Jomaurãmaa bustabadau diwara paru jʉ̃ɗapeɗa buɗa iruɗayu. Jãkaburu waarãmaa unubi panua dachia busta ɓuuɗe. Maabea Jeowa kĩrajʉʉbiɗai ɓuu Bibliaba biʼia jara ɓuu ase panuurã. Kawaɗaika jãuɗebena.

1. ¿Kãare jara ɓua Bibliaba chi paru biʼia jʉ̃peɗa mauɗe buɗa biʼia iruyu?

Chi cristianoba jʉrʉbaraai “paru ariɗe ɓuu, biʼia unubiɗayua, kauwa kʉ̃risiapeɗa”. Maubapeɗa, jayoaswẽa unubibaraai mauba “Dachi Akõre respeta ɓuu” unubiyua (1 Timoteo 2:​9, 10). Kauwa ochiaba nau textoɗe kimare biʼia ɓeeɗebena jara ɓuu. (1) Dachia paru “ariɗe ɓuu” jʉ̃baraaɗai. Jeowa puuruɗebenarãba didiwaraa jʉ̃ kʉ̃ria nuree, bʉa reunión konkrekasionɗebenaɗe ochiabarii kĩra, maka ɓumina, dachia paru jʉ̃ɗapeɗa buɗa iruburuuba unubibaraai dachia Jeowa respeta nuree. (2) “Biʼia unubiɗayua” dachia jʉ̃ɗaabai paru dachi kakua unubi ɓuu, mauɗe ara dachidu ochiabiyua. (3) “Kauwa kʉ̃risiapeɗa” jʉ̃ɗaabayu chi paru junebe ãyaa nee bara ɓuurãɗebena. (4) Dachia paru jʉ̃ɗapeɗa buɗa irubudauɗe unubiɗayua “Dachi Akõre respeta nii”, makaburu dachia waabenarãmaa unubiɗai panuu Dachi Akõre biawãra nii ũriɗapeɗa kʉ̃riabadau (1 Corintios 10:31).

2. ¿Kãare kʉ̃risiaɗai ɓua waarã cristianorãba dachia paru jʉ̃ɗapeɗa buɗa irubudauɗe?

Dachia jʉrʉɗai panuu paru jʉ̃ɗapeɗa buɗa iruɗai baita. Maka ɓumina, biʼia jʉrʉbaraaɗai waabenarãmaa ãyaa kʉ̃risiabiɗaamaaba. Dachia nau konsejo ũribadaa: “Dachia aseɗayua aɓauba ase kʉ̃ria ɓuudu, chi mau biʼia ɓeebiɗapeɗa aude kereabiɗayua” (Romanos 15:​1, 2 leas).

3. ¿Saka dachia paru jʉ̃ɗapeɗa buɗa irubudauba waabenarãmaa Jeowa ʉ̃rʉbena kawa kʉ̃riabiɗai ɓua?

Dachia paru ariɗe ɓuudu jʉ̃badau barikiauɗaa wãbudauɗe. Maamina, reunionɗaa wãɗapeɗa jaradeɗakaɗe wãbudauɗe, chi paru biʼia ochiaɗapeɗa jʉ̃badaa. Dachia chi paru biʼiawẽe jʉ̃ɗapeɗa mauɗe miadaa irubuɗarã, ẽbẽrarãba atua berreaɗai panuu dachia jaradea niɗau ʉ̃rʉbena. Bari, ãchia dachimaa ochiabudauɗe kawaɗa kʉ̃riaɗayua biawãraɗebena, mauɗe ãchia biʼia jaraɗayua “Chi Karibabariiba jaradeabariiɗebena” (Tito 2:10).

 AUDE KAWABA

4. Dachia paru biʼia jʉ̃ɗapeɗa buɗa biʼia irubudaubʉrã, Jeowamaa respeto unubibadaa

¿Sakayuaburu dachirã baita biʼia ãrĩã ɓua chi paru biʼia jʉ̃ɗapeɗa mauɗe buɗa biʼia iruɗayu? Salmo 47:2 leaɗapeɗa, mambea nau ʉ̃rʉbena beɗeasturu:

• Dachia Jeowa ʉ̃rʉbena jaradeɗekabadau bẽrã, ¿kãare kʉ̃risiaɗaiba paru jʉ̃ɗai naeɗe?

• ¿Biʼia ɓubaaka naa ochiaɗayua saka paru jʉ̃ɗapeɗa buɗa irubudau reunionɗaa wãɗai naeɗe, makawẽebʉrã jaradeɗakaɗe wãɗai baita? ¿Sakayua maka kʉ̃risia ɓuma?

 5. Dachia saka jʉrʉɗai ɓua chi paru jʉ̃budau mauɗe buɗa irubudau siɗa

BIDEO ochiábaɗa.

Bariara chi paru ãrĩã baleɗa baɗa ɓuu, maebʉrã ɓaʼãraburu, chi biʼia ãrĩã ɓuura, chi jãu paru biʼia kerai baita jayoaswẽa mauɗe biʼia ɓooyu chi dachi wãburuumaabena. 1 Corintios 10:24 mauɗe 1 Timoteo 2:9, 10 leábaɗa. Mambea machi chiya beɗeasturu sakayua jʉ̃ɗaabai panuu paru...

• ... biʼiawẽe ɓee maebʉrã chi paru kõa ɓee.

• ... pĩsua ɓee, dachi kakua unubi ɓuu, waabenarãmaa ãyaa kʉ̃risiabi ɓuu.

Iɗibea chi cristianorãba aseɗakau chi Ley Moisesmaa deaɗa baɗaɗe jara kuɓuu, maka ɓumina, jãu leyba kawabi ɓuu Jeowaba kʉ̃risiabarii ʉ̃rʉbena. Deuteronomio 22:5 leaɗapeɗa, mambea nau ʉ̃rʉbena beɗeasturu:

• ¿Sakayua mukĩrarãba jʉ̃ɗapeɗa buɗa irubudauɗe wẽra kĩraka noɓeebayua, mauɗe sakayua wẽrarã siɗa araɓau aseɗaabai ɓua?

1 Corintios 10:32, 33 mauɗe 1 Juan 2:15, 16 leaɗapeɗa, mambea nau ʉ̃rʉbena beɗeasturu:

• Chi paru mauɗe chi buɗa iruburuuɗeeɗa waabenarãmaa biʼiwẽe ɓuu unubibudaubʉrã dachi ɓoobariimaabena maebʉrã konkrekasionɗebenarãmaa, ¿kãare aseɗayuba? ¿Sakayua?

• ¿Bichi ɓoobariimaa ẽbẽrarãba sãu paru jʉ̃ɗapeɗa mauɗe saka buɗa irubadaa?

• ¿Kʉ̃risia ɓuka chi ɓee paru chi buɗa iruburuu biʼiawẽe ɓuu cristiano baita? ¿Sakayua maka kʉ̃risia ɓuma?

 NAU KAWASIƊAA

Dachia biʼia jʉrʉbudauɗe dachi paru dachi buɗa iruyuɗeeɗa, unubi panuu dachirãba Jeowa respeta nuree mauɗe junebenarã siɗa.

Waya berreaɗaika

• ¿Sakayua Jeowaba kʉ̃riakaa dachia paru barikia jʉ̃ɗapeɗa buɗa barikia iruɗayu?

• ¿Kãare textorã Bibliaɗebenaba kʉ̃risiabiɗai ɓua dachi biʼia jʉ̃ɗapeɗa buɗa siɗa biʼia iru kawayu?

• ¿Kãare kʉ̃risiaɗai ɓua Jeowa ʉ̃rʉbena junebenarãba dachia paru jʉ̃ɗapeɗa buɗa irubudauɗe? ¿Saka?