Abionɗe ẽbẽrarã ome nibabadaa aɓa keraba aiɗayua ãchi wãbudaucha. Ara jãka panabaria kimarã siɗa, ambua trajapanabaria bariara problemarã barausiɗa. Chi kimarãba ãchi du aɓauɗera kʉ̃risiaɗaabayua, naarã ãchirã omerãɗeburu kʉ̃risiaduanaɗai.

BIBLIABA NAKA JARAƁUA: “Jambera omewẽ, aɓaburu paneesia” (Mateo 19:6).

“Kimarã ambua aiɗabaraaɗai biʼia wãɗayua” (Christopher).

Chi kimarã ãchi chiya aiɗaɗawẽbʉrã, problema barauɗe ãchi omerã ãrĩãdu peleaɗayua, mauɗe bariara chi problema biɗĩka ɓuumina mau siɗa ãrĩãdu waribiɗayua.

“Mʉ kima omerã ambua jua deaɗawẽa panaɗabasirã, dai deeɗa kĩrabara ome aĩbena bibiniɗauka panaɗai basia, mauɗe problemarã siɗa ãrĩãdu irapanai basia. Daiba jãka ɓee akupaneepeɗa ochiaɗaabaɗa basirã” (Alexandra).

KAWA KɄ̃RISIASE

• ¿Bichia chi nejarra panabarii jãu bichiɗedu kʉ̃risiabaree o maebʉrã ara bichi kimaɗe siɗa jarabaraa?

• ¿Bichia kʉ̃risiabaree mia koʼoa mʉ kima omeburu nibaɗe wãs apeɗa, bari mʉ namabena wãibʉ du aɓa kʉ̃risia kũradu akoɓooɗe wãñua, jãka kʉ̃risiabaree?

• ¿Bichi kima deeɗabenarã ome biʼia meraakae mauɗe jãarã ome biʼia akoɓooyu bustakaubʉrã bichia?

NAUƊEBENA BICHI KIMA OME BERREABA

• ¿Kãare aude bi’ia ɓee dachia ambua asebadaa?

• ¿Kãareɗe aude biʼia aseɗai ɓua?

• ¿Kãare aseɗai ɓua dachi ara ambua duanaɗayua?

NAU ASES

• Bichi kima ome ambua panua peleaɗayuswẽa, jãarã kĩrabara jari balon jemenebadau kĩra ɓua. Ara aɓa ɓuu ekipoɗeburu panua mauɗe aɓa junebena ekipoɗe ɓuuwẽ. ¿Kãare aseɗai ɓua ambua panaɗayua?

• Bichia du aɓauba kanai kʉ̃risiarãaba, bari omerãba kanaɗaidu kʉ̃risiayua.

“Problema barauɗe, dachia aɓabena madu jaraabayua chi kulpa bichidu ɓua apeɗa, mambea aɓabena chõpea ɓui baita. Bari beɗeabaraaɗai dachi omerã akupaneeɗapeɗa mambea chi problema solusionaɗayua” (Ethan).

BIBLIABA NAKA JARAƁUA: “Ẽbẽraba ichidu biʼia nibayua jʉrʉubayua, naarã waabenarã baita biɗa jʉrʉbaraai” (Filipenses 2:3, 4).