AKÕRERÃ BAITA
6 Beɗea bia jaradeɗekai warrarãmaa o kachiruaɗe buekaamaba
¿MAKA ASERUUBɄRÃ SAKA NIBAIBA?
Chi akõrerãba warrarãmaa ariɗe jaradeabaraaɗai, chi naarã o kachiruaɗe buekaɗaamaba mauɗe ne kachirua asepeɗaaɗa kakua iaɗatai jipa asebiayua.
¿SAKAYUA NAU IMPORTANTE ÃRĨÃ ƁUA?
Chi nuree akõrerãba ãchi warrarã iaɗaɗai kʉ̃riaɗakaa iɗibea, ãchia ãchi warrarã nomaa akuduanuuɗaamaba. Maamina ãchirãba akõre kĩra iaɗabaraaɗai, ãchirã biʼia wãuribidayua. Makaburu jipa nureaɗayua.
“Dachirã warrarã baranureeɗe kĩrabarã barko kĩra nurea. Ãchi besesɗe juabiaɗaa wãɗawẽbʉrã jua kachiruaɗaa wãbadaa. Maka ɓee kakua, dachia jipa buekaɗayua, ɓaʼãra ariɗe iaɗatabaraaɗai ãchi jipa wãuriɗai baita” (Pamela).
¿KÃARE ASEI ƁUA?
Bichia asei jaraɗabaɗa aseba. Bichia warrmaa jaraɗabʉrã kosa bia asei baita mauɗe ichia ũriibasiibʉrã, makãrã bichia iaɗai ɓua mauɗe makawẽa ichia bichia jaraɗabaɗa ũrisiibʉrã, makãrã beɗea biaba mipitaa jaraba.
“Iɗibea warrarãba chi akõrerã beɗea ũriɗakaa bẽrã, mʉa mʉ warrarãmaa beɗea mipitaaba jaradeɗekabaria, makãrã ãchi iaɗakuaruu oraka ãchia ũriɗai ɓuu bẽrã” (Christine).
BIBLIABA NAKA JARAƁUA: “Dachia uupeɗaaɗabaɗa ara madu junabaria” (Gálatas 6:7).
Bichi warr iaɗai naeɗe kawa kʉ̃risiaba kãare asesii ichia. Chi ãrĩãdu miaɗaa asesiibʉrã makara bichia kastikai ɓua o aribiadu iaɗatapeda o sĩɗai ɓua. Makawẽbʉrã, biɗĩka ãrĩã ɓoosiibʉrã ichi asesii, makãrã bichia akuɓoopeɗa biʼia jarabaraai. Chi bichi warrba juaɗe selular ãrĩadu iraɓeesiibʉrã, mau naeɗe bichia jaraɗabʉrã jãka asebiimaba, makãrã bichia juakaabena ẽebariɓua, ichi jãara mau kakua bichia ãrĩãdu kastikaabai ɓua.
“Mʉa mʉ warr iaɗai naeɗe, naka kʉ̃risiabarii, ichia jãu asesii ichi kʉ̃riaɗe asesiibʉrã o makawẽbʉrã maka aseebasii. Mauɗeeba mʉa ochiadaubarii ichi iaɗayu o makawẽbʉrã kastikayu” (Wendell).
BIBLIABA NAKA JARAƁUA: “Akõrerã, warrarã ãrĩã kĩrubiaduanarãabaɗa ãchi nomaa sentibiɗaamaba” (Colosenses 3:21).
Kʉ̃ria iɗaa beɗeanibaba bichi warrarã ome. Maka aseniibʉrã, ãchia bichi beɗea ũriɗayua. Bichia aribia iaɗaakuataburuuɗe makãrã ãchia chi ne kachirua aseɗai baɗa kawa kʉ̃risiaɗayua mau aseɗai naeɗe.
“Dai warrba ne miaɗaa aseɓuuɗe iaɗaɗakabachia, maamina daiba chi beɗea kĩrawãrea jaraɗapeɗa ichimaa, jãka asenibarãaba aɗapeɗa, jãuba ichi ẽbẽra kachiruaɗe bayu aɗaabasia, mambea daiba ichi ũkuru aiɗaɗai jarabachiɗau” (Daniel).
BIBLIABA NAKA JARAƁUA: “Chi kʉ̃rianiiba isa kĩrukaa, bari kalmapeɗa mambea chõpea akuɓeebaria mauɗe ẽbẽra bia nia waabenarã ome mambea aiɗakuabaria” (1 Corintios 13:4).
