Ichia jarasia: “Puuru choroma aɓabena puuru choroma ome chĩoɗai mauɗe kobierno ãchi chiya chĩoduanaɗai. Ioro urikoɓeeburuuɗe kuapetakuaburuu eɗawawarea, jarbisia duanaɗapeɗa ẽpermaduanaɗai” (Lucas 21:10, 11). Iɗibea nau joma unumaapanuma. Jãuba unubiɓuu chi Dachi Akõre Kobierno ara kaita kãrii. ¿Dachia nau unumaaduanue? ¿Nau unumaaduanue joma iujãaɗe? ¿Cha joma pasamaaɓuuba kãare kʉ̃risiabiɓua?

1. ÃCHI CHIYA CHĨOPANUU

1914 añoɗaiɗebena waa iɗiɗaa mechibena chĩosiɗaa ãchi chiya jãka chĩopanuu unuɗakabasia. Chi istoria nebʉrʉbadaurãba jarapanuu jãu año importante ãrea ɓoosii, chi nau añoɗeburu ãreadu chĩopeɗaaɗa ẽbẽrarã ãrea supribiaɗayua neeɗa bẽrã. Mamaburu unuɗakaɓuubaɗa karrotanke abudau, mau kaitawẽba bataburuuɗe ʉtʉ jĩaburuu wãbasbiɗa aɓa chi puuru ãritayua, pãwã batabadau, kas beneno iɗaa nii, jãka ɓee ẽbẽrarã beai baita. Mau kaaɗe chi Segunda Guerra Mundialɗe, bomba atomika abadau imisiɗaa. 1914ɗeeɗa, jomaurã ẽbẽrarãba unupanua saka eɗawawarea chĩobikaanuɓuuɗeeba ẽbẽrarã kenapanuu.

2. IORO URIRUUBA JOMA KUAPETAI

Britannica Academic jãu libroɗe jaraɓuuɗe, chi ioro uripeɗa kuapetakuabarii añoɗe 100 beses neebarii. Mauɗe, chi Servicio Geológico Estados Unidosɗebenaba jaraɓuu: “Kawa ochiaruubara 1900ɗeeɗabena chi rekistro, añocha 16 ioro uripeɗa kuapetakuabarii esperaduanuu”. Chi nureeba ioro uripeɗa kuapetabarii wãʼãebayueka abadama, bari ariɗe isa unupanuu. Maamina, naka ɓee ãrea supribipeɗa kenaɓuu naeɗe unukabasia.

 3. CHIKO PALTAƁUA

Chiko paltaɓua ãrea chĩopanuuɗeeba, puuru michiaurãɗe chi nejarra baraaɓooɗa kʉ̃riskauwẽa bikãa eɗa wãɓuuɗeeba, kobiernorãba chi nejarra orroapanuuɗeeba, chi iujãa ariɗe uuɗawẽba animararã siɗa biʼia ochiaɗawẽba, pisia ãrea jẽradruruuba chi ne uupeɗaaɗabaɗa, makawẽbʉrã kuecheɗabaɗaba ãreadu kenaɓuu, mauɗe animararã siɗa jãuba ida waa kiriabiawẽ. Chi Programa Mundial de Alimentosba jaraɓuu: “Nau iujãaɗe, 821 miyon ẽbẽrarãba jarba supriduanuu, mauɗe, naarãɗebena 124 miyon ẽbẽrarãba biuɗaiɗe duanuu” (2018 Year in Review). Añocha, 3,1 miyon wawarãba jarbaba kiniduanuu. Chi año 2011ɗe, nau iujãaɗe 45% wawarãba kiniduanuu jarbaɗeeba.

4. ẼPERMADUANUU MAUƊE EPIDEMIA ƁEE

Chi Organización Mundial de la Saludba jaraɓuu: “Nau siklo 21ɗe epidemiarã ãrea unuduanuu. Chi ẽpermaduanuu naeɗe unupeɗaaɗabaɗa el cólera, la peste mauɗe la fiebre amarilla, waya imimaaduanua, mauɗe ẽpermaɗai june unupanuu el síndrome respiratorio agudo grave, la gripe pandémica, el síndrome respiratorio de Oriente Medio, el ébola mauɗe el zika”. Chi pandemia covid 19 kaaɗebenabʉ. Dotorna sientipikorã baare waa kawaɗapeɗa nejoma unupanuumina, chi ʉrmidia anibiɗai baita unuɗawẽa.

5. JOMA IUJÃAƊE BIBLIAƊEBENA JARADEƊEKAMAAPANUU

Jesusba nau siɗa pasai jaraɗaa: “Chi beɗea kĩrawãreaɓee Dachi Akõre Kobierno ʉ̃rʉbena kawabiɗaiɗebena ẽbẽrarã jomaurãmaa unubiɗayua, mambeaburu chi kachirua barau akabayua” (Mateo 24:14). Problemarã ãrea baraamina nama iujãaɗe, 8 miyon ẽbẽrarã wañaa joma iujãaɗe jaradeɗekamaapanua chi beɗea kĩrawãreaɓee Dachi Akõre Kobiernoɗebena 240 puuru choromarãɗe mauɗe druarãɗe, mauɗe mil beɗearã waa. Naeɗe naka unukabasia.

Jesusba jaraɗabaɗa pasaiɗebena joma unumaapanua. ¿Sakayua importanteɓua jãu dachirã baita? Akordaɗai Jesusba jaraɗabaɗa: “Machia nau unukopaneebudauɗe, kuitaabaɗa Dachi Akõre Kobierno ara kaita kãri” (Lucas 21:31).

Chi Dachi Akõre Kobierno 1914ɗe a kobernakoɓeesia. Nau kuitaapanuu Jesusba jaraɗaɗeeba mauɗe Bibliaɗe jaraɓuu bẽrã. Jãu añoɗe ichi Warr, Jesucristo rei babisia (Salmo 2:2, 4, 6-9). Dachi Akõre Kobiernoba iujãa kobernaiɗaa iraɓuu, nama iujãaɗebena kobiernorã ome akabayua mauɗe iujãa aude kĩrawãreakiruuɗe kuɓupeɗa dachi aria kiniɗawẽa nureaɗai.

Jesusba dachimaa kawabiaɗabaɗa padrenuestro, mau kumpliɗaa iraɓuu: “Neebis bichi Kobierno. Bichia kʉ̃riaɓuu ara jãka ʉtʉ bajãaɗebena kĩra nama iujãaɗe asebiiba” (Mateo 6:10). Maamina, ¿kãare asemaaɓua chi Kobiernoba 1914ɗeeɗabena? ¿Mauɗe kãare aseiba joma ẽbẽrarã kobernakoɓeeruuɗe?