KŨUDRÃARÃ BAITA
9 Du aɓa kuitaanibai kai bichi
¿MAKA ASERUUBɄRÃ SAKA NIBAIBA?
Bichi du aɓa ununiiba, jãu bichi trʉ̃du kuitaaniiwẽbʉ, jãuba jara kʉ̃riaɓuura bichia kãareɗe kerenii, bichi saka nii, kãare asebarii mauɗe kãare kosarã bia baraanii.
¿SAKAYUA NAU IMPORTANTE ÃRĨÃ ƁUA?
Bichi du aɓa ununiiɗe chi o biaɗebena awara wãwẽa. Bichia jari waabenarã kũudrãarãba asekopanuu kĩra, jãarã kĩrara asewẽa.
“Ẽbẽrarã ãrĩãrãba aduabʉ kãare aseɗai o ẽbẽrarã ãrĩãrãba jarabadaa kãare aseyu ichimaa, mauɗeeba ãchia adua kãare paru jũɗayu siɗa” (Adrian).
“Mʉ du aɓa kawanibaɗe wãsia kãare kosarã biʼia asenibai bariara pasilwẽmina. Mauɗe kuitaaɓua kairã mʉ amikorã ariɗe nuree, ãchi saka asenureeɗeeba. Bariara waabenarãba mʉmaa jaraɗai chi kãare biʼia ɓuu mauɗe kãare miaɗaa ɓuuɗe” (Courtney).
BIBLIABA NAKA JARAƁUA: “Nau iujãaɗebenarãba waubadau kĩra nibarãsturu, maumaarã kʉ̃risia wiɗi Dachi Akõreba dea ɓuu kakua jipa nibasturu” (Romanos 12:2, El Nuevo Testamento en el idioma Chamí de Colombia, Wycliffe Bible Translators, Inc.).
¿KÃARE ASEI ƁUA?
Bichia kuitaayua bichi kai mauɗe kai bai ɓuu bichi, kawa kʉ̃risias kãare biʼia asebarii, kãare ariɗewẽ asebarii mauɗe kãare bichia kerenii siɗa. Nauɗe kʉ̃risiaba.
Kãare mʉa biʼia asebaraa: “¿Kãare kosarã mʉa biʼia asebariɓua? ¿Kawawẽa ɓuu kakua kĩrubaree mʉ? ¿Mʉ ora arikʉɗe neebaree? ¿Mʉ chokekea ãrĩã ɓue o waabenarãmaa kosa deabaree?”.
NAU ASES: Bichi baita chaarea ɓuubʉrã kuitaayua kãare kosarã biarã uanii, makãrã jaras, bichi akõrerãmaa o amikorãmaa biɗa, ãchirãba jaraɗayua.
BIBLIABA NAKA JARAƁUA: “Aɓa aɓaarãba kawa ochiabaraaɗai ãsdu kãare kosarã asebadauɗe, waabenarã ome komparaɗawẽa, mauɗe kĩrajʉʉ nibai chi asenii ome” (Gálatas 6:4).
Kãare mʉa ariɗewẽ asebaraa: “¿Kãare kosarã mʉɗe baraaniiɗe mejorai nesitaɓua? ¿Sãma mʉ aude tenta akuɓoobaria ne miaɗaa asei baita? ¿Kãare momentoɗe mʉ kĩrukoɓoobarii apiibiyuba?”.
BIBLIABA NAKA JARAƁUA: “Dachi kachiruaswãe panuu apanuubʉrã, ara dachi du aɓa setaa jarapanuu mauɗe biawãra beɗea adua panuu.” (1 Juan 1:8, El Nuevo Testamento en el idioma Chamí de Colombia, Wycliffe Bible Translators, Inc.).
Chi mʉa kereɓuu: “¿Sakayua kuitaaɓua chi mʉa aseɓuu biʼia ɓuu? ¿Mʉa Dachi Akõreɗe kerebaree? ¿Mʉa saka kuitaaɓua Dachi Akõre nii? ¿Kãare kʉ̃risiaɓua mʉa junebena ẽbẽra puʼua waubudauɗe o beɗea añaabudauɗe mauɗe sakayua? ¿Nau iujãa biʼia ɓeebaka o saka ɓeei ɓua?”.
BIBLIABA NAKA JARAƁUA: “Kawa kʉ̃risias kosa asei naeɗe, mambea bichi biʼia ochia irapanaɗayua” (Proverbios 2:11).
