KIMABARAAPEƊAAƊA DUANUU BAITA
3 Respetabaraaɗai
¿MAKA ASERUUBɄRÃ SAKA NIBAIBA?
Bariara dachia dachi kimaba kʉ̃risiaɓuu diwara ɓoobariimina, ãrĩãdu respetabaraaɗai. Chi libro Diez claves para transformar tu matrimonio jãuba naka aɓua: “Besesɗe aɓabena kʉ̃risiaɓuu diwara ɓoobaria, maamina dachia dachi kima respetaniibʉrã, ichia jaraɓuu waya añaa oɗoebai ɓua. Naarã omerãdu akupaneepeɗa kãare aseɗayu, saka aseɗai kʉ̃risiabadaa, mauɗe aɓabenaba chõpea ũribaria. Makaburu ãchi omerã kʉ̃risia biʼia ɓuuɗaa neepanua”.
BIBLIABA NAKA JARAƁUA: “Dachia kʉ̃rianiibʉrã [...] dachi baitaburu joma jʉrʉɗakaa” (1 Corintios 13:4, 5).
“Atua jarapeɗa, beɗea miamaa jararuuba dachi kimamaa, jãuba ichi kĩra nomaa akuɓoobaria, mau kañabara dachia beɗea mipitaadu jarabaraaɗai kʉ̃ria iɗaa” (Micah).
¿SAKAYUA NAU IMPORTANTE ÃRĨÃ ƁUA?
Chi kimarã ãchi chiya respetaduuwẽrã, ãchi beɗeabudauɗe aɓabena beɗea puʼua jarapeɗa, mauɗe beɗea miamaa o maebʉrã beɗea miaɗaadu jarabadaa. Propesionalrãba jarabadau naka beɗeapanuubʉrã, makara ãchirã kima amaaɗe wãɗai ɓuu.
“Dachia dachi kimamaa ai cha nii adua niita, ai cha nii bruto biɗa niika mae a jaraniiba, jãubara dachi jʉ̃kaabena kaitawẽ oɗoeɓua. Ichira jãuba nomaa akuɓeeyua kawayuswẽa nibaɗe wãi” (Brian).
¿KÃARE ASEI ƁUA?
KAWA KɄ̃RISIASE
Kʉ̃risiachãu bichia saka beɗeaɗa bichi kimamaa semana basiiɗe, mambea naarã panaus:
-
¿Sãabe bes bichia atua jarasaa mauɗe sãabe bes bichia chi kimaba biʼia aseɗa kakua beɗea kĩrawãrea jarasaa?
-
¿Saka respeto unubisaa?
NAUƊEBENA BICHI KIMA OME BERREABA
-
¿Kãare bustabaraa mʉa jarayu mauɗe kãare bustabaraa mʉa aseyu respeto unubiyua?
-
¿Kãare bustabaraa mʉa jaraabayu mauɗe kãare bustabaraa mʉa aseebayu respeto unubiyua?
NAU ASES
-
Karta ɓuuɗe bichi kimaba kãare kʉ̃riaɓuu respetaɓeei baita mau ɓʉse, mambea mau karta machi chiya kambiaɗaika, makãrã berekasturu chi ojaɗe jaraɓuu aseɗai baita.
-
Kartaɗe bichi kima ʉ̃rʉbena kãare aude bustabarii ɓʉse, mambea jaras ichimaa bichimaa ãrĩã bustabarii ichi jãka nibayu.
“Mʉ kima ãrĩã respeta unii unubiyua, mʉa ichia aseɓuu ãrĩãdu balorapeɗa mambea kĩrajʉʉ ãrĩã nibaɗaidu unubiɓua. Chi respeto nejoma mechia aseruuba unubiwẽa, chi ɓee ara biɗĩka keɗeeburu unubibaria” (Megan).
Nauɗe bichia chi respeto unubiyudu aude importantewẽ, naarã bichia chi aɓabena respetaidu bayua.
BIBLIABA NAKA JARAƁUA: “Kʉ̃ria uanureábaɗa, ẽbẽra bia kirureaɗapeɗa, nejuakayawẽa nureábaɗa, pormal ãrĩã kirureábaɗa mauɗe joma aseɗai baita bikãa aseɗaidu kʉ̃risiaɗayua” (Colosenses 3:12).
