Jeowaba dachi waukasiiɗe, dachimaa rekalo mipitaa ɓuu deaɗaa: beɗeayu baita. ¿Ichi baita biʼia ɓubaaka biʼia beɗeaɗayu? ¡Maarã maka ɓua! (Santiago 1:26 leas). Makarã, ¿saka beɗeaɗaiba Jeowaba busta ɓuu kĩra?

1. ¿Saka biʼia beɗeaɗai ɓua?

Bibliaba naka jara ɓua: “Chiya kĩrajʉ́sturu. Mauɗe chiya aiɗásturu biʼia ijãaɗai baita” (1 Tesalonicenses 5:11). ¿Unubarika bichia aɓa ãrĩã aburri aka ɓuu? ¿Kãare asei ɓubaama ichi biʼia sentibiyua? Jaras jãu ẽbẽramaa ichi kʉ̃ria ãrĩã inii. Jarai ɓuubʉrã ichi biʼia nii unu ɓuuɗebena. ¿Kʉ̃risiabarika texto Bibliaɗebenaba biʼia ãrĩã sentibii baita chi ẽbẽra bichia unubarii? Ãrĩãdu baraa dachia jʉrʉi baita. Maubapeɗa, kʉ̃risiáse kãare jarayu mauɗe saka jarayu mau junebenarãba ãyaa kʉ̃risiabiimaaba. Beɗearuuɗe, kĩruwẽa mauɗe mipitaa beɗeachãu (Proverbios 15:1).

2. ¿Saka beɗeaɗaabayu?

Bibliaba naka jara ɓua: “Bichi iɗebena miadaa beɗearã́se” (Efesios 4:29 leas). Jãuba jara kʉ̃ria ɓuu poyaa beɗeaɗaabayu beɗea miadaa ɓee mauɗe waabenarãmaa poyaa atua jaraabayua biʼiawẽe sentibiimaaba. Maubapeɗa, dachi poyaa arabena ʉ̃rʉbena setaa berrea panaabai (Proverbios 16:28 leas).

3. ¿Saka beɗeaɗai ɓua chi biʼia ɓuudu?

Beɗeabudauɗe, unubibadaa dachia kʉ̃risiabarii chi senti kuɓuu baara (Lucas 6:45). Bereka kʉ̃risiaɗayu beɗeaɗai baita joma biʼia ɓuudu, joma jipa ɓuuɗebena, joma chi kachiruaswẽe ɓuu ʉ̃rʉbena, ne joma dachia biʼia jarabadau ʉ̃rʉbena mauɗe jomaurãba kʉ̃riabadau ʉ̃rʉbena (Filipenses 4:8). Jãka aseyua, biʼia jʉrʉbaraaɗai kãare ochiaɗayu televisionɗe maka maebʉrã, celularɗe mauɗe amikorã biadu jʉrʉbaraaɗai (Proverbios 13:20). Maubapeɗa, biʼia kʉ̃risiaɗayua beɗeaɗai naeɗe. Kauwa kʉ̃risiaba junebenarã saka kʉ̃risiabadau bichia jaraburuuɗe. Bibliaba naka jara ɓua: “Chi beɗea kʉ̃risiawẽa beɗeaburuuba, jãuba nekoba tõoruu kĩraka senti ɓua, maka ɓumina chi kẽreme kuitaa ɓuuɗebenaba anibibaria tõo kuɓuu” (Proverbios 12:18).

 AUDE KAWABA

4. Kauwa kʉ̃risiaba beɗeaburuuɗe

Jomaurãba ɓesesɗe jarabadaa chi jaraɗaabai baɗa (Santiago 3:2). Gálatas 5:​22, 23 leaɗapeɗa, mambea nau ʉ̃rʉbena beɗeasturu:

• Biʼia kʉ̃risiayua kãare jaraburuu mauɗe saka jaraaruuɗebena, jari chi versiculoɗebena, ¿kãare wiɗiɗai ɓuu Jeowamaa ẽbẽra bia nibayua? ¿Saka wãiba jãka aseburuubʉrã?

1 Corintios 15:33 leaɗapeɗa, mambea nau ʉ̃rʉbena beɗeasturu:

• Bichi amikorã, televisionɗe unupeɗa mauɗe celularɗe unubarii, ¿jãuba ãyaa beɗeabi ɓue? ¿Saka beɗeabi ɓua?

Eclesiastés 3:​1, 7 leaɗapeɗa, mambea nau ʉ̃rʉbena beɗeasturu:

• ¿Kãare momentoɗe biʼia ɓubaama chũpea aka ɓooi baita maebʉrã esperai baita biʼia jarayua?

 5. Biʼia jara nibayua waabenarã ʉ̃rʉbena

6. Chi deɗabena ome mipitaa beɗeaba

 NAU KAWASIƊAA

Dachia jaraburuuba biʼia o maebʉrã biʼiawẽe sentibiyua waabenarã. Mauɗeeba kauwa kʉ̃risiabaraaɗai kãareɗebena beɗeabudau, sakaeɗe beɗeaɗayu mauɗe saka beɗeayu.

Waya berreaɗaika

• ¿Saka beɗeayuba junebenarã aiɗaɗayua?

• ¿Saka poyaa beɗeaɗaabayua?

• ¿Kãareba aiɗai ɓua biʼia ãrĩã kʉ̃risiayua mauɗe mipitaa beɗeayu?