibliaɗebena kawabudauba semanacha. Mauɗe, bariara warrarã wãʼãe nii adua, du aɓa kawa nibayua chi Beɗea Dachi Akõreɗe.
AUDE KAWABA
Kawaɗaika chi ɓee beɗea biʼia ɓee mauba aiɗa ɓua chi deɗabenarã dauchia nureapeɗa kĩrajʉʉ duanaɗayua.
4. Kawabiábaɗa machi warrarãmaa kʉ̃ria ãrĩã
Warrarãmaa kawabiayu chaarea ãrĩã ɓua. ¿Saka aiɗai ɓua chi Bibliaba? Santiago 1:19, 20 leaɗapeɗa, mambea nau ʉ̃rʉbena beɗeasturu:
-
¿Saka kʉ̃ria ãrĩã nureaɗai ɓua chi akõrerãba chi warrarã ome beɗeabudauɗe?
-
¿Sakayua chi akõre nawe baare kĩru kopanuuɗe poyaa iadaabai ɓua chi warra? a
5. Bichi warra kuida nibaba
Warra kuida nibai baita biʼia ãrĩã ɓua beɗeaɗayua aɓaaɓaa jãarã ome mukĩra wẽra baare kãibadauɗebena. Ɓesesɗe perabadau beɗeayu jãuɗebena. BIDEO ochiaɗapeɗa, mambea nau ʉ̃rʉbena beɗeasturu:
-
¿Sakayua chaarea ɓua chi nuree akõrerã baita beɗeayu chi warrarãmaa mukĩra wẽra ome kãiɗayuɗebena?
-
¿Kãare asebadaa chi nuree akõrerã beɗeaɗayua jãuɗebena chi warrarã ome?
Ara jãka jaraɗa kĩraka chi Bibliaba, chi nau iujãa ira ɓuu Satanasba audearaburu miadaabena koɓeesia. 2 Timoteo 3:1, 13 leaɗapeɗa, mambea nau ʉ̃rʉbena beɗeasturu:
-
Chi nuree ẽbẽra kachirua nureerã jari jara ɓuu versículo 13ɗe warrarã embiolabadau. Makarã, ¿sakayua biʼia ãrĩã ɓua chi akõrerãba kawabiɗayua warrarãmaa chi mukĩra wẽra baare kãibadauɗebena? ¿Mauɗe kãare asei ɓua kuidayua embiolabiimaaba?
¿Bichia kuitaa ɓoosee?
Jeowa ɗebena Jaranũrẽba libro bideorã baare ãrĩã waubadaa chi akõrerãba kawabiaɗayua warrarãmaa chi mukĩra wẽra baare kãibadauɗebena, kuida nibaɗayua embiolabiimaaba. Naarã kĩrachaa:
-
“Saka beɗea nibayu chi warra ome mukĩra wẽra baare kãibadauɗebena” (¡Despertad!, 2016ɗebena chi 5)
6. Respeta niiba bichi akõrerã
Chi warrarã mauɗe chi kũudrãarãba chi akõrerã respetabaraaɗai, maka nureaɗayua akõrerã ome beɗeabudauɗe, atua poyaa jaraɗaabai ãchimaa. BIDEO ochiaɗapeɗa, mambea nau ʉ̃rʉbena beɗeasturu:
-
¿Sakayua biʼia ɓua kũudrãa nii respeto iɗaa beɗeayu akõrerãmaa?
-
¿Saka tratayu respeto iɗaa chi akõrerã?
Proverbios 1:8 leaɗapeɗa, mambea nau ʉ̃rʉbena beɗeasturu:
-
¿Kãare aseyuba chi kũudrãa chi akõre nawe omeeba jarabudau kãare aseyu?
7. Ũriɗapeɗa kʉ̃riaɗayua Jeowa deɗabenarã omeeba
Jeowa ɗebena Jaranũrẽba tiempo jʉrʉbadau semanacha ũriɗapeɗa kʉ̃riaɗayua Jeowa ãchi deɗabenarã omeeba. ¿Saka ãbua chibʉrʉbadaa deɗabenarã Jeowa ʉ̃rʉbena kawaɗayua? BIDEO ochiaɗapeɗa, mambea nau ʉ̃rʉbena beɗeasturu:
-
¿Kãare aseɗaiba deɗabenarã baare Jeowa ʉ̃rʉbena kawaɗayua semanacha?
-
¿Kãare aseɗai ɓua chi akõrerã chi deɗabenarã baare Jeowa ʉ̃rʉbena kawaɗai joma kĩrajʉʉ duanaɗayua? (Ochiáse foto naa kuɓuu).
-
Bichi baita, ¿kãare chaarea ɓua kawaɗayua deɗabenarã ome chi Bibliaɗebena? Nebʉrʉse.
Yataɗeeɗa, Jeowaba kʉ̃ria ɓoosii chi deɗabenarã Israelɗebena beɗeaɗayua kapichia Bibliaɗebena. Deuteronomio 6:6, 7 leaɗapeɗa, mambea nau ʉ̃rʉbena beɗeasturu:
-
¿Ara jãu kĩraka saka asei ɓua bichia?
Kãare aseɗai ɓua chi deɗabenarã baare Jeowa ʉ̃rʉbena kawabudauɗe:
-
Reunión konkrekasionɗebenaɗaa wãi naeɗe kawábaɗa.
-
Leaɗapeɗa beɗeábaɗa Bibliaba chi bia nebʉrʉ ɓuu ʉ̃rʉbena ãrĩã bustabadau deɗabenamaa.
-
Warrarã ɓiɗĩika ɓee iniibʉrã, deskarkapeɗa imprimiba tarea warrarã baita jw.org ɗebena.
-
Warrarã kũudrãa chekerã iniibʉrã, jʉrʉba artículo kũudrãarã baita jw.org ɗebena.
-
Bibliaba nebʉrʉ ɓuu leaɗapeɗa maabea asébaɗa ara jãu kĩra.
-
Ochiaɗapeɗa beɗeábaɗa bideoɗebena jw.org ɗe.
CHI NUREE ẼBẼRARÃBA NAKA JARABADAA: “Bariwẽe ãrĩã kuɓua trajoɗeeba, mauba tiempo deakaa kawabiyua chi warrarãmaa chi Bibliaɗebena”.
-
¿Kãare kʉ̃risia ɓua bichia?
NAU KAWASIƊAA
Jeowaba kʉ̃ria ɓuu chi akõrerãba kʉ̃riaɗayua chi warrarã, kawabiaɗapeɗa kuidaɗayua; chi warrarãba respetaɗapeɗa kauwa ũriɗayu chi akõrerã, maabea joma deɗabenarãba Jeowa ũriɗapeɗa kʉ̃riaɗayua.
Waya berreaɗaika
-
¿Saka chi akõrerãba kawabiɗapeɗa kuidaɗayu chi warrarã?
-
¿Saka chi warrarãba respetaɗaiba chi akõrerã?
-
¿Sakayua biʼia ɓua tiempo jʉrʉyu semanacha ũriɗapeɗa kʉ̃riaɗayua Jeowa deɗabenarã baare?
NAU OCHIAS MAUCHABURU KAWAYUA
¿Kãareba aiɗai ɓua bichi warr biʼia wariyua?
“6 beɗea biʼia ãrĩã ɓea bichi warrarã baita” (¡Despertad!, 2019ɗebena chi 2)
Leaba beɗea biʼia ɓeeɗebena chõrarã kuida nureerã baita.
“¿Dachi Akõreba kʉ̃ria ɓue akõrerã kuidayu chõrarã baaruuɗe?” (Artículo jw.org ɗebena)
Ochiaba saka mukĩra niiba adua nibaɗa kuidayu chi warrarã, mau akõre biaɗe baɗa Jeowaba kawabiasia saka waribiayu chi warrarã.
Jeowaba daimaa jaradeɗekasii saka dai warrarãmaa kawabiaɗayu (5:58)
Kawaba saka akõre biʼia ãrĩã ãbua ua nibayu warrarã baare.
“¿Kãare aseiba chi akõre warrarã kaitawẽe nibaamaaba?” (Chi Kartaba, 1 noviembreɗe 2011ɗebena)
a Bibliaba jaraaruuɗe jipa nibabiyua, jara kʉ̃ria ɓua biʼia kawabiyua, miadaa ɓuu asebiimaaba. Bibliaba jarawẽa warr puʼua waupeɗa mauɗe kachirua jaraabayu (Proverbios 4:1).
