AKÕRERÃ BAITA
8 Ejemplo bia deabaraaɗai dachi warrarãmaa
¿MAKA ASERUUBɄRÃ SAKA NIBAIBA?
Chi akõrerãba ãchi warrarãmaa jaraduanuu biʼia aseɗai baita, makãrã ara ãchia biɗa jãu ãchi bidaɗe asebaraaɗai. Akõre niiba chi warrba setaa jarai bustakaunii, mau kakua ichi iaɗaaɓuu. Maamina ichi deeɗa ɓuuɗe, poroaɗe ichi wiɗiniɗauɗe, chi warrmaa mʉ deeɗa wãʼãe abiɓuubʉrã, makãrã ũkuru setaa jarabiɓua.
“Chi akõrerãba ãchi warrarãmaa jarabadau: ‘Mʉ beɗea ũrinureábaɗa mauɗe ne miaɗaa aserãabaɗaʼ, maamina mau kaaɗe ãchia wãɗapeɗa nejoma miaɗaa ɓee asebadau. Dachia kawaɗai dachi warrarãba asekopanuu dachia aseniidu madu kawanurea ãchia chi akõreɗebena. Dachia kosarã añaa asepanuubʉrã, ãchia kawaɗayua, mambea ãchia biɗa jãu aseɗe wãpanua” (David).
BIBLIABA NAKA JARAƁUA: “Bichia waarãmaa ‘orroarãabaɗaʼ anii, ¿orroabaree?” (Romanos 2:21).
¿SAKAYUA NAU IMPORTANTE ÃRĨÃ ƁUA?
Chi warrarãba ãchi amikorã eskuelaɗebenachaa asenureabaria, maamina ãchia aude chi cha kopanuurã ãchi akõre kĩraburu aseduanua, jãarã waabenarã kañabara. Chi akõrerãba ãchi warrarãmaa ejemplo bia deapanuubʉrã, ãchirãra o ãi wãuriɗawẽa.
“Bariara dachia aribiadu dachi warrarãmaa chi biʼia ɓee aseɗayua jaraduanuubʉrã, maamina dachirãba dawaraurãba chi ne kachiruadu ãrĩãdu aseduanuubʉrã ãchia dachia chi jãdu asebaraɓuudu unukopanua” (Nicole).
BIBLIABA NAKA JARAƁUA: “Dachia chi ʉtʉbena kawapeɗaniibʉrã, jãuba dachi kĩaɗar ome nibai idarabiwẽa” (Santiago 3:17).
¿KÃARE ASEI ƁUA?
Kawa kʉ̃risiaba: “¿Mʉa saka unibabaraa mʉ wẽra mauɗe mʉ warrarã baare? ¿Kãare teleisorɗe ochiaɓoabaraa? ¿Amiko biarã uanii mʉ? ¿Waabenarã aiɗakuabaree o maebʉrã ida buekabaraa?”. ¿Bustai ɓue bichi warrarã ara jari bichi nii kĩra nibaɗayua?
“Dachirãba kosarã biarã aseɗakaunureebʉrã, makãrã dachia dachi warrarãmaa wiɗiɗaabai ɓua kosa biarã aseɗayua” (Christine).
Perdon wiɗis. Warrarãba kuitaanurea dachi ẽbẽra jipa kirureewẽa. Mauɗeeba, bichia bichi error aseɗa kakua bichi wẽramaa perdon wiɗisiibʉrã, jãuba jaradeɗekaɓua ãchimaa lesion biʼia ãrĩã ɓuu. Ãchi siɗa jãɗakare error baraabudauɗe, jãu ãchia poyaa meraɗaabai ɓua mauɗeeba perdon wiɗi kawaɗai baita mauɗe ãchi siɗa jipa nureewẽ jaradeɗekayua.
“Dachia error aseɗabaɗa poyaa meraɗaabai ɓua, mauɗe dachia isa jaraɗawẽbʉrã ãchimaa o isa unubiɗawẽbʉrã, dachia asepeɗaaɗabaɗa, ãchia biɗa jãɗakare aseɗaabayua” (Robin).
“Dachi warrarãba dachiaburu asenuree unuɗayua. Mauɗeeba waaburu biʼiadu asebaraaɗai. Dapeɗeeɗabena mauɗe ẽsebuɗaaɗebena jãu asekopanuuba jaradeakopanua ãchimaa” (Wendell).
